Meldinga viser til at Stortinget 9. juni 2004 vedtok at:
"Stortinget ber regjeringen i løpet av 2004 foreta en vurdering av hvilket tilbud incestsentrene skal gi, hvordan tilbudet skal organiseres og finansieres, og hvorvidt tilbudet skal lovfestes."
Bakgrunnen for vedtaket var forslag om tiltak for å ta vare på ofra for incest (Dokument nr. 8:31 (2003-2004)) som blei handsama i Innst. S. nr. 226 (2003-2004) frå familie-, kultur- og administrasjonskomiteen.
Frå midten av 1980-åra blei det etablert ei rekkje private, sjølvhjelpsrelaterte tiltak i regi av personar som sjølve hadde vore utsette for seksuelle overgrep. Det finst i dag 18 senter fordelt på 15 fylke.
Incestsentra er primært eit støttetilbod på dagtid for vaksne som har opplevd seksuelle overgrep, og dei pårørande til utsette barn og ungdommar. Målet er å gi råd, støtte og hjelp til brukarane, basert på prinsippet om sjølvhjelp.
Incestsentra er eit supplement til det offentlege hjelpeapparatet og skal vere eit lågterskeltilbod.
Incest-, valdtekts- og krisesenter er omfatta av ei felles statleg tilskotsordning, med øyremerkte midlar. Økonomien til sentra er basert på tilskot frå kommunar, fylkeskommunar og helseregionar, gåver frå private og organisasjonar, og dessutan statlege tilskot.
Incestutsette kan ha behov for behandling i helsestellet eller for anna hjelp frå offentlege instansar, til dømes kontakt med barnevernet, sosialtenesta, politiet eller rettsapparatet. Mange som har vore utsette for incest, kan ha behov for hjelp i samband med psykiske vanskar og rusmisbruk, og for dei kan tilknytinga til og samarbeidet med det offentlege helsetenestetilbodet vere viktig. Det er mykje som tyder på at helsetenestetilbodet til menneske som har vore utsette for incest, i dag er tilfeldig og utilstrekkeleg.
Tilgjengeleg forsking og informasjon tyder på at talet på seksuelle overgrepssaker som hjelpeapparatet og politiet registrerer, er lite i høve til den totale førekomsten av overgrep.
Incestsentra er i dag eit tilbod til incestutsette som kanskje meir enn noko anna tilbod, møter viktige behov hos brukarane. Incestsentra har eit tilbod som vanskeleg kan dekkjast av det offentlege hjelpeapparatet.
Regjeringa meiner at incestsentra har viktige og særprega tilbod som vanskeleg kan drivast som ein del av det offentlege hjelpeapparatet. Det at incestsentra i dag ser ut til å fungere godt som supplement til det offentlege tenestetilbodet, i den grad dei økonomiske føresetnadene for drifta er til stades, ligg til grunn for denne oppfatninga. Regjeringa ser likevel at det kan vere grunn til å vurdere om visse sider ved det tilbodet incestsentra gir, bør styrkjast og vidareutviklast.
Barne- og familiedepartementet har fått fleire tilbakemeldingar frå incestsenter om at økonomien er vanskeleg. Departementet har også fått Vista Utredning AS til å utarbeide to rapportar om kostnader for krisesenter og incestsenter - i 2001 og 2004. Av desse rapportane går det fram at sentra blir drivne med svært tronge budsjett og usikker finansiering, og at dei har lite høve til å drive utviklingsarbeid.
For at incestsentra skal kunne gi brukarane eit lågterskeltilbod som kan vere eit godt supplement til det offentlege hjelpeapparatet, herunder både primærhelsetenesta og spesialisthelsetenesta, er det ein grunnleggjande føresetnad at dei får betre og meir stabile rammevilkår.
Finansieringa av incestsentra bør etter Regjeringa si meining endrast dersom ein ønskjer at verksemda skal vidareførast. Regjeringa foreslår at incestsentra, på same måten som krisesentra, får ei øyremerkt statsstøtte på 80 pst. av driftskostnadene.
