Skriftlig spørsmål fra Liv Signe Navarsete (Sp) til forsvarsministeren

Dokument nr. 15:2520 (2020-2021)
Innlevert: 18.06.2021
Sendt: 21.06.2021
Besvart: 29.06.2021 av forsvarsminister Frank Bakke-Jensen

Liv Signe Navarsete (Sp)

Spørsmål

Liv Signe Navarsete (Sp): Kva krav frå Forsvaret utløyser ei slik oppbemanning på Evenes, korleis skal Avinor finne inndekning og kva er kostnaden for oppbemanning, utviding av maskinpark og eventuelle bygningsmessige utvidingar av brøyte og plasstenesta som følgje av Forsvarets etablering på Evenes lufthamn?

Begrunnelse

Nettstaden iHarstad.no skriv 16.06.21 at Avinor må doble tal tilsette på flyplassen (Evenes) for å handtere krava til Forsvaret. Spørsmål kring baneavising, bruk av sand, val av kjemikaliar, korrosjon på flyskrog og konsekvensar for RAMSAR har vore stilt ei rekke gonger utan at dei er tilstrekkeleg svara ut. Det er viktig at ein er open om kostnader og konsekvensar knytta til Forsvaret si etablering på Evenes og at desse vert gjort kjent.

Frank Bakke-Jensen (H)

Svar

Frank Bakke-Jensen: Forsvarets betaling for bruk av Avinors lufthamner er regulert gjennom Forskrift om avgifter for bruk av lufthamner drifta av Avinor AS og Forskrift om avgift på flysikringstenester, begge med heimel i Lov om Luftfart. Forsvarets behov ut over definerte standardytingar dekkast gjennom lokale avtaler mellom Forsvaret og Avinor.
Luftforsvaret har i samarbeid med Avinor AS arbeida med å få etablert eit framtidig driftskonsept på Evenes som understøtter beredskap og operasjonar med kampfly og maritime patruljefly. Arbeidet har helde på sidan 2019 der intensjonen har vore å få etablert ein driftsavtale med Avinor før prøvedrift startar med F-35 hausten 2021. Det er mellom anna gjennomført konseptutvikling både i vintersesongen 2020 og 2021 av Avinor på Evenes for å sikre at det etablerast eit driftskonsept som er tilpassa Forsvarets behov før flyging frå Evenes startar opp. Dette arbeidet er no i sluttfasen. Luftforsvaret og Avinor er einige om kva for behov Forsvaret har som ikkje leverast som standardytingar og som blir finansiert gjennom alminnelege avgifter som også Forsvaret betaler.
Driftskonseptet på Evenes legg opp til at Forsvaret får levert tenester frå Avinor utover dei definerte standardtenestene ved lufthamnene, mellom anna utvida flysikringstenester og brann-, rednings- og plasstenester. For å sikre leveranse i tråd med Forsvarets behov, vil det mellom anna bli etablert beredskap som ivaretek servicemål og krav utanfor lufthavnas opningstid. Både bemannings- og maskinoppsettet til Avinor på Evenes må oppjusterast for å dekke krava til operasjoner og beredskap med kampfly og maritime patruljefly.
Utgifter for tenester ut over standardytingar på Evenes iht. det etablerte driftskonseptet vil dekkas av Forsvaret. Forsvaret ser for seg ei trinnvis utvikling og evaluering av driftskonseptet etter kvart som dei får erfaring med å drive operasjonar med kampfly og maritime patruljefly frå Evenes.