Erling Folkvord (RV):
Eg skal få lov
til å stille eit spørsmål til utdanningsministeren om det politiske
spørsmålet som opptar dei fleste foreldre i Oslo for tida:
27. november sa statsråden han « vil sjå
til at kommunane sørger for at skulelokala er tenlege ». I statusrapporten
for Reform 97 og i skolebehovsplanene har Oslo sett bort fra at
spesialundervisning og tilrettelagt undervisning for språklige minoriteter
trenger klasserom. Dette er ca 40 klasser for grupper som i særlig grad
trenger ro og faste rammer rundt undervisninga.
Mener statsråden at « skulelokala er
tenlege » når disse klassene ikke får eget klasserom med tilfredsstillende
arbeidsforhold?
Statsråd Reidar Sandal:
Representanten
Erling Folkvord viser til at det i skulebehovsplanane for Oslo ikkje er
rekna med behov for klasserom til spesialundervisning og tilrettelagd
opplæring for elevar frå språklege minoritetar.
Staten har no lagt til rette for at
kommunane skal kunne setje i verk grunnskulereforma i samsvar med
intensjonane. Dei nødvendige lovendringane er vedtatt, og dei vedtaka
Stortinget gjorde i samband med St.prp.nr.39 (1995-1996) Om
investeringskostnadene ved grunnskolereformen og St.prp.nr.55 (1995-1996) Om
kommuneøkonomien 1997 m.v., er følgde opp i statsbudsjettet for 1997.
Kommunane har ansvaret for å følgje
opp dei vedtaka som Stortinget har fatta i samband med innføring av tiårig
grunnskule frå hausten 1997. Eg føreset at kommunane planlegg for og
gjennomfører nødvendig kapasitetsutviding i 1996 og 1997. Departementet vil
sjå til at kommunane syter for dette. Eg viser i den samanhengen til
omtalen i statsbudsjettet for 1997, der det heiter:
Departementet
vil gjennom statens utdanningskontorer følge opp framdriften i tilretteleggingen
av skolelokaler til seksåringene i kommunene.
I statsbudsjettet for 1997 heiter det
også:
Departementet
vil (...) gjennom statens utdanningskontorer intensivere kontrollen med grunnskoleloven
§ 10, som pålegger kommunene « å syte for tenlege skolar ». På denne måten
vil departementet sikre at skolearealenes størrelse og standard er tilfredsstillende
Eg sit ikkje inne med informasjon som
dokumenterer at elevane i Oslo-skulen vil møte uforsvarlege forhold hausten
1997. Eg vil likevel streke under at Statens utdanningskontor i Oslo og
Akershus vil følgje gjennomføringa av reforma i Oslo nøye.
Erling Folkvord (RV):
Når statsråden
ikkje sit inne med sånn informasjon, tyder det på at han er sterkt syns- og
hørselshemma, og at han ikkje les posten sin. I Redaksjon 21 i går sa
statsråden at Noreg må gjennomføre skulestart for 6-åringar neste år fordi
det gir « betre tilpassa undervisning for alle elevar ». Mitt spørsmål galdt
fem kategoriar elevar; mottaksklassene, alfabetiseringsgruppene, elevar med
lese- og skrivevanskar, elevar med åtferdsvanskar og elevar med generelle
lærevanskar. Ro, tryggleik og faste rammer rundt dei er ein føresetnad som
må oppfyllast først for desse elevane. Det er meiningslaust å snakke om
tilpassa undervisning, som statsråden gjorde på TV i går, når skuledagen
først må starte med å finne eit rom eller ein trappeoppgang der dei kan vere
den første timen. Dei 40 gruppene har eige rom i år, ikkje neste år.
Spørsmålet er: Vil statsråden ta eit initiativ overfor Oslo kommune for å
sikre at kvar av dei gruppene får eige fast klasserom også neste haust?
Statsråd Reidar Sandal:
Eg trudde
meininga med spørjetimen i Stortinget var å stille spørsmål til medlemer av
Regjeringa og få svar, ikkje at ein representant skulle bruke si tilmålte
tid til usaklege og urimelege karakteristikkar.
Så til det prinsipielle. Eg står fast
ved dei synspunkta som eg har hatt i denne saka, både i Stortinget og i
fjernsynsprogrammet i går. Det prinsipielle her er at Stortinget etter
forslag frå Regjeringa no har vedtatt rammevilkåra for gjennomføring av
grunnskulereforma, og i neste fase er det kommunane si oppgåve å setje denne
reforma i verk. Når det gjeld å utøve legalitetskontrollen i
utdanningsspørsmål på vegner av staten, har vi eit eige organ til å gjere
denne oppgåva, nemleg utdanningskontora. Det har eg både tidlegare og i dag
gjort greie for i svar til representanten Folkvord.
Erling Folkvord (RV):
Eg trudde også
at meininga med spørjetimen var at det skal vere mogleg å få svar frå ein
statsråd. Det er jo greitt å høyre at han står fast på synspunkta, han står
tydeleg heilt fast så han ikkje får rørt seg eller får gjort noko.
Spørsmålet er om han vil gjere noko. Eg blir skremt av å høyre på eit sånt
kynisk maktspråk. Det er nesten som å høyre på ein talemaskin.
Blant dei elevane som har store
åtferdsvanskar i Oslo-skulen, finn vi mange som står i fare for å utvikle
seg til kriminelle eller overgriparar dersom dei ikkje får tilpassa
undervisning. Faren aukar dersom dei ikkje får den undervisninga. Men eg
trur ikkje nokon av dei vil kome til å gjere seg skuldig i så brutale
overgrep som det ser ut for meg at statsråden no vil administrere mot dei 40
gruppene med Oslo-born som det er snakk om, og som står i fare for å miste
eige klasserom. Spørsmålet er: Kvifor er ikkje statsråden villig til å
innleie noko slags samråd med foreldre og lærarar? Kvifor stolar han berre
på det han får pr. papir frå byråden i Oslo?
Statsråd Reidar Sandal:
Nasjonalforsamlinga har gjort vedtaket sitt, og oppgåva med iverksetjing er
kommunal. Eg har lytta til mange synspunkt, både frå foreldre og andre,
også til dei politiske styresmaktene i Oslo. Den byråden som har ansvaret
for det området som vi her snakkar om, har uttalt at elevane skal få eit
forsvarleg tilbod i samsvar med dei reglane som gjeld, inkludert dei
forholda som representanten Folkvord har tatt opp. Det er eit synspunkt som
eg har tillit til, og som eg på ingen måte vil vere med på å harselere over,
slik som andre gjer.
Eg har elles lyst til å gjere merksam
på at representanten Folkvord fleire gonger har stilt spørsmål i spørjetimen
om detaljerte kommunale oppgåver på dette feltet - to gonger i vårsesjonen
og faktisk òg førre onsdag.