Ingrid Fiskaa (SV): I Lindesnes kommune går det no ein planprosess der det som mest sannsynleg er eit mineraluttaksprosjekt blir framstilt som eit prosjekt for hamn og industriområde med plan om produksjon av fundament til flytande havvind.
Korleis stiller regjeringa seg til godkjenning av prosjekt som ville vore underlagt konsesjonsplikt frå Direktoratet for Mineralforvaltning dersom det ikkje var feilaktig definert som hamn og industriområde?
Begrunnelse
I Lindesnes kommune pågår ein planprosess der det blir søkt om å sprenga ut 15 millionar tonn øyegneis 2,5 km frå bybusetnad og 3 km frå strandperla Sjøsanden. I søknad blir det hevda at området skal opparbeidast som hamn og industriområde med plan om produksjon av fundament til flytande havvind.
Marknadsdata frå energibransjen slik som Energy Industry Council Datastream viser at dei dataa som blir brukt i plandokumentet om potensielle prosjekt og arbeidsplassar ikkje stemmer med det verkelege behovet i marknaden. Søkar har heller ingen avtalar med partar som vil nytta arealet til havvind eller andre sjøretta industriformål. Søkar er eit entreprenørselskap som har planar om å selja stein og pukk som byggemateriale.
I NGU sin rapport 2019.021 «Geologi for samfunnet» skriv seniorforskar Peer Rickhard Neeb dette:
«Der de naturgitte forholdene ligger til rette for etablering av store pukkverk i kystsonen av Norge og der infrastruktur, miljøkriterier, havneforhold og kvalitet er tilstede, kan nye steder for mulig fremtidig uttaksområde lokaliseres. Da kan også risikovillige norske selskaper få et realistisk fundament for langsiktig markeds- og investeringsstrategi. (…) Norge har mange interessante bergarter langs kysten for fremtidig pukkproduksjon. Økende internasjonal etterspørsel etter byggeråstoffer og skjerpede miljøkrav på kontinentet, kan gjøre Norge til en enda viktigere leverandør av byggeråstoffer til Europa fremover. (…) I flere europeiske land er det økende restriksjoner mot uttak av grus på grunn av miljøkonflikter, og i nær fremtid forventes det nye restriksjoner. Den viktigste årsaken er at mange av forsyningskildene ligger i områder med høy befolkningskonsentrasjon. Grustak og pukkverk kan være sjenerende naboskap, grunnet støy, støvutslipp og trafikk.»
Prosjektet i Lindesnes medfører fjerning av eit svaberg og hei like stort som 40 fotballbanar og vil mellom anna medføra ulemper som støy, støv og naturøydeleggingar innan 100-metersbeltet i tillegg til trafikale utfordringar, altså dei same utfordringane som gjer at fleire europeiske land har aukande restriksjonar på uttak av grus og pukk.
Prosjektet framstår dermed meir som eit mineraluttaksprosjekt som seglar under flagget «Havn og Industriområde».