Skriftlig spørsmål fra Helge André Njåstad (FrP) til fiskeri- og havministeren

Dokument nr. 15:1485 (2023-2024)
Innlevert: 08.03.2024
Sendt: 08.03.2024
Besvart: 15.03.2024 av fiskeri- og havminister Cecilie Myrseth

Helge André Njåstad (FrP)

Spørsmål

Helge André Njåstad (FrP): Når vil statsråden avklare dispensasjonssakene slik at Tysnes og Austevoll igjen får stabile ferjetilbud og dei tilsette ein betre arbeidskvardag?

Begrunnelse

Eg viser til spørsmål og svar i Dokument nr. 15:1068 (2023-2024) om dispensasjon frå kviletidsbestemmelser for ferjedriften. Dette er ei sak som skaper stort engasjement i Austevoll og Tysnes som er samfunn der ferjedriften er berørt av manglande fornying av dispensasjonen. Dei som jobbar på ferjene opplever at det er tryggare med den ordninga som har vært fram til no og ein opplever 12-12 skift som meir stressende og mindre attraktivt for å kunne kombinere med familieliv. For dei reisande har situasjonen medført kanselleringer. Bladet Tysnes denne torsdagen hadde dette som tema på fem heile sider av 16 i lokalavisa. Dette viser eit enorm engasjement for å sikre at øysamfunn har tenelege kommunikasjonsløysingar. Situasjonen no er at alle skuldar på alle og dei reisande er taparane. Løysinga kan statsråden koma med å helde fram dei dispensasjonene som har vært gitt fram til no.

Cecilie Myrseth (A)

Svar

Cecilie Myrseth: Nærings- og fiskeridepartementet har fem klagesaker til handsaming knytt til direktoratets avslag på søknadar om dispensasjon frå reglane om kviletid. I tillegg er det ei klagesak som gjeld vilkår for å innvilge dispensasjon frå kviletidsreglar. Eg gjer merksam på at departementet ikkje har motteke klagesaker for dei to ferjesambanda til og frå Tysnes. Til og frå Austevoll er det to ferjesamband. For eitt av sambanda, Husavik-Sandvikvåg, har departementet motteke klage på Sjøfartsdirektoratets avslag på dispensasjonssøknad. For dette sambandet opplyser direktoratet at reiarlaget har fått innvilga ein anna dispensasjonssøknad enn kva som er påklaga til departementet, og ferja opererer i dag difor med ein dispensasjon frå kviletidsreglane.
Ved handsaming av klagesaker har vi plikt til å sjå til at sakene er så godt opplyste som mogleg før vi gjer vedtak. NHO Sjøfart, ein av arbeidsgivarorganisasjonane for reiarlag som opererer ferjer, varsla i den samanheng at dei ynskte å sende innspel til departementet knytt til klagesakene. Departementet mottok innspela i slutten av førre veke, og vi vil no prioritere å ferdighandsame klagesakene. Det er for tidleg å seie noko om vurderinga av dei konkrete klagesakene eller når svar vil føreliggje. For ein generell omtale av omsyn som gjer seg gjeldande ved vurdering av dispensasjonssøknadar, viser eg til svar mitt i Dokument nr. 15:1068 (2023-2024).
Eg gjer merksam på at ferjesamband som vanlegvis følgjer ei fast rute, men som også kan bli kalla ut til beredskapsoppdrag, til dømes til naudsituasjonar om natta, kan oppleve at den vanlege ruta blir påverka av desse oppdraga. Sjøfartsdirektoratet er ikkje involvert i å lage eller påverke slike avtaler om beredskapsoppdrag, som ofte er mellom lokale myndigheiter, helseinstitusjonar og transportørar. Når desse ferjene søker om å fråvike vanlege kviletidskrav, forventar Sjøfartsdirektoratet at det blir tatt omsyn til korleis desse beredskapsoppdraga påverkar mannskapet si planlagde kvile. Nærings- og fiskeridepartementet styrer ikkje anbodsprosessar eller kontraktar for ferjeruter, inkludert avtaler om beredskapstenester.