Skriftlig spørsmål fra Erling Sande (Sp) til samferdselsministeren

Dokument nr. 15:2451 (2022-2023)
Innlevert: 05.06.2023
Sendt: 06.06.2023
Besvart: 13.06.2023 av samferdselsminister Jon-Ivar Nygård

Erling Sande (Sp)

Spørsmål

Erling Sande (Sp): I Prop. 118 S (2022–2023) Tilleggsløyvingar og omprioriteringar i statsbudsjettet 2023, vert det informert om at Bane NOR SF har varsla Jernbanedirektoratet om at det vil vere nødvendig å auke kostnadsramma for prosjektet Sandbukta–Moss–Sjåstad, og at ferdigstilling vil bli ytterlegare utsatt.
Kva er grunnen til at det blir ytterligare kostnadsauke og forseinkingar i prosjektet og kva vert gjort for å halde risiko og kostnadane nede?

Begrunnelse

Jernbaneprosjektet Sandbukta – Moss – Sjåstad er ein del av Intercity satsinga. Prosjektet si kostnadsramme vart etter forslag frå Solbergregjeringa auka med heile 70 % i samband med Stortinget si handsaming av Prop. 193 S (2020-2021). I 2023 kroner er kostnadsramma etter dette 19 203 mrd. kroner. BaneNor varslar no at kostnadsramma må aukast ytterlegare og at ferdigstilling av prosjektet vil bli ytterlegare utsett.

Jon-Ivar Nygård (A)

Svar

Jon-Ivar Nygård: Etter oppstart av anleggsarbeida i 2020 oppdaga Bane NOR at grunnforholda i Moss sentrum var dårlegare enn det som det tidlegare var grunn til å tru. Bane NOR har derfor sidan 2020 og fram til i dag jobba med å kartleggje omfang av behov for områdestabilisering.
Ny informasjon om og forståing av grunnforholda har undervegs avdekt store utfordringar knytt til områdestabilitet. Dette har hatt store konsekvensar for prosjektet, og har medført at omfanget har endra seg frå tidlegare berre å vera ei jernbaneutbygging, til no også å skulle redusera risikoen for kvikkleireskred i Moss sentrum. Det er anslått at meir enn to tusen personar bur i det som no er kartlagt å vera kvikkleiresona i Moss sentrum. Tryggleiken i dette området varierer, men området vil totalt sett bli sikrare etter at prosjektet har gjennomført dei planlagde områdestabiliserande tiltaka.
Forbetring av områdestabiliteten, både for å byggje jernbane og for å etablere tilfredsstillande tryggleik for bebuarane i området, medfører arbeid som ikkje opphavleg var ein del av jernbaneprosjektet, og som i ei viss grad må gjennomførast uavhengig av prosjektet. Desse arbeida er tryggingskritiske med potensielt svært store konsekvensar, noko som har lagt sterke føringar på val av løysingar og gjennomføringsmetodikk, og dermed også tidsplanar og kostnadsestimat.
Som følgje av dette har det over ein lengre periode vore stor uvisse om kostnader og varigheiter på gjennomføring av desse arbeida. Jernbanedirektoratet har løypande følgt opp Bane NOR på status i prosjektet og framdrift i arbeidet med kartlegging av grunnforholda i Moss sentrum fordi dei er ein vesentleg del av grunnlaget for å fastsetja omfang, kostnader og framdrift for prosjektet.
Bane NOR har no konkludert med eit konsept (totalløysing) for heile prosjektet, og har vedteke at dette er tilstrekkeleg modent til å fastsetja prognose for kostnader og ferdigstilling av prosjektet. Føretaket planlegg å gjennomføra ekstern kvalitetssikring hausten 2023. Direktoratet vil halda fram med å følgja opp Bane NOR i det vidare arbeidet, og vil med utgangspunkt i ekstern kvalitetssikring fremme tilråding om ny kostnadsramme til departementet. Det blir teke sikte på at ny kostnadsramme blir framlagd i samband med handsaming av Revidert nasjonalbudsjett i juni 2024. Fastsetjing av nytt tidspunkt for ferdigstilling av prosjektet vil vere omfatta av dette arbeidet. Dette vil deretter formaliserast i fastprisavtalen mellom Jernbanedirektoratet og Bane NOR.
Eg vil halde Stortinget orientert om saka, og vil omtale prosjektet Sandbukta–Moss–Såstad i Samferdselsdepartementets budsjettforslag for 2024, Prop. 1 S (2023–2024), som skal leggjast fram i oktober 2023.