Som bakgrunn for proposisjonen blir det peika på at
mangelen på organ til transplantasjon er eit internasjonalt
problem, og at høvet til å overføre levande biologisk
materiale frå dyr til menneske (xenotransplantasjon ) har
vore drøfta i mange land og i fleire internasjonale organisasjonar
dei seinare åra.
Det blir i proposisjonen gjort greie for tidligare politisk handsaming
av spørsmålet om xenotransplantasjon i St.meld.
nr. 25 (1992-1993) Om mennesker og bioteknologi, jf. Innst. S. nr.
214 (1992-1993), og i Ot.prp. nr. 24 (1999-200) og Ot.prp. nr. 77 (1999-2000),
jf. Innst. O. nr. 72 (2000-2001). Ved handsaminga av Ot.prp. nr.
77 (1999-2000) blei det vedteke eit mellombels forbod mot xenotransplantasjon
som skulle gjelde fram til 1. januar 2003.
I Ot.prp. nr. 52 (2001-2002) blei det gjort framlegg om å forlengje
det mellombels forbodet mot xenotransplantasjon fram til 1. januar
2005, og dette blei vedteke av Stortinget, jf. Innst. O. nr. 51
(2001-2002). Det blei i proposisjonen understreka at retningslinjer
gitt av Europarådet ville vere viktige, og at det ville
vere fornuftig å vente med ei nasjonal regulering fram
til tilrådingane frå Europarådet låg
føre. I proposisjonen la ein til grunn at utkast til retningslinjer
tidlegast kunne bli lagt fram for Ministerkomiteen i september 2002,
samtidig som ein ikkje såg bort frå at dette kunne
bli endra til mars 2003.
Det blir vist til at Xenotransplantasjonsutvalet 20. juni
2001 overleverte si innstilling i form av NOU 2001:18 Xenotransplantasjon.
Utvalet utarbeidde ikkje noko eige lovforslag, men kom med ei rad
forslag til kva ei lov måtte innehalde.
Utvalet meinte på grunnlag av ei vurdering av behov,
risiko, etikk og eit føre-var-prinsipp at xenotransplantasjon
burde kunne tillatast i Noreg frå 1. januar 2003,
så framt ein hadde utarbeidd og fått på plass
det nødvendige regelverket på dette tidspunktet.
Utvalet føreslo òg at det blei oppretta ei særskild
xenotransplantasjonsnemnd som skulle følgje utviklinga
internasjonalt og gi departementet råd i saker som gjaldt
xenotransplantasjon. Det blei føreslått at pasientar
som hadde gjennomgått xenotransplantasjon, burde innlemmast
i eit eige pasientregister (xenoregister), og at blod- og vevsprøver
burde samlast inn i ein eigen xenobiobank, slik at det kunne brukast til
retrospektiv smitteanalyse og smitteoppsporing. Utvalet meinte at
for å kunne ta imot tilbod om behandling med xenotransplantasjon,
måtte pasientane forplikte seg til å delta i livslang
oppfølging med omsyn til smitterisiko og til å vidareformidle
informasjon til nære kontaktar. Utvalet føreslo
vidare prinsipp for utveljing av pasientar og særskilde
krav til informasjon og samtykke.
Sosial- og helsedepartementet sende NOU 2001:18 på høyring
i juli 2001 og fekk inn 79 høyringsfråsegner.
Av dei 47 høyringsinstansane som tok stilling til innhaldet
i utgreiinga, støtta 38 forslaget frå utvalet.
Dei fleste høyringsinstansane var opptekne av faren for
smitteoverføring, men var samde med utvalet i at dersom
ein gjennomførte eit føre-var-prinsipp, ville
det vere forsvarleg å gradvis tillate forsøk med
xenotransplantasjon frå 1. januar 2003. Fleire
av høyringsinstansane la likevel vekt på at det
måtte innhentast meir kunnskap, og at det ville vere heilt nødvendig å få på plass
nødvendige reguleringsmekanismar før xenotransplantasjon
kunne tillatast.
Eit mindretal av høyringsinstansane meinte at det ville
vere for tidleg å tillate xenotransplantasjon i Noreg allereie
frå 1. januar 2003. Dette blei grunngitt med at
fleire område måtte utgreiast nærmare
før ein kunne regulere slik verksemd. Vidare meinte ein
at det ville vere behov for meir eksakt kunnskap om faren for smitteoverføring,
tid til å få på plass dei nødvendige
reguleringsmekanismane og tid til ein brei offentleg debatt om xenotransplantasjon.
Det blir vist til at smittevernlova og dyrnevernlova innheld
føresegner som er relevante for problemstillingar knytte
til xenotranplantasjon.
Det blir i proposisjonen gjort greie for rettstilstanden på området
i Sverige, Danmark, Storbritannia og USA.
Det blir vist til at Europarådet sitt arbeid med retningslinjer
for xenotransplantasjon blei forseinka, og at endelege retningslinjer
ikkje låg føre før 19. juni 2003.
