Formålet med meldinga er å gje
knutepunktomgrepet eit fornya innhald ved å presisere kulturansvaret
og oppdraget som følgjer av det offentlege tilskotet til
verksemder med status som knutepunkt.
Siktemålet med meldinga er å sikre
at det vert stilt klare forventningar til verksemder med status
som knutepunkt. Departementet har på denne bakgrunnen hatt
ein gjennomgang av korleis knutepunktoppdraga skal bli gjennomførte
og vurderte.
Også innanfor det gjeldande funksjonsdelingssystemet
er det ein føresetnad for statstilskotet at institusjonar
som får fast årleg statstilskot, skal gjere greie
for oppnådde resultat. Mål- og resultatkrav blir
utforma ut frå verkeområdet og funksjonen til
institusjonane. I dag blir det i hovudsak rapportert om kvantitative
mål. Departementet ser det som viktig at det i tillegg
vert utvikla kriterium for vurdering av korleis dei kulturpolitiske
måla av meir kvalitativ art kan bli oppnådde.
Meldinga drøftar kva for kriterium
og krav som bør bli stilte til festivalar og festspel som
har status som knutepunkt, og legg fram forslag til eit justert
system for vurdering av resultat og oppnådde mål
som også inkluderer resultat av kvalitativ art.
Meldinga omhandlar vidare oppnemning av medlemmer
til styre for knutepunkta og den allmenne organisasjonsforma for
slike verksemder.
Dei fleste verksemdene som har knutepunktstatus
i dag, er festspel eller festivalar med musikk som tyngdepunkt i
programtilbodet.
Samstundes ser departementet med bakgrunn i dagens
knutepunkt at det ikkje bør gå "inflasjon" i knutepunktoppdrag.
Nye knutepunkt skal ha ei særskilt grunngjeving anten i
form av nasjonalt sjangeransvar eller regionalt breiddeansvar.
Meldinga tek ikkje stilling til kva for verksemder som
i framtida skal få knutepunktstatus eller det økonomiske
tilskotet knytt til slike oppdrag.
I St.prp. nr. 1 (1996-1997) vart det gjort greie
for tilskotsdelinga mellom staten og regionane:
"For knutepunktinstitusjonane i Sør-Noreg
har staten ansvar for 60 pst., i Nord-Noreg for 70 pst. Regionen
har ansvaret for resten av tilskotet (…)"
I proposisjonen er det gitt tilskott som knutepunkt
til tolv festivalar og festspel innanfor musikk, teater og litteratur,
ti av desse på musikkfeltet og ein for kvart av områda scenekunst
og litteratur.
Festspillene i Bergen vart stifta 6. november 1951.
Det første festspelet vart arrangert i 1953.
Festspillene i Bergen fekk knutepunktstatus
frå og med 1995.
Festspillene i Nord-Norge vart første
gang arrangert i 1965. Festspela fekk status som knutepunktinstitusjon
i 1995.
Dagens festival fører vidare tradisjonen
frå Olavsdagene som starta opp i 1962. Olavsfestdagene
blir haldne i Trondheim i juli kvart år og fekk knutepunktstatus
i 1999.
Jazzfestivalen i Molde vart arrangert for første gong
i 1961 og skal vere den eldste jazzfestivalen i Europa som har vore
i kontinuerleg drift.
Festivalen fekk knutepunktstatus i 2000.
Førde Internasjonale Folkemusikkfestival
vart arrangert første gong i 1990. Festivalen held til
i Førde i Sogn og Fjordane og er ein årleg festival i
juli månad. Festivalen fekk knutepunktstatus i 2005.
Ultima Oslo Contemporary Music Festival vart arrangert
for første gong i 1991. Festivalen blir arrangert i oktober
kvart år i Oslo. Ultima fekk knutepunktstatus i 2006.
Festspillene i Elverum vart etablert i 1973
og blir arrangert i august kvart år. Dei fekk knutepunktstatus
i 2006.
Norsk Litteraturfestival - Sigrid Undset-dagene vart
etablert i 1995. Festivalen er lokalisert til Lillehammer og fekk
status som knutepunkt frå 2006.
Notodden Blues Festival vart etablert i 1988
og blir arrangert på Notodden i august kvart år.
I august 2007 vart det gjort kjent at Notodden Blues Festival ville
bli foreslått som knutepunktinstitusjon frå 2008.
