Laila Kaland (A):
Eg vil stille
følgjande spørsmål til utdanningsministeren:
I Møre og Romsdal er det eit stort
behov for arbeidstakarar i møbel-, fiske-, fangst- og
skipsbyggingsindustrien. Frå inntaksnemnda i fylket viser det seg at
søknaden til desse linjene i den vidaregåande skulen er faretruande lav.
Dette er ei uheldig utvikling for næringslivet i mange distrikt.
Kva initiativ vil statsråden ta for at
ungdomen vil meine at desse linjene er attraktive og dermed søkje på desse
fagområda?
Statsråd Jon Lilletun:
Eg registrerer
at det dessverre er einskilde fag som ikkje er så populære mellom ungdom som
andre fag. Ein del av dei faga som representanten Kaland viser til, høyrer
til desse.
Fiskeindustrien langs kysten av Møre
og heilt nord til Finnmark har i fleire år hatt vanskar med å rekruttere
ungdom. Skipsindustrien langs kysten sørover til Rogaland har òg hatt
rekrutteringsvanskar dei seinare åra.
Eg er kjend med at det er i gang
tiltak i Møre og Romsdal fylkeskommune for å betre tilhøva. Dette er bra.
Mellom anna er det sett i gang eit prosjekt for å betre samsvaret mellom
utdanningstilbodet i den vidaregåande skulen, ungdom og vaksne sine
utdanningsval og arbeidslivet sine behov for arbeidskraft. Målsetjinga er
m.a å gje ungdom eit realistisk grunnlag å velje utdanning på. Men det
handlar like mykje om å gjere dei unge kjende med kva fylke og region dei
veks opp i, og å synleggjere mangfaldet i næringslivet.
Det er i dag i fleire bransjar kamp om
ungdomen. Dei som i første rekkje kan gjere noko med rekrutteringsproblema,
er bransjane sjølve. Det er dei som gjennom ulike påverknads- og
informasjonstiltak overfor ungdomane må fokusere på dei positive og
interessante sidene ved desse faga. Ein slik påverknad bør starte alt i
ungdomsskulen.
Som lekk i arbeidet med å bevisstgjere
og påverke ungdomen i yrkesvala deira er det m.a sett i gang arbeid med å
utvikle ein database for å betre yrkes- og utdanningsrettleiinga. I denne
basen vil det m.a vere oversyn over bedrifter i ulike bransjar og talet på
læreplassar desse har til rådvelde. Det er vidare utarbeidd generelt
rettleiingsmateriell for skulen der bevisstgjering og kunnskap om
utdanningsvegar og arbeidsmarknad står sentralt.
Eg veit at skipsindustrien på søre
Sunnmøre har sett i verk tiltak allereie i barnehagen for å gjere barna
kjende med skipsindustrien i nærmiljøet. Så det er aldri for tidleg å
starte med yrkes- og utdanningsrettleiing. Det er også sett i gang eit
forskingsprosjekt for å undersøkje på kva vilkår ungdomen vel yrke, og kva
haldningar dei har til skipsindustrien. Dersom slike tiltak vert sette i
samanheng og forankra lokalt, er det etter mitt syn vegen å gå for å betre
rekrutteringa på sikt. Vi vil samordne gode tiltak frå heile landet og
gjere dei kjende over heile landet, men det er nok i lokalmiljøet største
innsatsen kan gjerast akkurat i høve til dette.
Laila Kaland (A):
Eg vil takke
statsråden for svaret, som eg synest var positivt.
Statsråden peika på ein del av dei
problema som vi står overfor, ikkje berre i vårt fylke, men også langs heile
kysten. Eg er klar over at det er sett i gang tiltak både i fylkeskommunen
og i næringslivet i Møre og Romsdal, og at dei jobbar med denne
problemstillinga. Det som likevel uroar meg, er at rekrutteringa ikkje
berre i år, men i fleire år har vore låg. I mitt fylke, som eg kjenner best
til, utgjer dei næringane som vi her snakkar om, sjølve livsgrunnlaget i
distriktet. Dersom vi ikkje får nyrekruttering av ungdom som vil søkje seg
til desse klassane, kan ein få ei større fråflytting av ungdom. Noko som
statsråden også peika på, var at det må til ei haldningsendring, og eg trur,
som også statsråden seier, at ungdomsskulemiljøa har ei stor oppgåve, ikkje
minst rådgjevartenesta. Så eg vil be statsråden sjå på om den kan
ytterlegare styrkjast, ikkje minst når det gjeld informasjon overfor
jentene, som det er viktig å få inn i desse næringane.
Statsråd Jon Lilletun:
Det er heilt
rett som representanten Kaland seier, at rådgjevingstenesta er heilt
sentral. Det er opplagt at god informasjon til ungdomen og at dei har
kjennskap til næringslivet, er grunnleggjande. Eg trur at vi slit lite
grann fordi nesten alle som har funksjonar i utdanningssystemet vårt, har
akademisk bakgrunn. Ikkje for å seie noko galt om akademikarane - dei treng
vi - men eg trur at det at dei på ein måte kjenner den sida best, gjer at
kvaliteten på rådgjevinga ikkje vert god nok, og at dei manglar inspirasjon
og interesse for rådgjeving i forhold til det som representanten Kaland er
oppteken av. Eg trur òg at det at vi får breiare rekruttering, vil vere ein
viktig basis for dette. Vi skal gjere det vi kan for at rådgjevingstenesta
skal verte så god som mogleg.
Laila Kaland (A):
Berre eit
tilleggsspørsmål til statsråden som eg vil be han om å vurdere nøye. Dersom
det er slik at ein del av desse klassane står i fare for å bli nedlagde i
dei ulike fylka, har eg lyst til å be statsråden sjå på dette i samband med
Noregsnettet for høgare utdanning, der ein iallfall har ein del av desse
fagklassane rundt om i landet, at ein iallfall har ein samanheng slik at
dette ikkje blir nedbygt i alle fylka, men at ein også har eit noregsnett
når det gjeld tilbodet til dei som vil ta denne viktige utdanninga.
Statsråd Jon Lilletun:
Me står her i
eit brytingspunkt mellom det fylkeskommunale sjølvstyret og eit nasjonalt
overordna behov. Eg trur ikkje at me frå statens side skal overstyre
fylkeskommunane i forhold til dette, men eg trur det me har gjort ved å
opprette ein del landslinjer for ein del fag, er viktig, og eg trur òg det
frivillige samarbeidet som er oppretta mellom fylkeskommunane i forhold til
enkelte linjer ein ikkje opprettar sjølv, men der ein kjøper plassar i
nabofylka, er viktig. Departementet vil medverke til at ein har eit samla
oversyn over kva som finst, slik at ein ikkje legg ned det som er dårleg
søkt i alle fylke, men at nokon kan ta vare på det i dette samarbeidet som
ein har. Me har kome eit godt stykke med Reform 94, men me har òg eit godt
stykke veg å gå enno.