Skriftlig spørsmål fra Liv Kari Eskeland (H) til samferdselsministeren

Dokument nr. 15:270 (2021-2022)
Innlevert: 05.11.2021
Sendt: 05.11.2021
Besvart: 16.11.2021 av samferdselsminister Jon-Ivar Nygård

Liv Kari Eskeland (H)

Spørsmål

Liv Kari Eskeland (H): Stord lufthamn har søkt om at staten innlemmer flyruta Stord-Oslo i sine FOT-ruter. Eg viser til at eit samla Storting i 2021 vedtok å innlemma flyruta Stord-Oslo i statens flyrutekjøp under pandemien, og flyruta vart av departementet lyst ut på anbod over tre periodar. Siste periode går ut til nyttår.
Kva vil statsråden gjere med søknaden om innlemming i FOT- rutetilbodet?

Begrunnelse

Skal ein unngå ny stopp i flytrafikken samt permittering av tilsette må dette snarast få ei avklaring for å rekke oppstarten av ny periode som startar 1. januar 2022.
Flyruta Stord-Oslo har i mange år vore basert på kommersiell drift. Dette er likevel ein situasjon som gir uforutsigbar drift, ettersom næringslivet på Stord er utsett for svingingar innan oppdrag og aktivitet. Under pandemien var ruta ein periode ute av drift, og for å få ruta opp att, vedtok Stortinget at ruta skulle få støtte. Samferdselsdepartementet lyste 1. mars 2021 ut ein konkurranse om mellombels drift av flyruta Stord-Oslo for perioden 1. april-30- april 2021, avtalen vart seinare forlengt ut juni, og til sist ut året.
Flyruta Stord-Oslo er viktig for det regionale næringslivet med Akers Solutions i spissen. Lufthamna er også viktig for beredskapen i regionen og er ofte besøk av redningshelikopter og ambulansefly. I oktober i fjor vart luftamna nytta som helikopterbase for offshoretrafikk til plattformene i Nordsjøen grunna vektarstreik på Bergen lufthamn, Flesland. Stord lufthamn avlastar Bergen lufthamn med treningsflyging av fly og helikopter.

Jon-Ivar Nygård (A)

Svar

Jon-Ivar Nygård: Flyruta Stord–Oslo har etter to oppmodingsvedtak i Stortinget vore inkludert i det mellombelse pandemirelaterte kjøpet av tidlegare kommersielle ruter (minstetilbodskjøpet) sidan 1. april 2021. Staten har for perioden april-desember 2021 støtta ruta med om lag 9,3 mill. kr. Ruta er frå oktober 2021 den einaste attverande strekninga i minstetilbodskjøpet.
Statleg kjøp av flyrutetenester har fram til pandemien vore avgrensa til ruter til og frå lufthamnene som er ein del av Avinor-nettverket. Dette inkluderer fleirtalet av dei lokale lufthamnene som Luftfartsverket i si tid tok over frå kommunane på 90-talet. For flyruter frå lufthamnene som ikkje er eigd av staten, har det hittil ikkje vore gjennomført statleg flyrutekjøp på varig basis. I staden har staten sikra økonomisk støtte til desse lufthamnene, først til flygeinformasjonstenesten (AFIS) og ulike kombinasjonar av investerings- og driftsstøtte, og deretter med ei eiga tilskotsordning frå 2016. Stord Lufthamn får i dag støtte frå Vestland fylkeskommune, etter at fylkeskommunen som eit ledd i regionreforma overtok tilskotsansvaret og budsjettmidlane frå Samferdselsdepartementet frå 1. januar 2021.
Samferdselsdepartementet si faglege vurdering er at flyrutebehovet i regionen er godt dekka gjennom rutetilbodet i Haugesund og Bergen. Eg kan ikkje sjå at det på noverande tidspunkt er grunnlag for å inkludere ruta til Stord i den ordinære kjøpsordninga. Også det mellombelse kjøpet vil verte avvikla frå 1. januar 2022, som for fleire andre ordningar med tilleggsstøtte på transportområdet grunna pandemien. Ei eventuell utviding av FOT-ruteordninga utover det verkeområdet ho har hatt hittil, til og frå Avinor sine lufthamner, er meir naturleg å vurdere ved rullering av kontraktane for dei ordinære kjøpsrutene.