Per Gynt-stemnet går tilbake til 1928
og blir arrangert i august kvart år i friluft ved Gålåvatnet
i Oppland. Per Gynt-stemnet vil ha knutepuktstatus frå 2008.
Festivalen Mela vart etablert av Norsk kulturråd i
2000, og den første festivalen vart halden same året.
Festivalen blir no arrangert i Oslo i august kvart år med
Stiftelsen Horisont som ansvarleg arrangør. Stiftelsen
Horisont/Mela har knutepunktstatus frå 2008.
I St.prp. nr. 1 (2006-2007) er det lagt inn
midlar til ein knutepunktfestival for rock. I desember 2007 har Øyafestivalen
i Oslo fått tilbod om knutepunktstatus. Knutepunktstatusen
gjeld frå og med 2008.
Formålet med denne meldinga er å gi knutepunktomgrepet
eit fornya innhald ved å presisere det samfunnsoppdraget
og kulturansvaret som følgjer av status som knutepunkt.
Meldinga gjer også greie for eit justert opplegg for vurdering
av mål- og resultatoppnåing gjennom evaluering
kvart fjerde år.
Det er i dag stor variasjon mellom knutepunkta både
når det gjeld breidde og innretning av kunstnarleg profil,
omfang og verksemd. Departementet legg til grunn at det også vil
vere slike variasjonar i framtida.
Gjennom det justerte knutepunktomgrepet blir det
gjort greie for dei resultatkrava som ligg til grunn for det offentlege
tilskotet. Knutepunkta vil ha det til felles at dei har fått
oppgåver ut over si ordinære kunstnarlege verksemd
og lokale forankring. Innretninga på oppdraget og omfanget
vil variere avhengig av profilen til knutepunktet og ressursane.
Departementet legg særleg vekt på følgjande
kriterium som grunnlag for vurdering og evaluering av knutepunkta:
forankring til stad
festivalaktivitet kvart år
kunstnarleg leiande
koordinering og samarbeid
nasjonal og internasjonal orientering
nyskapande og utviklingsorientert
publikumsutvikling
god ressursutnytting
regional medverknad.
Med få unnatak har festivalane og knutepunkta vakse
fram over tid og med utgangspunkt i lokale tilhøve, engasjement
og behov.
Spreiinga av knutepunkt ut over landet er eit bidrag
til oppfylling av ønsket om geografisk fordeling av kulturtilbodet.
Organisasjon og anna infrastruktur er ofte bygd opp
over lang tid og representerer stor erfaring og kompetanse. Forankring
til stad og identitet er difor ein viktig føresetnad for å kunne
oppfylle krava til status som knutepunkt.
Eit knutepunkt byggjer på ein publikumsretta festival
eller eit festspel av ei viss tidsmessig lengd og eit visst omfang,
og som er ein hovudaktivitet kvart år.
Det er ein føresetnad at det er heilårleg
drift.
Eit samarbeid mellom knutepunkt, frivillig sektor
og næringslivet er ønskeleg.
Knutepunkta skal ha ein leiande posisjon innanfor
sin sjanger og hovudverkeområde. Dei skal produsere og
formidle eit kunstnarleg program på høgt nivå.
Knutepunkta skal som hovudregel ha som formål å presentere
eit kunstnarleg tilbod innanfor ein sjanger eller eit kunstuttrykk.
Ein føresetnad for statleg støtte
til kulturformål er at verksemda formidlar kunst av høg
kvalitet til så mange som mogleg.
Knutepunkta skal - som leiande innanfor sin sjanger
eller sitt verkeområde - ta eit ansvar for koordinering
og samarbeid mellom andre festivalar eller festspel innanfor same
sjanger.
Auka samarbeid vil gi regionar med knutepunkt auka
arrangørkompetanse. Det er derfor viktig at regionale styresmakter
bidreg til å leggje til rette for slikt samarbeid og følgjer
opp det ansvaret som ligg i å ha eit knutepunkt i sin region.
Knutepunkta skal vere nasjonalt og internasjonalt
orienterte innanfor sine oppdragsområde.
Det vil vere viktig å delta i internasjonale nettverk
med tanke på utveksling av erfaringar, felles produksjonar
og samarbeid om program.
Knutepunkta vil ha eit særleg ansvar
for at slikt samarbeid kjem andre nasjonale arrangørar
og verksemder til nytte.
