Skriftlig spørsmål fra Ingrid Fiskaa (SV) til forsvarsministeren

Dokument nr. 15:1771 (2023-2024)
Innlevert: 16.04.2024
Sendt: 16.04.2024
Besvart: 23.04.2024 av forsvarsminister Bjørn Arild Gram

Ingrid Fiskaa (SV)

Spørsmål

Ingrid Fiskaa (SV): Eg ber om at forsvarsministeren svarer på dei tidlegare spørsmåla mine om pågripinga av muraren Muhammad Naseem i Afghanistan 17. september 2007.

Begrunnelse

Eg viser til dei tre tidlegare spørsmåla mine knytt til den nemnte pågripinga datert 11. juni 2023 (spørsmål 2507), 18. september 2023 (spørsmål 3181) og 3. november 2023 (spørsmål 326).
22. mars i år vart forsvarssjef Eirik Kristoffersen intervjua i Dagens Næringsliv. I intervjuet opplyser forsvarssjefen at han oppga namnet Muhammad Naseem med ein gong: «Muhammad Naseem. Det skrev vi i rapportene og oppga i alt vi gjorde,» seier Kristoffersen til avisa.
Forsvarsministeren har ikkje svart på dei tidlegare spørsmåla fordi informasjonen var gradert. Eg legg til grunn at informasjonen no er avgradert og at statsråden dermed kan svara på spørsmåla mine.

Bjørn Arild Gram (Sp)

Svar

Bjørn Arild Gram: Eg viser til mine tidlegare svar på Fiskaas spørsmål. Dei rapportane som ble utarbeida i forbindelse med operasjonen vil framleis ikkje kunne bli frigitt grunna omsyn til gradering. Det har på nytt vore gjennomført ei vurdering av om noko av informasjonen knytt til den konkrete operasjonen som saka gjeld kan bli avgradert utan at dette skapar tryggingsmessige utfordringar. Eg forstår at det stilles spørsmål i denne saka, men eg ynskjer og å vera klar på at informasjon som kan synast mogleg å svara på separat kan ha betydning knytt til operasjonen som heilskap og med dette vera gradert. Blant anna er spørsmålet om nøyaktig opplysning av dato og klokkeslett for nedkoplinga frå kommunikasjons- og sambandssystem framleis knytt til andre graderte forhold ved operasjonen og kan difor ikkje svarast på.

Eg viser og til at Sivilombudet i september 2023 gav Forsvarsdepartementet medhald i klage på avslag på innsyn i Post Operations report. Sivilombudet gav blant anna medhald i at sidan skjermingsverdig informasjon utgjer den mest vesentlege delen av dokumentet vil offentleggjering av resterande informasjon verka usamanhengande og lite informativ.

I tillegg til mine tidlegare svar er følgande informasjon no avgradert frå Forsvaret som informasjonseigar og mogleg å frigje som følgje av fornya vurdering:

Fellesoperativt hovudkvarter (FOHK) vart orientert om at operasjonen var vellykka og at målet var tatt til fange i den daglege situasjonsrapporten. Omlag på same tidspunkt vart det sendt fram opplysningar om den tilfangetatte, både til FOHK og International Security Assistance Force (ISAF) kommandokjede, under dette kva for ein identitet han sjølv oppgav (Mohammed Naseem), saman med ei vurdering at hans rette identitet mest sannsynleg var målet for operasjonen. Den 19. september vart opplysningane halde oppe i ei samla oversending til FOHK, frå Task Force 51, i samband med redeployering av styrken.