Regjeringa foreslår også at forvaltninga av tilskotet til incestsentra blir lagd til Bufdir. Incestsentra og krisesentra er fleire stader samlokaliserte, og begge arbeider ut frå prinsippet om sjølvhjelp, og at hjelpa skal vere frivillig. Ei forvaltning gjennom Bufdir kan gi ei heilskapleg styrking av den lokale/regionale kompetansen på valds- og traumefeltet og ei betre samhandling i høve til helseregionane. Det vil også bli teke initiativ til utarbeiding av ein plan for geografisk dekning når det gjeld incestsentra, med sikte på eit betre samla tilbod til brukarar over heile landet, også menn.
Regjeringa foreslår at ei ny finansierings- og forvaltningsordning for incestsentra trer i kraft frå 1. januar 2006.
Diskusjonen om lovregulering av incestsentra
kan delast inn i to hovudspørsmål: Det første
er spørsmålet om det offentlege skal ha ei lovpålagd
plikt til å sikre dei incestutsette eit hjelpetilbod på lågterskelnivå.
Det andre spørsmålet er om det skal stillast lovpålagde
krav til kompetanse, kvalitet og geografisk dekning.
Ei lovregulering reiser spørsmål
om kvar ansvaret for incestsentra skal forankrast. Det kan synast
meir naturleg å forankre ansvaret på regionalt
nivå eller fylkesnivå enn på kommunenivå.
Likevel meiner Regjeringa at det er naturleg og viktig at kommunane
yter økonomisk støtte til incestsentra. Regjeringa
meiner at finansieringa må sikrast ved eit samarbeid mellom
fleire instansar. Ein kan tenkje seg at kommunane fekk ei lovpålagd
plikt til å ha ansvaret for dette samarbeidet. Ei slik
lovfesting som omfattar heile kommunesektoren vil truleg ikkje vere
eit godt verkemiddel for å løyse dette problemet.
Ei slik lovfesting vil òg stå i motsetning til
arbeidet for å styrkje den kommunale handlefridomen. Meldinga
viser i denne samanhengen til tilsvarande vurdering av spørsmålet
om lovfesting av kommunane sitt ansvar for krisesentra. Regjeringa
meiner at det er meir føremålstenleg å nytte
andre verkemiddel enn lovgiving for å gi sentra meir stabile
rammevilkår.
Vanskane som incestsentra opplever, gjeld i
hovudsak økonomiske forhold. Regjeringa ønskjer
ikkje å detaljregulere forhold som kompetanse, kvalitet
og geografisk dekning. Regjeringa meiner at det er meir føremålstenleg å nytte
andre verkemiddel enn lov når det gjeld innhaldet i tilbodet.
Det er mogleg å leggje føringar for verksemda
gjennom å stille vilkår for tildeling av statstilskot
i rundskriv. Det er ofte dei lokale instansane som står
nærmast til å vurdere kva slags tilbod det er
behov for, og dette må sjåast i samanheng med
kva incestsentra som frivillige organisasjonar ønskjer
og har høve til å bidra med.
Regjeringa går inn for at ei eventuell
opplysningsplikt for incestsentra overfor barnevernet blir vurdert.
Frå neste år vil lokale krisesenterløyvingar
utløyse øyremerkte statlege tilskot på 80
pst., og krisesentra vil derfor kanskje vinne i ein konkurranse
med incestsentra om knappe kommunale midlar. Alt dette taler for
at finansieringa av incestsentra må endrast dersom ein ønskjer å halde
verksemda ved like.
Grunnen til at Barne- og familiedepartementet
har hatt det sentrale forvaltningsansvaret, er til dels at incestsenterverksemda
sprang ut av dei same røtene som krisesenterrørsla
gjorde i si tid, og tilbodet er i utgangspunktet organisert på same
måten. Statstilskotsordninga til krisetiltak har lege i
dette departementet sidan ein organiserte eit eige departement for barne-,
forbrukar-, familie- og likestillingssaker rundt 1990.
Regjeringa kan sjå gode argument for
både ei tilknyting til Helse- og omsorgsdepartementet og
at forvaltninga under Barne- og familiedepartementet held fram, men
vurderer det slik at dei viktigaste spørsmåla
no er å sikre sentra meir stabile økonomiske rammevilkår
og å styrkje fagmiljøa som arbeider med incestproblemet.
Regjeringa vil derfor byggje vidare på ei
forvaltningsløysing der Barne- og familiedepartementet
er ansvarleg departement og forvaltninga av tilskota blir lagt til
Barne-, ungdoms- og familieetaten (Bufetat)/Bufdir.