Knutepunkta skal aktivt medverke til å fornye
og utvikle sin sjanger eller si verksemd. Dei skal vere pådrivarar
i den generelle utviklinga på kulturområdet. Det
vil bli lagt merke til om knutepunkta over tid eksperimenterer og
vel dristige kunstuttrykk i programmeringa.
Å vere innovative og utviklingsorienterte
i programvalet, i formidlinga av kunst og kultur og i arbeidet med å rekruttere
nye publikumsgrupper vil bli viktig i åra framover.
Det vil bli lagt vekt på at knutepunkta
skal medverke til nyskaping gjennom eigne idear og produksjonar.
Dette oppdraget må vere i samsvar med det ressursmessige
grunnlaget for knutepunktet.
Knutepunkta skal ha ein samla strategisk plan for
formidling av kunst til eit breitt publikum.
God ressursutnytting er ein føresetnad
for vurdering av knutepunktoppdrag. Verksemda skal vere målretta
og skal ha styringssystem som sikrar god kunstnarleg, fagleg og
publikumsmessig måloppnåing, og som gir god ressursforvalting.
Det offentlege tilskotet til knutepunkta er
eit viktig grunnlag for drifta. I tillegg bør knutepunkta utvikle
andre inntektskjelder, det vil seie eigeninntekter og støtte
frå sponsorar.
Det offentlege tilskotet til knutepunkta skal delast
mellom stat og region i forholdet 60-40 pst. med unnatak for knutepunkta
i dei tre nordligaste fylka der fordelinga mellom stat og region skal
vere 70-30 pst.
Aktiviteten til knutepunkta vil i stor grad
kome vertsregionen til gode på ulike måtar. Det
vil derfor vere eit rimeleg krav at regionen legg til rette for
gode rammevilkår for knutepunkta.
Knutepunktoppdraget medfører fast offentleg tilskot
til drift av verksemda. Knutepunkta skal årleg rapportere
til departementet om oppnådde resultat og planar for komande år.
Departementet legg vidare opp til ei systematisk evaluering og ein
dialog med knutepunkta og lokale og regionale tilskotspartar kvart
fjerde år om oppnådde resultat i perioden og føresetnadene
for vidare drift.
Dei kriteria som er omtalte ovanfor, gir innhald til
det samfunnsoppdraget og kulturansvaret som denne meldinga legg
opp til skal følgje statusen som knutepunkt. Samstundes
gir kriteria grunnlag for å vurdere korleis verksemder
tek vare på ansvaret og løyser oppdraget.
Omtalen av dagens knutepunkt viser at det er store
skilnader mellom knutepunkt. Departementet legg til grunn at det
vil vere slike variasjonar også i framtida. Knutepunkt
vil dermed ha ulike utgangspunkt og ulikt høve til å ta
hand om ansvaret og følgje opp oppgåvene som heng
saman med statusen som knutepunkt.
Det er i dag store skilnader i det statlege
tilskotet til knutepunkta. For å realisere formålet
med meldinga og kriteria som heng saman med knutepunktoppdraget,
vil departementet, på bakgrunn av vel underbygde søknader
og dokumentasjon av oppnådde resultat, kunne vurdere auka
tilskot til dei knutepunkta som har lågast tilskot i dag.
Departementet legg til grunn at dei regionale styresmaktene vil
bidra til slik auke i tilskota i tråd med fordelingsreglane
for tilskot til knutepunkt. Staten yter 60 pst. av det offentlege
tilskotet til knutepunkt og regionen 40 pst., med unnatak av knutepunkt
i Nord-Noreg der fordelinga mellom staten og regionen er 70 pst.
og 30 pst.
Departementets vurdering er at dei ni kriteria
utgjer ein samanheng og ein heilskap som bør gjelde generelt
for verksemder med knutepunktstatus.
Samstundes ser departementet med bakgrunn i dagens
knutepunkt at det ikkje bør gå "inflasjon" i knutepunktoppdrag.
Nye knutepunkt skal ha ei særskilt grunngjeving anten i
form av nasjonalt sjangeransvar eller regionalt breiddeansvar.
Dei fleste av dagens knutepunkt har som del
av sitt formål å vere kunstnarleg leiande innanfor sitt
verkeområde på nasjonalt nivå. I tillegg
til å presentere norsk kunst og kultur, er dei internasjonalt
orienterte i sitt programopplegg og tek del i nettverk med festivalar
i andre land om felles produksjonar og utveksling av utøvarar
og artistar og om kunnskap om det kunstfeltet dei opererer i. Nettverka
er viktige møteplassar for norske og utanlandske arrangørar
og utøvarar.
