Erling Folkvord (RV):
Eg må først få
seie meg lei for at det er nødvendig enda ein gong å reise spørsmål til
utdanningsministeren for å bidra til å sikre anstendige forhold for
6-åringane i skolen til hausten:
Statsråden har sagt han legg til grunn
at kommunane skaffar « tenlege lokalitetar » til skolestart for 6-åringane.
Skolesjefen i Oslo opplyser at skolane generelt må rekne med å « motta flere
klasser enn det er klasserom til ». Likevel vart 22 av grunnskolane plassert
i kategorien « vil ikke kunne ta imot forventet elev- og klassetall innenfor
eksisterende skoleanlegg » sjølv om alle tilgjengelege rom blir omdefinert og
brukt som klasserom.
Kva vil statsråden gjere med denne
situasjonen?
Statsråd Reidar Sandal:
Både i
spørjetimen den 24. januar og den 21. februar i år blei det spurt om
førebuinga av grunnskulereforma i Oslo kommune.
Etter grunnskulelova § 10 har
kommunane ansvar for å « syte for tenlege skolar ». Eg sa i svara mine at eg
ikkje sit inne med informasjon som dokumenterer at 6-åringane i Oslo vil
møte pedagogisk uforsvarlege forhold hausten 1997. Eg peikte også på at eg
føreset at alle kommunar følgjer det vedtaket som er gjort om innføring av
tiårig grunnskule frå hausten 1997, og at dei tek konsekvensen av dette ved
å planleggje og gjennomføre nødvendig kapasitetsutviding i 1996 og 1997.
Dei vedtaka Stortinget gjorde i
samband med St.prp.nr.39 (1995-1996) Om investeringskostnadene ved
grunnskolereformen og St.prp.nr.55 (1995-1996) Om kommuneøkonomien 1997
m.v., er følgde opp i statsbudsjettet for 1997. Det er lagt til grunn ein
differensiert kvadratermeterpris, og kommunar i pressområde, blant desse
Oslo, har fått auka sin kvadratmeterpris ytterlegare. Arealnorma er utvida
for klassar med 22 eller fleire elevar. Den økonomiske kompensasjonen til
den einskilde kommune til drift og investeringar er kommunane gjord kjende
med i eit eige brev.
Kompensasjonen frå staten til
kommunane for dei sentrale elementa i reforma er med dette i hovudsak lagd
fram. Kommunane har ansvaret for å følgje opp dei vedtaka Stortinget har
fatta. Dei har også ansvaret for at skulelokala er tenlege. Departementet
vil sjå til at kommunane sørgjer for dette. Eg viser i den samanhengen til
omtala i statsbudsjettet for 1997, der det heiter:
Departementet
vil gjennom statens utdanningskontorer følge opp framdriften i tilretteleggingen
av skolelokaler til seksåringene i kommunene.
Erling Folkvord (RV):
Med all respekt
var ikkje det svaret mye å takke for. Statsråden kan sikkert stikke hovudet
i sanden i lang tid og med mye større hell enn tidlegare statsråd Rød-Larsen
gjorde. Men 6-åringane har ikkje den moglegheita. Det blir ei kolossal
såkalla « effektivisering » og forverring av kvaliteten i Oslo-skolen. Frå
hausten skal alle 6-åringsklassane, 7-åringsklassane og 8. klassetrinn
fyllast opp til maksimum klassetal i Oslo. For å få til det må mange elevar
flyttast til andre skolar enn skolen i nærmiljøet. Eit par eksempel: For at
klassane skal fyllast opp til 28 elevar på barnetrinnet har Grorud skole og
Tonsenhagen skole i Groruddalen fått klar beskjed om at dei ikkje får
opprette klassar for alle elevane som er innskrivne ved desse skolane frå
hausten. Elevane må sendast eller fraktast ut frå det bustadområdet dei har
tilknyting til!
Eg vil spørje statsråden: Kva vil han
gjere for å unngå at reforma, som han kallar det, skal føre til klare
forverringar i barnas situasjon frå hausten av?
Statsråd Reidar Sandal:
Eg vil streke
under det som var hovudbodskapen min i svaret, nemleg at det er kommunane
som har ansvaret for å skaffe nødvendige og tenlege lokale for undervisninga
i grunnskulen.
Eg har òg lyst til å streke under at
eg er kjend med at byrådsavdelinga for barn og utdanning i Oslo kommune har
utarbeidd ein statusrapport til bystyret i Oslo om investeringar og drift i
samband med grunnskulereforma. Statusrapporten blei behandla av byrådet,
den 13. september etter det eg har fått opplyst, og deretter send over til
bystyret. Rapporten blei behandla i bystyret den 23. oktober, og bystyret
har teke statusrapporten til orientering.
Eg peikar på desse forholda for å
streke under at saka er kjend, og at bystyret har teke den oversikta som er
lagd fram, til etterretning.
Erling Folkvord (RV):
Eg blir opprørt
over at ein statsråd kan snakke så ansvarslaust om barna si framtid. Eg
tillèt meg tre-fire eksempel frå skolesjefen i Oslo sin konsekvensanalyse:
Kapasiteten
for spesialklasser vil ikke bli tilstrekkelig.
For det andre: Neste års
budsjettforslag frå byrådet dekkjer berre halvparten av utgifter til nye
lærebøker for andre, femte og åttande klassetrinn. Mankoen når det gjeld
skolebøker, er 1 400 kr pr. elev i neste skoleår.
For det tredje:
Byrådets
forslag til budsjett 1997 medfører at det ikke blir mulig å gjennomføre brannsikringen
av grunnskolene i Oslo innenfor den aller siste fristen som er satt i forskrift
om brannforebyggende tiltak og brannsyn.
For det fjerde:
Med
byrådets foreslåtte investeringsramme vil det være langt igjen til intensjonen
som er forutsatt i Reform 97 og grunnskolelovens krav om tilpasset opplæring,
kan nås.
Ser ikkje statsråden at han, dersom
han skal vere ansvarleg overfor barna - og det er det skolestatsråden skal
vere - nå må skjere gjennom og be Oslo kommune utsette Reform 97?
Statsråd Reidar Sandal:
Eg konstaterer
at representanten Folkvord gjekk frå å stille spørsmål om forhold i
Oslo-skulen til no å gjenreise eit spørsmål som det blei votert over i denne
salen i byrjinga av førre veke, då budsjettforslaget frå Kyrkje-,
utdannings- og forskingsdepartementet var til debatt. Då var det eit veldig
lite mindretal i denne salen, faktisk berre RV og
framstegspartirepresentantar, så vidt eg hugsar, som stemte for at
grunnskulereforma ikkje skal setjast i verk frå neste skuleår, slik som
føresett. Eg har ingen nye signal å gje i den samanhengen; reforma skal
gjennomførast slik Stortinget har fatta vedtak om, og det er òg Oslo kommune
forplikta av. Det gjeld òg det ansvaret kommunen har for lokale.