Ingrid Fiskaa (SV): Unge palestinske fotballspelarar vart nekta visum til årets Norway Cup, etter rotete og villeiande prosessar i UDI og med uklare grunngivingar.
Kan regjeringa forklara kvifor fotballjentene frå Ramallah ikkje fekk visum, og vil regjeringa ta nødvendige grep for at fotballspelarar frå Palestina får ei ryddig og føreseieleg behandling av UDI, slik at dei kan delta på Norway Cup neste år?
Begrunnelse
I Klassekampen 4. august kan me lesa historia om jentefotballaget frå Sareyyet Ramallah som ville delta i Norway Cup. Fotballturneringa i Noreg er eit lyspunkt der ungdommane ei kort stund kan kjenna seg normale og frie frå okkupasjon og kontroll.
I staden møtte dei ein byråkratisk murvegg med ei rekkje underlege grunngivingar for avslag på visumsøknaden. Årsaka til avslaget varierte frå gong til gong, og UDI gjorde og innrømte fleire feil i saksbehandlinga. Då dei norske hjelparane til laget kontakta UDI på nytt, etter å ha oppklart fleire misforståingar og feil frå styresmaktene si side, fekk dei endå ei grunngiving for avslag som ikkje var presentert i det opphavlege avslagsbrevet. Denne opplysninga kom for seint til at det var mogleg å skaffa dokumentasjonen i tide.
Fleire fotballag frå Gaza fekk heller ikkje visum i år, trass i at dei same lagleiarane har deltatt med lag i Norway Cup i meir enn 30 år.