Nokre knutepunkt har ei breiare kunstnarleg
innretning og større vekt på det regionale og
på ein lokal identitet. Her er det vesentlege å gi
eit tilbod til publikum regionalt. Nokre kan ha begge rollene.
Knutepunkt med eit sjangeransvar skal vere leiande
og presentere eit program prega av kunstnarleg nyskaping og med
utøvarar og artistar av høg nasjonal og internasjonal
kunstnarleg standard.
At ein festival har eit særskilt sjangeransvar
er ikkje til hinder for ein breiare kunstnarleg profil. Det er også viktig
at festivalane med nasjonalt sjangeransvar er ein ressurs i regionen.
I dag har knutepunktfestivalane slik hovedprofil:
Molde International
Jazz Festival, jazz
Førde Internasjonale Folkemusikkfestival, folkemusikk
Ultima Oslo Contemporary Music Festival, samtidsmusikk
Notodden Blues Festival, blues
Festspillene i Bergen, festspel for musikk
og scenekunst
Mela-festivalen, multikulturell kunst og
kultur
Norsk Litteraturfestival - Sigrid Undset-dagene, litteratur
Olavsfestdagene i Trondheim, kyrkjemusikk m.m.
Festspillene i Nord-Norge, festspel for
musikk, scenekunst og biletkunst
Festspillene i Elverum, festspel i eit
samarbeid med "Ungdomssymfonikerne"
Per Gynt-stemnet, scenekunst m.m.
Departementet har gitt Øyafestivalen
tilbod om knutepunktstatus for rock.
Dei ulike festivalane står fritt til å bestemme
sitt eige formål og sin eigen kunstnarlege profil. Det skal
vere armlengds avstand til den frie kunstnarlege leiinga av festivalen.
Eventuelle endringar i hovudprofilen vil vere ein viktig premiss
i framtidige vurderingar av knutepunktfestivalane.
Knutepunktevalueringa skal ta utgangspunkt i dei
presiserte mål- og resultatkriteria som ligg til grunn
for statens tilskot til knutepunktet.
Det inneber vurdering av oppnådde resultat
når det gjeld dei kriteria som det er gjort greie for i pkt.
1.3.
Det inneber også måling av
kvantitative kriterium.
Departementet vil leggje knutepunkta sine eigne, årlege
rapportar til departementet til grunn for evalueringane.
Evalueringane bør gjennomførast
kvart fjerde år og på grunnlag av oppnådde
resultat sidan førre evaluering. Også for den
første evalueringa bør ein leggje til grunn eit
fireårsperspektiv.
Departementet reknar med at evaluering av oppnådde
kvalitative mål vil tilføre kunnskap om og utdjupe
forståinga av knutepunkta sine kunstnarlege resultat.
Det er viktig at opplegg og gjennomføring
av evalueringane blir gjort på ein måte som er
tilpassa det einskilde knutepunktet. Det gjeld også verksemda
sitt formål, eigenart og økonomiske ressursar.
Evalueringa skal kunne medverke til kunstnarleg så vel
som økonomisk og administrativ utvikling, og med det gjere
institusjonen betre i stand til å nå dei oppsette
måla. For at evalueringa skal bli ein læreprosess
og gi grunnlag for utvikling for dei involverte, må vurdering
av resultata og i kva grad måla er nådde, bli
lagt opp slik at knutepunkta er aktive medspelarar. Dei regionale
tilskoltspartane må også ha oppgåver
i samband med evalueringsprosessen.
Tildeling av status som knutepunkt kan bli trekt tilbake.
Ved starten av ei evaluering må det bli gjort klart for
knutepunkta at dersom dei oppsette måla gjennomgåande
berre i liten grad er oppnådde, kan dette medføre
tap av knutepunktstatus.
Verksemdene som har knutepunktstatus, jf. pkt. 1.2,
må bli gjevne rimeleg tid til å omstille seg og innrette
verksemda for å kome kriteria for det justerte knutepunktoppdraget
til møtes.
For fleire av knutepunkta vil det også vere naudsynt å styrkje
det økonomiske grunnlaget for verksemda. Det vil like vel
vere merkbare forskjellar mellom knutepunkta både når
det gjeld offentlege tilskot og det høvet dei har til å generere
eigeninntekter. Forventningane til dei ulike institusjonane vil
derfor måtte bli graderte. Dersom regionen reduserer sitt
tilskot vil statens tilskot bli redusert tilsvarande slik at fordelingsnøkkelen
60/40 mellom stat og region står ved lag.
