Kloning av menneske er forbode ved lov 27. mars 1998 nr. 22 om
endringer i lov om medisinsk bruk av bioteknologi. Når
det gjeld andre organismar enn menneske, er kloning i seg sjølv
ikkje forbode i dagens lovverk.
I si drøfting av genteknologilova konkluderer departementet
med at ho ikkje omfattar kloning av dyr som ikkje er genmodifiserte,
og at om ho skal regulere kloning av slike dyr, må det
saklege verkeområdet til lova endrast.
Slik departementet tolkar formålet med dyrevernlova,
vil all kloning som inneber smerte, liding eller ulempe for dyret
vere forbode. Tek ein utgangspunkt i dei helsemessige følgjene
for surrogatmødrene og klonane når det vert framstilt
dyr ved kjernetransplantasjon, vil denne verksemda kunne forbydast
etter dyrevernlova utan at det krevst noka lovendring. Då det
ikkje er meldt om helseproblem ved kloning ved hjelp av embryosplitting,
gynogenese og innavl, vil ingen av desse metodane vere omfatta av dyrevernlova
i dag. Det blir understreka at utviklinga på genteknologiområdet
går fort, og at ein ikkje kan sjå bort frå at
arbeidet med å utvikle kjernetransplantasjonsteknikken
kan føre til at ein på sikt kan bruke teknikken
utan at dei involverte dyra blir påførte smerte
eller anna ulempe. Det blir uttala at om ein skulle ønskje å leggje
eit forbod mot kloning ved kjernetransplantasjon generelt til dyrevernlova,
og ikkje berre vareta dei dyrevernmessige sidene ved kloning, bør
verkeområdet til denne lova utvidast slik at ho òg
kan omfatte tilfelle der verksemda ikkje inneber smerte og ulempe
for dyra.
Komiteen vil understreka at dagens
genteknologilov omfattar alle typar organismar unntatt menneska
og regulerar genmodifisering som spesifikt fagområde. Genteknologilova
sett krav til etikk i samband med godkjenning av genteknologisk
verksemd. Vidare vil komiteen understreke at det
generelle regelverket som ivaretar dyrevernaspektet ved verksemd
med dyr, er dyrevernloven. Dyrevernloven § 5 omhandlar
genteknologiske metodar ved tradisjonelt avlsarbeid, mens lovens § 21
regulerer biologiske forsøk med dyr.
Komiteen minnar om at etter dyrevernlova § 21
kan det etter søknad gjevast godkjenning til bruk av dyr
i forsøkssamanheng. Det kan òg gjevast løyve til
bruk av dyr i utprøving og testing av farmasøytiske preparat
m.m., men løyva omfattar ikkje framstilling av produksjonsdyr
til bruk i medisinsk verksemd. Om slik verksemd inneber vesentleg
smerte for desse dyra, vil slik verksemd vere forbode etter dei
generelle forboda i lova.
Komiteen sitt fleirtal, medlemene frå Arbeidarpartiet,
Høgre, Sosialistisk Venstreparti, Kristeleg Folkeparti og
Senterpartiet, vil presisera at genteknologilova skal danna
den ytre ramma om moderne bioteknologi, der målet er å sikre
at moderne bioteknologi blir utnytta til felles beste og i pakt
med dei etiske verdiane samfunnet vårt byggjar på.
Lova omfattar ikkje teknikkar som ikkje inneber framstilling og bruk
av genmodifiserte organismar. Lova tar derimot høgd for
at nye teknikkar som blir nytta til å framstille genmodifiserte
organismar, vil vere omfatta av lova, jf. merknadane til § 4
bokstad d. Kloning ved bruk av til dømes ES-cellar og kjernetransplantasjon for å framstille
genmodifiserte dyr vil difor vere omfatta av genteknologilova.