Ingrid Fiskaa (SV): I sommar var me vitne til den varmaste dagen nokosinne, og fattige folk flyktar frå heimstadene sine fordi det ikkje lenger går an å leva av den uttørka jorda. Den 5. oktober møtest verdas donorland for å fylla på FNs grøne klimafond for perioden fram til 2027. Enkelte land har allereie annonsert bidraga sine for å motivera verdas rike land til å grava djupt i lommene.
Kor mykje kjem Noreg til å auka sitt bidrag til det grøne klimafondet GCF med i neste periode?
Begrunnelse
Noreg er gjennom sine mange år med høge klimagassutslepp blant dei landa som har forplikta seg til å hjelpa utviklingsland med klimatilpassing og kutt av klimagassutslepp. På klimatoppmøtet i Glasgow (COP26) i 2021 lova Noreg å bidra til å dobla klimafinansiering til utviklingsland fram mot 2026, herunder ei tredobling av støtta til klimatilpassing. Som regjeringa sjølv stadfester så er FNs grøne klimafond (GCF) ein vesentleg samarbeidspartnar for norsk multilateral klimatilpassingsfinansiering.
Den 5. oktober 2023 vert det skipa ein konferanse der donorland skal annonsera kor store bidrag dei vil løyva til det grøne klimafondet (GCF) i perioden 2024-2027. Tyskland, Canada, Østerrike, Tsjekkia og Monaco har allereie annonsert sine løyvingar for å motivera og inspirera andre rike land til å auka sine bidrag. Tyskland lovar heile 2 milliardar euro for perioden. Alle fem aukar løyvingane sine samanlikna med førre periode.