Retningslinjene gjeld både klinisk utprøving og
behandling, og utgangspunktet er at xenotransplantasjon ikkje bør
utførast før kvart einskilt land har regulert
feltet i samsvar med det som følgjer av retningslinjene.
Retningslinjene legg opp til at reguleringa av xenotransplantasjon
må innebere omfattande kontroll-, overvakings- og tryggingstiltak
for å minimalisere risikoen for smitteoverføring
både i forhold til kvar einskild pasient og i forhold til
samfunnet. Vidare blir det tilrådd at det må stillast
strenge krav når det gjeld indikasjonane for bruk av xenotransplantasjon,
når det gjeld godkjenning av dei institusjonane som skal
kunne utføre xenotransplantasjon, og når det gjeld
oppdrett, handtering og bruk av kjeldedyr. Retningslinjene understrekar
kor viktig det er med omfattande informasjon til den som skal gjennomgå xenotransplantasjon,
og at ein lyt ha strenge samtykkereglar i samband med slik behandling.
Endeleg går det fram av retningslinjene at medlemslanda
aktivt må syte for offentleg innsyn og brei offentleg debatt
rundt grunnleggjande spørsmål knytte til xenotransplantasjon.
Det blir vist til at xenotransplantasjon også er sett på dagsordenen
i WHO, og at etikk-komiteen i Den internasjonale xenotransplantasjonsforeininga
har teke initiativ overfor WHO med tanke på å få organisasjonen
til å tilrå medlemslanda å regulere xenotransplantasjonsverksemd.
Utkastet til WHO-resolusjon kneset visse overordna prinsipp i samsvar
med retningslinjene frå Europarådet, men er mindre
detaljert og har meir preg av å vere eit overordna politikkdokument
der ein understrekar behovet for at xenotransplantasjon skjer i
samsvar med nasjonal regulering, samtidig som det blir tilrådd
internasjonalt samarbeid på feltet.
Helsedepartementet oppretta eit interimsorgan for xenotransplantasjon,
og i den første halvårsrapporten av 26. januar
2004 har interimsorganet gjort greie for utviklinga sidan NOU 2001:18
blei lagd fram. Det blir i proposisjonen gjort greie for nokre hovudpunkt
i halvårsrapporten. Interimsorganet viser mellom anna til
at resultata av ein del nyare forsøk tyder på at
risikoen for smitte frå dyr til menneske er mindre i dag
enn i 2001. Interimsorganet understrekar likevel at datagrunnlaget
er avgrensa, og at ytterlegare forsking og utprøving vil
vere nødvendig. Den prinsipielle tilrådinga frå interimsorganet
er at det i Noreg bør utarbeidast permanent lovregulering som
opnar for xenotransplantasjon på nærmare bestemte
vilkår.
Departementet meiner at det bør utarbeidast permanent
lovregulering av xenotransplantasjon i Noreg, og viser særleg
til vurderingane og tilrådingane frå interimsorganet
og til retningslinjene gitt av Europarådet.
Departementet meiner vidare at det på dette feltet må givast
rom for ein brei samfunnsdebatt om etiske problemstillingar knytte
til kryssing av artsgrenser mellom menneske og dyr, dyrevern (medrekna
genmodifisering ved framstilling av kjeldedyr), krav til samtykke,
prioritering av pasientgrupper, omsynet til dei som eventuelt får
gjennomført xenotransplantasjon, og problemstillingar knytte
til risikoen for eventuell spreiing av ukjende smittestoff frå dyr
til menneske.
Når retningslinjene gitt av Europarådet låg
føre seinare enn ein opphavleg trudde, førte det
etter departementet sitt syn til at det blei uforsvarleg kort tid til å gjennomføre
ein nødvendig offentleg debatt, samt uforsvarleg kort tid
til å utarbeide eit lovutkast for alminneleg høyring.
Departementet føreslår derfor at det mellombels
forbodet mot xenotransplantasjon blir forlengd med tre år
fram til 1. januar 2008.
Dersom det før 1. januar 2008 blir sett i gang
klinisk utprøving eller utvikla behandlingsformer i utlandet
som også norske pasientar ønskjer å ta
del i eller dra nytte av, vil departementet vurdere behovet for å gjere
særskilde unntak frå det mellombels forbodet.
Departementet ser det slik at interimsorganet framleis vil vere
eit viktig ekspertorgan i den vidare reguleringsprosessen, og ønskjer å vidareføre
denne ordninga fram til det er utarbeidd ei permanent lovregulering
av feltet.
Forslaget om å forlengje det mellombels forbodet mot
xenotransplantasjon fram til 1. januar 2008 kjem ikkje
til å få økonomiske eller administrative
konsekvensar. Utgiftene knytte til å vidareføre
Helsedepartementets interimsorgan for xenotransplantasjon blir dekte
innanfor rammene for departementet.