Skriftlig spørsmål fra Tore Storehaug (KrF) til arbeids- og sosialministeren

Dokument nr. 15:2240 (2017-2018)
Innlevert: 11.09.2018
Sendt: 11.09.2018
Besvart: 18.09.2018 av arbeids- og sosialminister Anniken Hauglie

Tore Storehaug (KrF)

Spørsmål

Tore Storehaug (KrF): NAV si støtteordning for aktivitetsmidlar for vaksne over 26 år er i ferd med å bli brukt opp, slik at alle søknadar er sett i bero.
Kva vil statsråden gjere for å sikre at alle brukarar får nødvendige hjelpemiddel?

Begrunnelse

I slutten av august har brukarar, hjelpemiddelleverandørar og fagmiljø fått beskjed frå NAV at den nevnte potten no er tom. Det er gledeleg at det no er stor tilsøking på midlane fordi dei er blitt betre kjent og det er komme meir og betre utstyr som gir brukarar ein betre kvardag. Brukarar og brukarorganisasjonar har gitt uttrykk for at dei synes det er kritikkverdig at ein ikkje har sett denne situasjonen komme når det nærmar seg slutt på pengane allereie etter andre tertial.

Anniken Hauglie (H)

Svar

Anniken Hauglie: Regjeringa Stoltenberg foreslo i statsbudsjettet for 2014 å etablere ein rammestyrt ordning for aktivitetshjelpemidel for vaksne over 26 år. Dei foreslo ei løyving på 25 mill. kroner. Samarbeidsregjeringa foreslo å auka løyvinga til aktivitetshjelpemiddel i 2014 med 30 mill. kroner frå 25 til 55 mill. kroner, jf. Prop. 1 Tillegg 1 (2013-2014) og Innst. 15 S (2013-2014).
Løyvinga til aktivitetshjelpemiddel til personar over 26 år er som nemnt rammestyrt. Dette inneber at Arbeids- og velferdsetaten kan gi avslag søknader eit år for å unngå at løyvinga vert overskriden. Brukarar som får avslag på søknad om aktivitetshjelpemiddel, vil kunne søkje på nytt neste år.
Dei første åra var forbruket på ordninga lågare enn løyvinga, noko som mellom anna førte til at ingen fekk avslag på søknaden som følgje av at løyvinga var overskriden. Dette har no endra seg. Dei auka utgiftene dei seinare åra, og spesielt i 2017, kan tyde på at ordninga har vorte betre kjend blant målgruppa og at det har tatt noko tid før etterspørselen etter aktivitets-hjelpemidel til personar over 26 år nådde nivået som var forventa ved innføringa av ordninga frå 1. juli 2014.
Min vurdering er at det likevel er for tidleg å seie kva som er det rette nivået på løyvinga over tid, sidan ordninga framleis er relativt ny. Eg vil difor ta initiativ til at ordninga vert evaluera. Ei evaluering vil mellom anna kunne gi svar på kva som vil være det faste utgiftsnivået for ordninga og korleis ordninga kan innrettast til beste for målgruppa. Det vil være naturleg å ha dialog med brukarorganisasjonane i utforminga av et slikt oppdrag, på same måte som det var dialog med dei da ordninga vart etablert.