Tellef Inge Mørland (A): Kan statsråden stadfeste at regjeringa vil løyve midlar til oppstart av Besteland-Helle på riksveg 9 i revidert statsbudsjett, kor stor er denne løyvinga, kan Statens vegvesen på bakgrunn av denne budsjettlekkasjen no gå i gong med å førebu oppstart av denne parsellen, slik at ein sikrar ei kontinuerleg utbygging, og kvifor har ein ikkje omtala oppstarten av strekninga i statsbudsjettet for 2019, dersom det allereie no er klart at det kjem midlar til den i revidert statsbudsjett?
Begrunnelse
I desember 2017 gjorde Stortinget fylgjande vedtak for å sikre ei kontinuerleg utbygging av riksveg 9 i Setesdal:
«Stortinget ber regjeringen sikre og prioritere en rask, sammenhengende og effektiv utbygging av Kjevikveien og rv 9 Setesdal i tråd med føringene gitt i Innst. 460 S (2016-2017) Nasjonal transportplan.»
Transport- og kommunikasjonskomiteen sitt einstemmige vedtak ved handsaminga av Nasjonal transportplan (Innst. 460 S (2016-2017) var utforma slik:
«Komiteen forventer at utbedringsarbeidet «Gul stripe til Hovden» fortsetter som en sammenhengende utbygging i samarbeid mellom lokale og regionale myndigheter.»
På trass av dette legg samferdsleministeren likevel ikkje opp til nokon oppstart av den neste strekninga på riksveg 9 Besteland – Helle i statsbudsjettet for 2019, sjølv om noverandre strekning under utbygging Bjørnaråa – Optestøyl vert ferdigstilt i 2019.
Framstegspartiet sin stortingsrepresentant Åshild Bruun-Gundersen kan imidlertid i Setesdølen torsdag 11.oktober røpe at regjeringa har sett av midlar til oppstart av strekninga Besteland – Helle på riksveg 9 i revidert statsbudsjett i 2019. Dette seier ho etter å ha vore i tett dialog med statssekretærane i samferdsledepartementet.
Det er for underteikna noko overraskande at ein allereie før statsbudsjettet for 2019 er vedteke, kjem med lekkasjar frå revidert statsbudsjett som fyrst kjem til våren, og det er difor ynskjeleg at statsråden kan stadfeste denne budsjettlekkasjen.