Alfred Jens Bjørlo (V): I lys av Høgsteretts dom i den så kalla ACER-saka, vil finansministeren og partiet hans endre retorikken sin knytt til EUs tredje energimarknadspakke og ACER, og korleis påverkar dommen synet til finansministeren på Ren energimarknadspakken, også kalla fjerde energimarknadspakke?
Begrunnelse
Tysdag 31. oktober kom Høgsteretts dom i ACER-saka. Dommen kunne ikkje vore klarare. Stortinget var godt innanfor Grunnlova då Noreg slutta seg til EUs tredje energimarknadspakke og energibyrået ACER. Høgsterett konkluderer tydeleg med at overføringa av styresmakt er “lite inngripande” og stadfestar at dei “ikkje er i tvil om at styresmaktsoverføringa berre er lite inngripande.” Høgsterett konkluderer vidare med at Stortinget ikkje har noka plikt til å vurdera ei ny sak om overføring av styresmakt i samanheng med kva styresmakt som er overført vidare.
Finansministeren har tidlegare sagt: «Senterpartiet vil ta tilbake nasjonal kontroll over norsk energipolitikk» og «Avgjerder av stor betydning for norsk energipolitikk skal fattast i Noreg. Derfor seier Senterpartiet nei til ACER.» Høgsterettsdommen viser heilt tydeleg at desse påstandane ikkje er korrekte.