Oppgåvene knytt til krisesentra bør
liggje på same stad som forvaltninga av barnevernet og
familievernet, sidan desse tilboda er relaterte til kvarandre og
bør sjåast i samanheng. Med overføring
av oppgåvene knytte til krisesentra blir kompetansen i
direktoratet og etaten styrkt på valds- og traumefeltet,
og målet er at etaten skal opparbeide seg ein betre og
heilskapleg kompetanse på dette området.
Dette har også relevans i høve
til incestsentra. Dei samarbeider med det lokale/regionale
hjelpeapparatet, i særleg grad gjeld det helsetenesta,
til dømes når det gjeld å hjelpe incestoffer
med å få tilvising til behandling. Også barnevernet
og til dels familievernet kan i mange tilfelle vere samarbeidspartnarar.
Ei slik forvaltning vil gi grunnlag for ein nærleik til
behandlingsinstitusjonar innanfor helseregionane, som har dei same geografiske
grensene som regionane i Bufetat.
Krisesentra og incestsentra er ein del stader
samlokaliserte, somme har også fleire felles administrative
og utoverretta funksjonar. Krisesentra og incestsentra har delvis
ei felles målgruppe.
Regjeringa ser det som føremålstenleg
at Barne- og familiedepartementet framleis har det overordna ansvaret
for tilskotsordninga for incestsentra, og at forvaltninga av tilskotet
til incestsentra med tilhøyrande utviklingstiltak blir
lagt til Bufdir.
Regjeringa vil foreslå at incestsenterverksemda
frå 1. januar 2006 får ei øyremerkt statsstøtte
på 80 pst. av driftskostnadene. Det vil framleis vere det
lokale tilskotet som ligg til grunn for statstilskotet. Det krev
ein auke av løyvinga til kap. 840 post 61 på om
lag 10 mill. kroner. På same vis som for krisesentra foreslår
Barne- og familiedepartementet at ein haldar private gåver
og tilskot utanfor ved utmålinga av statstilskotet. Slike
tilskot har ofte eingongskarakter. Ved ikkje å variere statstilskotet
etter omfanget av desse, får både sentra og dei
offentlege bidragsytarane meir stabile og føreseielege økonomiske
forpliktingar og rammer.
Forvaltninga av tilskota o.a. blir lagd til
Bufdir, der dei regionale einingane får i oppgåve,
i samarbeid med helseføretaka, å sikre sin region
eit lågterskeltilbod som er tilfredsstillande for brukarane.
Ein vidarefører eit finansieringsansvar på 20
pst. lokalt/regionalt tilskot til eit balansert budsjett,
for å sikre at særleg dei store kommunane og helseføretaka
har kjennskap til og er merksame på incestproblemet og
det tilbodet sentra gir.
Det er i dag stor skilnad på omfanget
av verksemda ved dei ulike sentra.
Barne- og familiedepartementet vil ta initiativ
til ein gjennomgang og ei drøfting av samarbeid og arbeidsdeling
mellom sentra, der eksisterande senter, vertskommunar og regionar
vurderer om dei kan gi eit betre samla tilbod til brukarar over
heile landet. I denne samanhengen kan det vere aktuelt å utarbeide
ein plan for kor tilgjengelege incestsentra skal vere. Det vil vere naturleg
at dette arbeidet blir gjort i samanheng med at Bufdir i 2005 etter
planen skal utarbeide ei geografisk oversikt over kor tilgjengelege
krisesentra er, mellom anna med tanke på ei eventuell samlokalisering
med krisesentra.
Barne- og familiedepartementet vil gjennomføre
ei nærmare utgreiing om oppgåvefordelinga mellom departementet,
Bufdir og dei regionale einingane. Ikkje minst med tanke på målet
om kompetanseheving foreslår departementet at forvaltninga
av statstilskota til incestsentra o.a. blir lagd til Bufdir. Det å leggje
til rette for likeverdige tilbod utover i landet blir lettare med
ei regionalisert forvaltning.
Det er behov for å heve kompetansenivået
både i regionane, i kommunane og blant tilsette på incestsentra
når det gjeld seksuelle overgrep mot barn.
Barne- og familiedepartementet og Bufdir er
i ferd med å utvikle planar for korleis etaten skal arbeide
med saker som gjeld ulike former for overgrep og utnytting av barn,
mellom anna incestsaker. Det vil bli lagt stor vekt på samarbeid
med andre instansar og prosjekt som ligg til regionane.