Presidenten: Dette spørsmålet, fra representanten Bjørn
Jacobsen til utenriksministeren, er overført til miljøvernministeren
som rette vedkommende.
Bjørn Jacobsen (SV) [13:21:02]: Eg tillet meg å stille spørsmål
til miljøvernministeren:
«Det er industrilanda som har stått
for dei største utsleppa av klimagassar. Likevel
blir heile verda ramma av klimaendringane, men innbyggjarane i land
i sør har færre moglegheiter til å komme
seg vekk frå problema. 160 000 menneske dør kvart år
som ei følgje av klimaendringar, dei fleste i fattige land.
Tanzania har sagt at klimaendringar er ei større utfordring
enn terror.
I kor stor grad er Noregs klimapolitikk prega
av å sikre land i sør sine
moglegheiter til å utvikle seg?»
Statsråd Knut Arild
Hareide [13:21:43]: Lat meg først stadfesta at det er
industrilanda som historisk har stått for dei største
utsleppa av klimagassar. Det gjer dei enno, men utviklingslanda
vil samla, i kraft av auken i folketalet og den økonomiske
utviklinga, om nokre tiår stå for meir
enn halvparten av dei globale utsleppa. Industrilanda si erkjenning
av hovudansvaret kom bl.a. til uttrykk gjennom framforhandlinga
av Kyotoprotokollen – som trer i kraft i dag. Her er det
berre industriland som tek på seg bindande forpliktingar
om å redusera utslepp. I lys av den utviklinga som er venta,
er det likevel naudsynt at særleg u-landa med
størst utslepp tek del i den globale innsatsen for å redusera
desse.
Det er òg rett at dei fattigaste landa
vil ha større problem med å tilpassa
seg klimaendringane enn dei rikare landa. Dette blir i stadig aukande
grad erkjent av det internasjonale samfunnet. Det blei allereie
i 2001 oppretta to nye klimafond for utviklingsland med hovudvekt
på tilpassing. Eit tredje tilpassingsfond vil
bli sett i verk med midlar frå ei avgift på prosjekt
under Kyotoprotokollen sin grøne utviklingsmekanisme. Den
globale miljøfasiliteten, GEF, har òg eit eige
program for tilpassing. Klimakonvensjonen sitt siste partsmøte
i desember i fjor vedtok eit omfattande arbeidsprogram kva gjeld
tilpassing til klimaendringar.
Noreg er blant dei landa som med
omsyn til folketalet gir mest støtte til u-landa òg
på dette feltet. Me freistar å gjera dette på ulike
vis. I tillegg til støtte til forsking og utgreiing
på området har Noreg gitt monalege bidrag
til dei to nye fonda eg nemnde, og me har i alle år vore
ein solid bidragsytar til GEF. Til dømes auka
det norske budsjettet for stønad til klimatiltak
i utviklingsland med 30 mill. kr i 2005. Vi ser på samordna
internasjonal innsats gjennom kanalar av denne typen som mest høveleg
i denne samanhengen. På den bilaterale sida er
det ikkje fullt så lett, da dei fleste utviklingslanda
som Noreg samarbeider direkte med, enno ikkje
gir topp prioritet til slik tilpassing. Vår bilaterale
politikk for utvikling byggjer som kjent på prinsippet
om at det er mottakarlandet sine prioriteringar som skal
leggjast til grunn.
Me har òg stor von knytt til at prosjekt
under Den grøne utviklingsmekanismen skal kunna gi ein
vesentleg auke i overføring av ressursar og teknologi
og bidra til ei betring av levekåra i u-landa. Dette er
ein av grunnane til at me allereie frå 2005 gir høve
til å nytta kvotar frå denne mekanismen i det
norske kvotesystemet for klimagassar og dermed stimulerer
industrien til å ta del i slike prosjekt.
Bjørn Jacobsen (SV) [13:24:26]: Eg takkar for svaret.
Eg vil litt tilbake til dette med vekst, for
det er klart at klimaproblema også er svært
knytte til vekst. Mange land har ikkje så mykje
hydrokarbonar sjølve, og det at dei får kjøpt
inn hydrokarbonar i form av olje eller gass,
veit vi vil direkte gje positivt utslag på BNP. Så mitt
spørsmål er: Korleis bidreg Noreg internasjonalt
til at vekst ikkje skal vere så knytt
opp til bruk av fossilt brennstoff?
Statsråd Knut Arild Hareide [13:25:01]: Det er ikkje tvil om at me, når
me ser på dei framtidige avtalene, er nøydde
til å ha eit heilt anna regime for utviklingslanda enn
for industrilanda. Den utfordringa me ser i samband med klimaet
i dag, er skapt av oss, dei rike industrilanda. Eg er
veldig oppteken av at me no skal inkludera utviklingslanda
i ein framtidig avtale. Eg trur det er viktig, for når
me ser framover, vil me ha eit stort problem om vi ikkje
inkluderer utviklingslanda. Dialogen med utviklingslanda synest
eg er positiv. Mens me i New Dehli for to år sia opplevde
at G-77-landa var samla, opplevde me no ei langt meir splitta gruppe,
nettopp fordi ein såg den utfordringa
som kjem. Når det gjeld den framtidige avtalen, meiner
eg me skal leggja vinn på å få ein avtale
som sikrar at utviklingslanda kan ha ei utvikling, og at det er
dei rike industrilanda som tek hovudansvaret her.
Bjørn Jacobsen (SV) [13:26:02]: Eg takkar igjen for svaret, og tolkar svaret
dit hen at statsråden seier at det er veldig
viktig at utviklingslanda ikkje går i den same
klimafella som dei rike industrilanda har gjort. Men vi
veit samtidig at land som Kina kanskje har planar om å byggje ut
500–600 kullkraftverk osv. Vi veit også at
ein del av grunnlaget for Kyoto-avtalen er kvotehandelen, altså at ein
skal ta utsleppa der dei er billigast. Det er grunnlaget for kvotehandel.
Vi veit også at i begynnelsen var dette nemnt
som «burden sharing», altså byrdefordeling.
Men blir det ikkje på ein måte også ein
bløff når vi frå dei rike landa
eigentleg kan kjøpe oss fri frå å gjere
noko sjølve, heime?
Statsråd Knut Arild Hareide [13:26:49]: Eg er veldig glad for det regimet me har fått
på plass gjennom Kyotoprotokollen, og eg trur det var heilt
nødvendig for dei som sat i 1997 og framforhandla dette, å få moglegheit
til eit kvotesystem. Me har opplevd at eit kvotesystem bl.a. med
svovelutslepp i USA har hatt veldig
positiv betyding. Det viktigaste for meg er at me får til
tiltak som reduserer utsleppa. Så er det faktisk underordna
kvar dei utsleppsreduserande tiltaka foregår. Derfor meiner
eg at Noreg bl.a. skal ta ein vesentleg del av våre
tiltak nasjonalt, men me skal òg vera med på å nytta
den marknadsmoglegheita som ligg i bruken av kvotesystema.
Så peiker representanten Jacobsen
på land som Kina. Me kunne òg ha nemnt land som
India og Brasil, som her kjem til å vera veldig
viktige. Det er òg viktig å kunna sjå at
utviklingslanda er veldig differensierte – det er stor
forskjell på dei. Og ikkje minst er nokre av
dei landa som her er nemnde, nøydde til å vera
med og ta ein del av ansvaret.
Presidenten: Sak nr. 1, spørretime, er dermed ferdigbehandlet.