Ingrid Fiskaa (SV): NATOs generalsekretær seier at Tyrkia har rett til å forsvara seg mot terrorhandlingar.
Er utanriksministeren einig med Jens Stoltenberg i at bombinga av Aleppo og Kobani i Syria nyleg var sjølvforsvar, eller meiner ministeren at det er eit brot med folkeretten å angripe tettbebygde strøk i naboland?
Begrunnelse
Laurdag 19. november starta Tyrkia Operasjon sabel, med angrep mot kurdiske område nordaust i Syria og i Nord-Irak. Tyrkia har bomba fleire mål og påstår at over 250 menneske er drepne. Det har også blitt rapportert om at sivile mål som mellom anna ein flyktningleir har blitt treft av angrepa.
Tyrkia gjennomførte 25 luftangrep i Aleppo-provinsen og ved byen Kobani seint laurdag kveld. Områda som er ramma blir kontrollert av USA-støtta Syriske demokratiske styrkar (SDF). SDF spelte ei sentral rolle i kampen mot IS i Syria.
Tyrkia har også varsla at dei vil trappa opp med ein ny bakkeoffensiv. President Erdogan har mellom anna uttalt at “Det er ikkje snakk om at denne operasjonen vil bli avgrensa til berre ein luftoperasjon.”
Trass i at angrepa bryt med FN-paktas forbod mot angrepskrig, lar internasjonale fordømmingar venta på seg. Frå Tyrkia sine Nato-allierte har det nesten ikkje kome nokon reaksjonar på desse alvorlege folkerettsbrota. Og i eit intervju med SVT uttrykte NATOs generalsekretær Jens Stoltenberg at “PKK er ein organisasjon som opererer frå både Irak og Syria. Dei er klassifisert som terroristar av EU og av andre organisasjonar. Tyrkia har rett til å forsvara seg mot terrorhandlingar.“