Skriftlig spørsmål fra Ingrid Fiskaa (SV) til samferdselsministeren

Dokument nr. 15:1662 (2023-2024)
Innlevert: 05.04.2024
Sendt: 05.04.2024
Besvart: 15.04.2024 av samferdselsminister Jon-Ivar Nygård

Ingrid Fiskaa (SV)

Spørsmål

Ingrid Fiskaa (SV): Bane NOR oppgir at målet om at 9 av 10 tog skal vera i rute er bakgrunnen for det reduserte rutetilbodet på Jærbanen og Sørlandsbanen.
Kven har bestemt at dette målet skal vera styrande, og er statsråden einig i at dette målet skal overstyra andre omsyn og mål?

Begrunnelse

Eg viser til spørsmål 15:419 om det reduserte rutetilbodet på Jærbanen i 2024. I ruteplanen for 2024 blir pendlarane nekta å bruka regiontoget (fjerntoget) mellom Bryne og Stavanger, i tillegg til at det er færre avgangar med lokaltoget. Summen av endringane har ført til fleire fulle tog og at dei reisande ikkje alltid får plass. Ruteendringane inneber også lengre reisetid fordi toga blir ståande lenger på stasjonane for å venta på møtande tog.

Arbeidet med ruteplanen for 2025 er no i gang, og dei mange reisande på Jærbanen ønskjer naturleg nok ei forbetring av rutetilbodet.

I samtalar med Bane NOR får eg opplyst at bakgrunnen for ruteendringane i 2024 er målet om at 9 av 10 tog skal vera i rute. Dette målet ser ut til å overstyra andre omsyn og mål for togtilbodet. Ut frå logikken om at minst 90% av toga skal vera punktlege, kan det gi meining å legga inn ei lengre reisetid med lange opphald på stasjonane, slik at toga får større sjanse til å halda rutetidene og statistikken ser betre ut. Resultatet er likevel eit dårlegare tilbod til passasjerane. Ei forseinking på nokre minutt samanlikna med tidtabellen er enklare å leva med enn punktlege tog med ei vesentleg auka reisetid.

I mitt førre spørsmål om saka etterlyste eg kunnskapsgrunnlaget for å nekta passasjerar å ta regiontoget (fjerntoget) mellom Bryne og Stavanger. Statsråden svarte då at «Bane NOR har erfart at både av- og påstigning ved Bryne for fjerntog tek lengre tid enn normert stasjonsopphald». Etter mi vurdering er det at Bane NOR «erfarer» noko ikkje det same som eit eksakt kunnskapsgrunnlag. Eg hadde forventa at statsråden, Jernbanedirektoratet og Bane NOR baserer avgjerdene sine på noko meir handfast og etterprøvbart. I mellomtida har pendlarforeininga gjort eigne undersøkingar og målt ståtida for regiontoget (tog 701) på Bryne og Klepp stasjonar, og utan unntak kome fram til at toget ville hatt nok tid til å ta om bord passasjerar på Bryne. Regiontoget har stor ledig kapasitet, og vil kunna letta presset på lokaltoget i morgonrushet.

Jon-Ivar Nygård (A)

Svar

Jon-Ivar Nygård: At toga kjem og går når dei skal, er eit av dei viktigaste prinsippa for Regjeringas prioriteringar innanfor jernbanesektoren. Marknadsundersøkingar viser at kor punktlege toga er vektleggast høgt når dei reisande vel transportform. I den nasjonale tidsverdistudien frå 2020 (utført av Transportøkonomisk institutt) verdsettast forseinking til å være 2,5 gonger så belastande som vanleg reisetid om bord. Dette talet er av erfaring høgare på strekningar som har hatt mykje forseinkingar, som for eksempel Sørlandsbana og Jærbana. For at tog skal vera eit interessant reisealternativ må i tillegg reisetida vera konkurransedyktig mot bil.
Noreg skillar seg ut i Europa ved at me har heile 93 pst enkeltspor. Difor tel kvart eit sekund sia me har svært mange tog som kjøyrer og som har få sted dei kan møtast. Jærbana har og ei svært høg kapasitetsutnytting, hovudsakeleg på grunn av den tette trafikken på enkeltsporet mellom Sandnes/Skeiane og Nærbø. Det gjeld spesielt i rushtid med utvida lokaltogtilbod, fjerntog og inn- og utkøyring av godstog ved Ganddal godsterminal. Det er lagt inn korte stasjonsopphald og kryssingar med små tidsmarginar i ruteplanen. Registreringar frå Bane NOR har vist at stasjonsopphalda i rushtid er lengre enn forutsett i ruteplanen, og stel dyrebare sekund, noko som skapar store utfordringar for andre tog og fører til ytterlegare forseinkingar.
I trafikkavtalen mellom Jernbanedirektoratet og Go-Ahead Norge er det fastsett mål og krav til leveransekvalitet på togtilbodet. For både lokaltog på Jærbana og fjerntog på Sørlandsbana er målsettinga at 90 prosent av toga skal vera punktlege. Statistikk frå Bane NOR viser at begge linjer i 2023 låg under dette målet, og særskilt gjeld dette Sørlandsbana som har måloppnåing på berre 65 prosent. På Jærbana var ca. 87 prosent av toga punktlege i 2023, som er det svakaste resultatet som er målt på denne strekninga. Ein lite robust ruteplan er en av fleire årsaker til at toga ikkje er punktlege, og Bane NORs simuleringar viser at justeringar i stoppmønster var heilt nødvendig i 2024 for å få toga meir punktlege.
Jernbanedirektoratet opplyser at dei reisande frå Bryne ikkje kan vera med toget som stopper på stasjonen 07:47 og kjem til Stavanger stasjon 33 minutt seinare, men lokaltoget til Stavanger stopper på Bryne stasjon kl 07.28, 07:39 og 07:57. Reisetida er 32 minutt, det vil sei omtrent det same som fjerntoget. Dei reisande frå Bryne har då eit godt togtilbod og ein vil ha betre forutsetningar for for punktelge avgangar. Når det er sagt, har Go-Ahead Norge informert om at dei vil prøve ut påstiging på Bryne stasjon frå 15. april, for å sjå korleis dette påverker kor punktlege toga er.