Begrunnelse

Eg har brukt både min eigen og andre sin frustrasjon over kor vanskeleg det kan vera å få levert reiserekningar i tide til å pønske ut ein idé. Eg ønskjer at helseministeren skal gjerast kjent med denne ideen fordi eg håpar han vil be om at relevante aktørar vurderer den skikkeleg og helst tek den vidare. Utgangspunktet for ideen er å gjera det lettare for folk å få att pengar for reiser til sjukehus og andre helseinstitusjonar der dei har krav på refusjon. Sjølv om det har vorte noko lettare med ei nettbasert løysing, er det enno slik at mange aldri får att pengane for reiser fordi dei ikkje forstår seg på systemet eller rett og slett leverer kravet for seint. Fristen no er berre på seks månader. Når folk til dømes har fått kreft eller andre alvorlege diagnosar, kan det vera vanskeleg å få levert reiserekningar innan seks månader. Eg meiner fristen bør utvidast for slike tilfelle, men uansett vil eg gjera framlegg om ei ny og praktisk løysing, som truleg vil lette oppgåva for svært mange. Eg meiner det bør bli mogleg å levere reiserekninga same dag som du møter til behandling eller undersøking, på den same betalingsautomaten som du uansett skal betale på. I tillegg til å betale på automaten, kan du få opp eit ekstra alternativ: «Levere reiserekning.» Og så kan spørsmålet til dømes vera: «Har du reist frå den folkeregistrerte adressa di til denne behandlingsstaden i dag? Viss ja, vil du i så fall allereie no levere ei forenkla reiserekning?» Så kunne systemet rekne ut kilometertal tur-retur og automatisk betale ut pengane til vedkomande innan ei viss tid. Mange menneske som no går glipp av relativt store summar kunne fått att pengane sine med ei slik løysing. Dersom løysinga fører til at fleire får att pengar, vil det bli dyrare for staten, men dette er pengar som folk har krav på. Eg meiner denne ideen bør bli vurdert skikkeleg og at det må utarbeidast ei heilheitleg løysing som både gjer det mogleg å levere ei forenkla reiserekning på dette viset og ei betre nettløysing for dei som vil eller må levere reiserekning på nett i ettertid. Eg har fått innspel om at det er problem med å få levert krav om utgiftsdekking av ferjeutgifter. Slik eg ser det bør ferje- og bomutgifter kunne leggjast inn automatisk i reiserekninga på strekningar der ein ikkje kjem utanom å bruke ferje eller passere bom. Altså meiner eg det må vera unødvendig å levere kvitteringar, for folk kan uansett ikkje leggje på svøm over fjorden med bilen på ryggen og bommane må ein betale for same kva. Eg er klar over at det går an å problematisere ideen min og framstille det som vanskeleg, men eg håpar at målet til statsråden er å leite etter enklare løysingar som folk kan nytte seg av. Eg meiner betalingsautomatane, som mange uansett bruker når dei møter opp til undersøking og behandling, kan vera ein del av ei enklare løysing for å levere reiserekningar.