Begrunnelse

I ein krisesituasjon er det sjølvsagt viktig med eit kompetent og godt trent sivilforsvar. Samstundes er det viktig med uavhengige medier som kan rapportere, opplyse og ikkje minst rette eit kritisk søkjelys mot styresmakter og beredskapsarbeid.
Journalistar kan bli kalla inn til teneste i Sivilforsvaret som andre borgarar. Den siste tida har det vert retta kritikk mot denne ordninga, mellom anna frå redaktørane i Fjordenes Tidende og Firdaposten. Desse opplever no at høvesvis 2 av 5 og 3 av 7 journalistar er kalla inn til teneste.
Eit anna døme er avisa Hordaland, der ein fotograf ved to høve dei siste åra har blitt kalla inn til teneste i Sivilforsvaret, samstundes som redaktøren hadde behov for redaksjonelle ressursar til å dekke høvesvis ekstremsnøvêret i vinter samt søk etter ein sakna person.
Ved alvorlege kriser spelar media ei viktig rolle. Media opplyser befolkninga om kva som skjer, mobiliserer til innsats og dekker løpande hendingar av stor samfunnsmessig viktigheit. Dersom halve redaksjonen vert rekvirert til beredskapsarbeid, vil dette sjølvsagt vanskeleggjere lokalmedia sitt viktige samfunnsoppdrag.
Det kan dessutan stillast meir prinsipielle spørsmål ved at journalistar vert kalla inn for å trekke i uniform.
Ved teneste for Sivilforsvaret vert journalistar både underlagt kommando og underlagt teieplikt. Dette kan vanskeleggjere det uhyre viktige samfunnsoppdraget media har når det kjem til å belyse og eventuelt kritisere manglar ved beredskapsarbeid, og mange vil kome i ei problematisk rollekonflikt.