I budsjettproposisjonen for 2002 vart det orientert om at departementet
ville kome tilbake til ei samla vurdering av gebyrpolitikken for
Brønnøysundregistra i statsbudsjettet for 2003.
I statsbudsjettet vart det gitt ei generell framstilling av dei
problemstillingane departementet arbeidde med, og vist til at saka skulle
sendast på høyring same haust. Allmenn høyring
vart gjennomført i perioden desember 2002 til februar 2003.
Departementet går inn for at gebyra for tenester frå Brønnøysundregistra
ikkje lenger skal vere kopla til rettsgebyret. Dette vil gi større
fleksibilitet når ein skal fastsetje gebyr for dei enkelte
tenestene, uavhengig av om ein held fast ved inntektskrava til Brønnøysundregistra.
Det vert foreslått å ta inn alternative gebyrheimlar
i dei lovene som regulerer tenester dei ulike registra i Brønnøysund
utfører, dvs. føretaksregisterlova og tinglysingslova.
og at dagens heimlar i rettsgebyrlova blir oppheva. I etterkant
vil det bli fastsett ei felles gebyrforskrift for alle registra
i Brønnøysund.
Departementet foreslår òg at ein går
bort frå dagens kunngjering i Norsk lysingsblad, og i staden kunngjer
selskapsrelaterte saker elektronisk. Elektronisk kunngjering gir
betre tilgang til kunngjeringane, mellom anna gjennom utvida søkjemoglegheiter
og enkle abonnementsordningar. Registra kan òg spare store
kostnader ved ei slik omlegging, sidan ein i dag bruker 32 mill. kroner
på kunngjering i Norsk lysingsblad. Departementet
foreslår ei omlegging til elektronisk kunngjering på Internett
ved hjelp av Brønnøysundregistra sine databasar.
Departementet vil sørgje for at informasjonen er tilgjengeleg
på Internett med gode søkjemoglegheiter i så lang
tid som det er praktiske behov for det, sett i høve til
lagringskapasitet. Seinare må informasjonen kunne hentast fram
frå historiske arkiv i samsvar med vanlege arkivreglar.
I tillegg til forslag om endringar av gebyrheimlar og endringar
i kunngjeringsreglane omfatta høyringa generelle spørsmål
knytte til prinsippa for gebyrfastsetjing i Brønnøysund
og den konkrete gebyrstrukturen i Føretaksregisteret. Departementet
ville sjå nærmare på heimelsgrunnlaget
for gebyra i dei ulike registra innanfor Brønnøysundregistra.
Dei fleste av gebyra for registrering, tinglysing og informasjonsavlevering
er forankra i lov 17. desember 1982 nr. 86 om rettsgebyr
(rettsgebyrlova), primært av historiske grunner. Brønnøysundregistra
har sidan 80-talet vakse ved at stadig fleire register har kome
til. Dette har ført til ei oppsplitting av reglane om gebyrfastsetjing og
innkrevjing av gebyr. Det er derfor behov for ei opprydding. Rettsgebyret
blir primært fastsett etter kva inntektsbehov domstolane
har. Auken i gebyra har dei siste åra vore høgare
enn den generelle kostnadsutviklinga i samfunnet. Frå eit
brukarsynspunkt er det òg mest formålstenleg at
heimlane for gebyr går fram av den lovgivinga som regulerer
dei aktuelle tenestene registra utfører.
I høyringsbrevet gjekk departementet inn for at gebyrfastsetjinga
i framtida skal følgje eit prinsipp om at inntektene skal
dekkje kostnadene ved drift og utvikling, og at registra blir vurderte
gruppevis etter kva for kundar dei yter tenester til. I tillegg
kan det bli gjort eit påslag for å møte
eit eventuelt inntektskrav frå Stortinget, fastsett i samband
med dei årlege budsjettbehandlingane i Stortinget.
Innspela frå høyringsrunden er positive til
forslaget om nytt prinsipp for gebyrpolitikken. Departementet vil
leggje dette til grunn for forskriftsutforminga i etterkant av lovendringane,
og komme tilbake til saka i budsjettforslaget for 2004.
For å kome behova i næringslivet i møte
og redusere gebyra i Føretaksregisteret, ønskte
departementet også å sjå nærmare
på om det var mogleg å redusere kostnadene.
Dei siste åra har Brønnøysundregistra,
og i første rekkje Føretaksregisteret, vorte kritiserte
for at gebyra er for høge. Det gjeld særleg gebyra
for nyregistrering av føretak. Det syner seg at dagens
overskot i Brønnøysundregistra stort sett stammar
frå gebyr som er knytte til tinglysing/registreringar
i Lausøyreregisteret, ikkje registreringar i Føretaksregisteret.
Departementet foreslo i høyringsnotatet ein overgang
frå dagens kunngjering i Norsk lysingsblad til elektronisk
kunngjering i selskapsrelaterte saker. Elektronisk kunngjering gir
betre tilgang til kunngjeringane, mellom anna gjennom utvida søkjemoglegheiter
og enkle abonnementsordningar, og gjer at ein kan spare store kostnader.
Endringane i kunngjeringssystemet inneber ei innsparing i kostnadene
for registrering, fordi kostnadene til kunngjering i Norsk lysingsblad
fell bort. Det gir ei innsparing på ca. 32 mill. kroner.
Inntektene til Norsk lysingsblad vert reduserte tilsvarande. Kostnadene
for Norsk lysingsblad vert redusert med ein noko mindre sum. Departementet
legg opp til at dei innspara kostnadene for kunngjering skal gi
tilsvarande reduksjon av registreringsgebyra. Totalt sett blir forslaga
derfor provenynøytrale.
Den føreslåtte overgangen til elektronisk kunngjering
i regi av Brønnøysundregistra krev ei viss vidareutvikling
av den noverande kunngjeringssida til Brønnøysundregistra.
Dette er berekna til ein eingongskostnad på ca. 400 000
kroner. Dette kan dekkjast over det ordinære budsjettet
til Brønnøysundregistra. Drift av kunngjeringsbasen
vil ikkje verte meir kostnadskrevjande enn dagens arbeid med oppfølging
av kunngjeringane i Norsk lysingsblad.