Syver Berge (Sp):
Eg stiller følgjande
spørsmål til samferdselsministeren:
Jordfondet vart styrkt for å løyse
rasjonaliseringstiltak, makeskifte, i samband med flyplassutbygginga på
Gardermoen. Eigedomen Herstua, gnr. 144 bnr. 3, i Nannestad er innløyst med
middel frå Jordfondet.
Kva framdrift har Luftfartsverket når
det gjeld å starte makeskifte for å løyse grunneigarspørsmål i samband med
flyplassutbygginga?
Statsråd Kjell Opseth:
Det er ikkje
rett at Jordfondet er spesielt styrkt for å løyse rasjonaliseringstiltak,
makeskifte, i samband med flyplassutbygginga på Gardermoen.
Landbruksdepartementet har likevel gjeve fylkesmannen i Akershus si
landbruksavdeling fullmakt til å disponere/forskottere ein øyremerkt sum frå
fondet til dette føremålet.
Luftfartsverket vil prøve å etterkome
grunneigarane sine ynske om å nytte makeskifte som erstatningsform i samband
med flyplassutbygginga på Gardermoen. Føresetnadene er likevel at denne
ordninga ikkje fører med seg auka kostnader eller forseinkar
flyplassutbygginga.
Makeskifte går inn som ein del av
forhandlingane med eigarane av landbrukseigedom. Desse forhandlingane er
starta, men har til no ikkje vorte retta mot den einskilde eigedomen.
Årsaka er at det til no har vore arbeidd med å skaffe makeskifteareal og å
få oversikt over det samla behovet for slike.
Forhandlingane med eigarane av
landbrukseigedom vil bli intensiverte utover våren og sommaren med sikte på
fullføring i løpet av hausten i år.
Syver Berge (Sp):
Eg takkar for
svaret, som ikkje gav direkte svar på det eg spurde om. Grunnen til at eg
stiller dette spørsmålet, er at grunneigarane som er ramma ved
Gardermoen-utbygginga, føler stor uvisse, og særleg dei som mister heile
eigedomen sin. Kva vil skje framover? Det er lagt til rette for makeskifte,
og det er rett at det i brev frå Landbruksdepartementet til alle
landbruksavdelingar og fylkesmannsembete datofesta 7. september 1993 vart
gjort klart at for å løyse rasjonaliseringstiltak i samband med
Gardermoen-utbygginga har departementet bestemt at Akershus skal
prioriterast når det gjeld jordfondmidlar.
Det grunneigarane er redde for, er at
ein no ikkje følgjer opp frå staten si side. Ein kjem i tidsnaud, og
resultatet blir ei utløysing av eigedomar i reine skillingskrav. Meiner
statsråden det er ugrunna frykt frå grunneigarane for at det frå
Luftfartsverket blir spekulert i eit taktisk opplegg der ein kjem i
tidsnaud?
Statsråd Kjell Opseth:
Eg kan forsikre
representanten Syver Berge om at det ikkje er nokon spekulasjonar frå
Luftfartsverket i å forseinke dette arbeidet for å løyse grunneigarane ut
med reine kroner.
Luftfartsverket går til liks med
departementet og tydelegvis Syver Berge inn for at vi skal få til eit
makeskifte, men vi er i prosessen, slik at det ikkje er blitt reelle
forhandlingar, og det er eit problem å skaffe areal som ein kan tilby i eit
slikt makeskifte.
Syver Berge (Sp):
Eg takkar for
positivt svar frå statsråden.
Staten har ein del eigedomar i
området. Det er frå landbruksavdelingar hos fylkesmennene i Oslo og
Akershus vorte anbefalt makeskifte med arealet til Ullensakers kapellangard,
som er på ca. 1400 daa. Dette er areal som i hovudsak vil dekkje det
behovet det er for areal til makeskifte i samband med Gardermoen-utbygginga.
Kva vil bli gjort frå statsråden si
side for å få i gang forhandlingar med tanke på å få løyst jordspørsmålet
der staten sine areal blir trekte inn i makeskiftet? Arealet er der dersom
staten går inn med sine areal, som i dette høvet skulle vere ein sjølvsagd
ting.
Statsråd Kjell Opseth:
Der er ein
dialog mellom Samferdselsdepartementet og Kultur- og vitenskapsdepartementet
om å nytte den nemnde prestegardsjorda som eit objekt i makeskifte med dei
grunneigarane som no må utløysast.