Nye avtalar mellom staten og regionale/kommunale
styringsorgan blir inngått med ein fireårshorisont
som forpliktar staten og dei regionale tilskotspartane i perioden.
Mykje taler for at første evaluering
først bør bli gjennomført to år
etter at reviderte krav er fastsette.
Det er i dag ein føresetnad for det
statlege tilskotet til knutepunkta at staten får oppnemne styreleiar
og eitt styremedlem med vararepresentantar.
Departementet vil understreke det viktige ved
at knutepunkta har kompetente og velfungerande styre. Det er vanskeleg å få eit
styre med for mange medlemer til å fungere godt. Offentlege styresmakter
bør leggje seg dette på sinnet og medverke til
at styra blir funksjonsdyktige.
Departementet ser ikkje oppnemning av styremedlem
som ein styringsreiskap, men som eit bidrag til å sikre
at knutepunkta får kompetente styre som kan sjå til
at forvaltinga av verksemda følgjer lover og reglar og
at knutepunkta lever opp til dei føresetnadene som staten
har sett for tilskotet.
Med referanse til St.meld. nr. 12 (2006-2007) Regionale
fortrinn - regional framtid, og Stortinget si handsaming av meldinga,
jf. Innst. S. nr. 166 (2006-2007), gjer departementet framlegg om
at regionane skal ha større ansvar for oppnemning av styreleiarar
og stymemedlemer til region-/landsdelsinstitusjonar og
knutepunkt frå 2010. Hovudregelen skal vere at det nye
regionale forvaltingsnivået har ansvar for å nemne
opp styreleiar og eventuelt nokre av eller alle styremedlemene,
men at regjeringa i særskilde høve kan vike frå denne
regelen.
Medan ein ventar på at dette blir gjennomført,
vil departementet gå inn for at staten nemner opp eitt
styremedlem med varamedlem til styre for knutepunkta.
Staten vil konsentrere si styring av knutepunkta gjennom
føresetnadene for statstilskotet til desse verksemdene.
Departementet vil like vel understreke det viktige i at det ved
styreoppnemning blir lagt stor vekt på å oppnemne
kompetente styre slik at styret som kollegium har brei kompetanse,
både når det gjeld verksemda sine faglege oppgåver
og dei økonomiske og administrative oppgåvene.
Dagens knutepunkt er i hovudsak organiserte som
stiftingar. Denne organisasjonsforma har ein funne tenleg som rettsleg
ramme for samarbeidsprosjekt innanfor kulturforvaltinga.
Departementet legg til grunn at stifting framleis skal
vere den vanlege organisasjonsforma for eit knutepunkt. Ein vil
like vel ikkje sjå bort frå at andre organisasjonsformer
kan bli vurderte i særskilde tilfelle.
Det er under alle omstende ein føresetnad
at verksemda er organisert slik at det er mogleg å kontrollere
at tilskotet blir brukt i samsvar med formålet.
Det er styret og den administrative leiinga
som har ansvaret for at forvaltinga av verksemdene til ei kvar tid
skjer i samsvar med gjeldande lover og forskrifter.
Styret har ei særskild plikt til å passe
på at knutepunkta har gode og kvalitetssikra rutinar for å utarbeide
budsjett og andre planverkty og at rekneskap og forvalting av formue
blir underlagt gode kontrollrutinar. Den interne kontrollen kan ikkje
bli erstatta av den revisjonen som blir utført av ekstern
revisor.
Styret må m.a. sørgje for
at verksemda etablerer, held ved like og etterlever system for god
forvalting og kontroll av økonomien slik at det til ei kvar
tid er full oversikt over den økonomiske situasjonen.
Vidare har styret ei særskild plikt
til å sjå til at verksemda blir drive i samsvar
med statens føresetnader i tilskotsbrevet.
Departementet vil ta initiativ til å følgje
opp meldinga overfor dei enkelte knutepunkta og dei regionale og
lokale tilskotspartane på bakgrunn av Stortingets handsaming
av forslaget.
Det vil bli lagt opp til evaluering av kvar
institusjon kvart fjerde år, og på ein slik måte
at det årleg blir gjennomført vurdering av nokre
av knutepunkta.