Skriftlig spørsmål fra Olve Grotle (H) til næringsministeren

Dokument nr. 15:722 (2022-2023)
Innlevert: 14.12.2022
Sendt: 14.12.2022
Besvart: 22.12.2022 av næringsminister Jan Christian Vestre

Olve Grotle (H)

Spørsmål

Olve Grotle (H): Kor mange bedrifter har søkt på ordninga om energitilskuddsordningen for bedrifter, og kor mange har søkt og ikkje fått innfridd tilskot?

Begrunnelse

Høgre har gjennom heile 2022 vore opptatt av straumstøttetiltak for bedrifter. I haust følgde regjeringa etter og etablerte "energitilskuddsordninga for bedrifter", som skulle forvaltast av Enova SF. Energitilskuddsordninga er ei førebels ordning for energi-tilskot til næringslivet som følge av ekstraordinære straumutgifter. Søknadsfrist for ordninga gjekk ut 11. desember, og Høgre er interessert i å få vite kor mange bedrifter som nytta seg av ordninga.

Jan Christian Vestre (A)

Svar

Jan Christian Vestre: Som representanten syner til, var fristen for innsending av søknadar til energitilskottsordninga 11. desember 2022, i tråd med § 1-3 i forskrifta for ordninga; forskrift om midlertidig ordning for energitilskudd til næringslivet som følge av ekstraordinære strømutgifter.
16. desember 2022 la regjeringa fram førebelse tal på antalet søkjarar i ordninga. Enova har no kvalitetssikra tala, og endelege tal syner at 3 186 føretak har søkt i ordninga. Alle søknadar som vart sendt inn gjennom sakshandsamingssystemet til Enova har vorte handsama og innvilga maskinelt, basert på informasjonen som vart lagt inn i søknadsskjema og som var kontrollert av revisor/autorisert rekneskapsførar. Med andre ord har ingen av søknadane som vart levert inn gjennom sakshandsamingssystemet vorte avvist.
Av dei 3 186 som har søkt, er det 3 180 som får tilskott til delvis dekning av straumkostnadar anten i støttetrinn 1 (993 søkjarar), støttetrinn 2 (2 181 søkjarar), eller tilskott til å gjennomføra energitiltak (2 187 søkjarar). Som desse tala syner, er det 6 føretak som får tilskott til å gjennomføra energitiltak i støttetrinn 2, men som ikkje får tilskott til delvis dekning av straumkostnader. Vidare er det 4 søkjarar som kun mottek støtte til kostnadsdekning av kontroll frå revisor/autorisert rekneskapsførar, og 2 søkjarar som ikkje mottek tilskott i det heile. Av tekniske årsaker vil alle dei 3 186 søkjarane likevel motta tilsagnsbrev med svar på deira søknad.
Støtteutmålinga er basert på informasjonen som kom inn til Enova i søknadane, mellom anna om straumforbruk, straumpris, omsetnad, kostnadar til godkjenning av revisor/autorisert rekneskapsførar, jf. mellom anna § 4-1 i forskrifta for ordninga. At det er eit lite antal søkjarar som kun mottek støtte til kostnadsdekning av kontroll frå revisor/autorisert rekneskapsførar eller ikkje mottek støtte i det heile, skuldast difor at dette vart deira berekna tilskott basert på opplysningane som kom inn i søknadane.
Enova arbeider no med utsending av tilsagnsbrev og utbetalinga av tilskott. Dei 3 174 føretaka som får tilskott til delvis dekning av straumkostnader vil få pengar på konto før jul, slik regjeringa lova. Meir informasjon om tilskottsmottakarane vil gjerast tilgjengeleg på Enovas nettsider for ordninga snarleg etter utsending av tilsagnsbrev.