Skriftlig spørsmål fra Geir Pollestad (Sp) til næringsministeren

Dokument nr. 15:2264 (2017-2018)
Innlevert: 13.09.2018
Sendt: 13.09.2018
Besvart: 21.09.2018 av næringsminister Torbjørn Røe Isaksen

Geir Pollestad (Sp)

Spørsmål

Geir Pollestad (Sp): Vil statsråden greie ut kva konsekvensar ei ordning for å gje Color Line høve til å flagge Kiel-ferjene til NIS vil ha for nordiske sjøfolk i ferjedrifta i Norden, og kva tid kan i så fall ei slik utgreiing vere ferdig?

Begrunnelse

I revidert statsbudsjett 2018 seier eit fleirtal i Stortinget:

«Stortinget ber regjeringen foreta en samlet gjennomgang av forutsetningene som er blitt lagt til grunn for den varslede endringen av fartsområdeforskriften for utenriksferger, og presenterer resultatene for Stortinget på en egnet måte før en eventuell endring blir foretatt.»

I desse sakene syner ofte statsråden til «fartsområdeutvalget» sitt arbeid. Dette arbeidet er no snart fem år gammalt og det er mykje som er endra sidan den gong. Mellom anna syner rekneskapstal at økonomien i Color Line i dag verkar solid. Utan omsyn til dette vert det venta at regjeringa legg fram oppdatert faktagrunnlag og vurderinger for Stortinget.
Eg hadde nylig møter med DFDS og dansk fagbevegelse. Dei var begge uroa for at ei opning for NIS for Color Line vil bety at Noreg startar eit kappløp mellom nordiske land med svekka løn- og arbeidsvilkår i nordisk ferjedrift.
Eg syner og til at arbeidsministerne på nordisk nivå den 13. april 2018 har signert på eit dokument om «Joint Nordic Declaration on Fair Competition and Fair Working Conditions».
Det har og blitt reist spørsmål om vilkåra i NOR og andre ordningar som til dømes casinodrift er dårlegare enn det ein får under ferjeregelverket i
DIS.

Torbjørn Røe Isaksen (H)

Svar

Torbjørn Røe Isaksen: Regjeringa er oppteken av at utvidinga av fartsområde for utanriksferjer i NIS ikkje skal ha negative konsekvensar for nordiske sjøfolk i nordisk ferjetrafikk eller bidra til eit "kappløp mot botnen" i den nordiske arbeidsmarknaden. Eg meiner at endringane som regjeringa legg opp til ikkje vil bidra til det.
Utvidinga av fartsområde for utanriksferjer i NIS vil ikkje gjelde ferjeruter i Norden. Regjeringa hadde tidlegare på høyring eit framlegg med eit strekningskrav på 175 nautiske mil. Da forskrift om ei slik endring var på høyring i 2017, fekk me tydelege tilbakemeldingar om at utvidinga gjekk lengre enn kva fleirtalet i fartsområdeutvalet hadde tilrådd. Fleire meinte at endringa kunne gjere det meir fordelaktig for reiarlag med skip registrert i dei andre nordiske landa å flagge til Noreg, og at dette kunne ha negativ verknad på arbeidsplassane til særleg danske og svenske sjøfolk. Regjeringa tok tilbakemeldingane på alvor, og auka strekningskravet frå 175 til 300 nautiske mil. Det sikrar at ingen av dei skandinaviske ferjerutene er omfatta av endringa. På dette grunnlaget meiner eg at endringane ikkje vil ha negative konsekvensar for den nordiske arbeidsmarknaden for sjøfolk.
Utvidinga av fartsområde handlar om å sikre at reiarlag med norskregistrerte utanriksferjer har internasjonalt konkurransedyktige vilkår. Regelendringa vil gjere det mogleg for Color Line eller andre reiarlag med utanriksferjer i fart mellom ein norsk og ikkje-nordisk hamn å konkurrere på lik linje med reiarlag som har skip i andre registre, som til dømes DIS. I dag står reiarlag fritt til å registrere skip i utanlandsk register, og dei kan tilsetje utanlandsk mannskap på lokale vilkår på utanriksferjer i DIS som ikkje anløper dansk hamn. Eg meiner difor det er viktig å ta omsyn til konsekvensanse av å ikkje gjere noko i det heile tatt. Color Line er ein viktig maritim aktør med rundt 2500 tilsette, og det vil ha vesentlege konsekvensar for den norske maritime næringa om dei skulle velje å flytte verksemda si til Danmark.
Regjeringa si avgjerd om å endre fartsområdereglane for utanriksferjer i NIS følgjer opp anbefalingane frå fleirtalet i fartsområdeutvalet. I kva grad endringane kan ha konsekvensar for nordiske sjøfolk i ferjedrifta i Norden er ikkje omtalt i utvalet sin rapport. Eg har også merka meg at leiaren for utvalet nyleg uttala at utvalet ikkje drøfta problemstillinga. Som eg tidlegere har gjort greie for, mellom anna i skriftleg svar til Stortinget 13. mars 2018 og i vurdering av representantforslag 175 S (2017-2018) 17. april 2018, vil eg følgje nøye med på utviklinga framover og moglege konsekvensar i både Norden og Europa. Regjeringa vil også kome tilbake til Stortinget med oppfølging av Stortinget sitt oppmodingsvedtak om føresetnadene for endringa av fartsområde for utanriksferjer i NIS.