Skriftlig spørsmål fra Alfred Jens Bjørlo (V) til samferdselsministeren

Dokument nr. 15:1689 (2022-2023)
Innlevert: 15.03.2023
Sendt: 16.03.2023
Besvart: 21.03.2023 av samferdselsminister Jon-Ivar Nygård

Alfred Jens Bjørlo (V)

Spørsmål

Alfred Jens Bjørlo (V): Kva vil statsråden gjere for å sikre likebehandling av flyplassane i Sogn og Fjordane, slik at ikkje Florø blir negativt forskjellsbehandla og kjem dårleg ut?

Begrunnelse

I ei pressemelding 15.3.23 skriv samferdsleministeren m.a. «- Dei regionale flyrutene er ein viktig del av samferdselstilbodet i distrikta. Derfor har regjeringa vedteke å styrke rutetilbodet og redusere billettprisane i dei komande FOT-utlysingane med avtaleoppstart i 2024.»
Dette er godt nytt for Bringeland, Anda og Haukåsen lufthamner. Regjeringa synast imidlertid å ha gløymt rutetilbodet frå Florø lufthamn, noko som er svært uheldig spesielt for næringslivet på kysten.

«Florø lufthamn og dei reisande frå Florø blir den store taparen i nytt regjeringsforslag»

skriv lokalavisa Firdaposten om saka 15.3.23. Ordførar i vertskommunen for Florø lufthamn, Ola Teigen (Ap), seier det slik til avisa:

"Eg er fly forbanna. (..) Vi vil oppleve det motsette av flyplassane kring oss. Redusert rutetilbod og dyrare prisar. Uhøyrd,"

Det har lenge vore eit lokalt krav om at både Florø-Oslo og Florø-Bergen vert FOT-ruter.

Jon-Ivar Nygård (A)

Svar

Jon-Ivar Nygård: I vurderinga av kva ruter som skal vere ein del av FOT-ordninga har vi sett til transportbehovet, eksisterande transportstand (flytilbod og alternativ transport, inkludert via andre lufthamner), den innhenta transportfaglege utgreiinga frå Oslo Economics, innkomne høyringsinnspel, og dessutan det tilgjengelege økonomiske handlingsrommet set opp mot andre prioriterte satsingar. FOT-ruta Florø–Oslo består og vil vere omfatta av prisreduksjonen. Dette er eit viktig bidrag i å styrkje flyrutetilbodet til/frå Florø. Ruta Florø–Bergen har i dag eit kommersielt tilbod med inntil seks daglege rundturar. Den transportfaglege utgreiinga viste til at rutetilbodet til/frå Florø, med FOT-rute mot Oslo og ei kommersiell rute mot Bergen, tilfredsstillar alle transportstandardkriteria og vår heilskaplege vurdering har vore at rutetilbodet mot Bergen er tilfredsstillande med tanke på frekvens og kapasitet.