Begrunnelse

Viser til eit innlegg på trønderdebatt.no 01.12.20 av ordfører Tom Myrvold. Her vert det vist til at Covid-19 situasjonen gjer at det spøkjer for flyruta Ørland-Oslo, etter som ruta ikkje kjem inn under kompensasjonsordninga. Å leggje godt til rette for pendling for forsvarstilsette er særs viktig for forsvarsevna. Utan denne ruta, vil reisetida for meir enn 1 500 soldatar på Ørland flystasjon aukast med mellom 6-8 timar avhengig av når og kor reisa vert gjennomført, etter som ein må mellomlande på Værnes. Det vil også føre til fleire ekstrakostnadar som meir bruk av hotell, endring i kollektivtilbodet og auka reisekostnadar.
Det er fleire innlandsruter som vert råka av Covid-19, det vil kunne ha fleire negative konsekvensar for tilsette som er avhengig av å pendle. Senterpartiet meiner difor at det er viktig at staten oppheld eit godt flytilbod ute i distrikta. Senterpartiet meiner også at staten må jobbe for å verne solide fag- og arbeidsmiljø ute i distrikta, ettersom dette vil kunne avgrense sårbarheita. Dersom forsvaret skal basere store delar av basane i Nord-Noreg på tilsette som må vekependle og innlandsflytilbodet vert svekka i tida som kjem, er det ein uheldig situasjon.