Ved lov 14. desember 2007 nr. 107 vart det vedteke endringar
i den særskilte skatteordninga for reiarlagselskap, som mellom anna
går ut på endeleg fritak for skatt på nye inntekter frå skipsfartsverksemd, med
verknad frå og med inntektsåret 2007. Ein viser til Ot.prp. nr.
1 (2007–2008) og Innst. O. nr. 1 (2007–2008). Skattefritaket gjeld
i utgangspunktet kjerneverksemd i form av drift og utleige av eigne
og innleigde skip, jf. skattelova § 8-13. Departementet kan fastsetje
i forskrift at selskap innanfor ordninga kan drive verksemd i form
av strategisk og kommersiell leiing og anna tilknytt verksemd.
I samband med omlegginga av reiarlagskatteordninga vart det vedteke
overgangsreglar, som går ut på ei gradvis oppløysing av skattekredittane
i den tidlegare ordninga pr. 31. desember 2006. To tredjedelar av
utrekna, ikkje skattlagt gevinst skal førast på ein oppgjerskonto
som skal takast til inntekt over 10 år, mens ein tredjedel av gevinsten
berre skal skattleggjast i den grad eit tenkt skattebeløp knytt
til denne ikkje vert brukt til kvalifiserande miljøtiltak.
Ved omlegginga vart det òg gitt nye reglar for inntredenskattlegginga,
det vil seie skattlegginga når eit reiarlagselskap trer inn i reiarlagskatteordninga. Etter
dei nye reglane skal det gjennomførast eit inntektsoppgjer, der
differansen mellom marknadsverdiar og skatteverdiar som hovudregel
skal skattleggjast, jf. skattelova § 8-14 tredje ledd. For selskap som
trer inn i ordninga i 2007 eller 2008, er det vedteke ein overgangsregel
som går ut på at verdsetjinga av driftsmidlar, partar i deltakarlikna
selskap og aksjar i NOKUS-selskap skal baserast på verdiane i rekneskapen,
jf. åttande ledd i overgangsreglane til endringane i skattelova
§§ 8-14, 8-15 og 8-17 ved lov 14. desember 2007 nr. 107. Departementet
foreslår at tidsperioden for overgangsregelen gjerast lengre, slik at
selskap som trer inn i ordninga 1. januar 2009 skal basere verdsetjinga
på verdiane i rekneskapen.
Vidare foreslår departementet eit tillegg til reglane om inntektsoppgjer
når selskap trer inn i ordninga, jf. skattelova § 8-14. Siktemålet
er å hindre omgåing ved sal av part i deltakarlikna selskap eller
NOKUS-aksje som er omfatta av fritaksmetoden til eit nærståande
selskap, som så trer inn i ordninga eller sel parten eller NOKUS-aksjen
vidare til eit anna nærståande selskap innanfor ordninga. Endringa
går ut på at skatteverdien ved inntredenskatteoppgjeret vert sett til
seljaren sin skatteverdi, korrigert for mellom anna inntekter som
er skattlagde på deltakaren si hand. Er parten eller NOKUS-aksjen
selt i fleire ledd mellom nærståande selskap, skal skatteverdien
korrigerast for endringar i overpris eller underpris ved desse sala.
Departementet foreslår også ei oppretting av ordlyden i skattelova
§ 8-14 fjerde ledd, for å presisere at regelen skal gjelde ved alle
typer realisasjon, og ikkje berre sal. I tillegg vert det foreslått
ei endring av skattelova § 8-14 femte ledd, slik at det skal gjennomførast
eit inntektsoppgjer ved skattefri konsernintern overføring av alle
typar eigedelar til selskap innanfor reiarlagskatteordninga. I dag
gjeld denne regelen berre for fartøy. Vidare foreslår departementet
ei presisering av femte ledd i overgangsreglane til endringane
i skattelova §§ 8-14, 8-15 og 8-17 ved lov 14. desember 2007 nr.
107 slik at ein ved fastsetjing av den utrekna eigenkapitaldelen
i regimet for korreksjonsskatt etter skattelova § 10-5 andre ledd
tredje punktum, jf. fjerde punktum, skal gjere frådrag berre for
den skatteskyldnaden som er ført i rekneskapen, og ikkje for den
fulle, utrekna skatteskyldnaden basert på skattesatsen for allminneleg inntekt.
I tillegg foreslår departementet enkelte opprettingar i treårsregelen
i åttande ledd i overgangsreglane, blant anna slik at den berre
skal gjelde partar i deltakarlikna selskap og aksjar i NOKUS-selskap som
ikkje er omfatta av fritaksmetoden.
Alle vilkåra for å vere innanfor reiarlagskatteordninga må vere
oppfylt gjennom heile inntektsåret. For å komme inn under overgangsreglane
om verdsetjing av eigedelar til verdiane i rekneskapen måtte selskapa
såleis i utgangspunktet gjennomføre alle naudsynte omorganiseringar
for å kvalifisere for ordninga innan 1. januar 2008. For mange selskap vart
denne fristen for kort.
Selskapa har etter gjeldande reglar heller ikkje hatt moglegheit
til å fisjonere ut skipsfartsverksemda til eit nystifta selskap
som kan tre inn i ordninga i løpet av 2008. Det var også vanskeleg
for mange selskap å gjennomføre ein fisjon før 1. januar 2008, mellom
anna på grunn av at ein fisjon tidlegast trer i kraft etter utløpet
av ein to månaders kreditorfrist, og etter at melding frå alle overtakande
selskap er registrert i Foretaksregisteret, sjå aksjelova § 14-7,
jf. § 13-14 og allmennaksjelova § 14-7, jf. § 13-15. Dersom fisjonen
tok til å gjelde 1. januar 2008 eller seinare, er det ikkje høve
for selskapet til å krevje seg likna innanfor ordninga for 2008.
Siktemålet med overgangsregelen var likebehandling med selskap
som trer inn i ordninga frå den tidlegare reiarlagskatteordninga,
som skal basere verdsetjinga ved oppgjeret for oppbygde skattekredittar
i den tidlegare ordninga på verdiane i rekneskapen.
På bakgrunn av dette meiner departementet at overgangsreglane
bør endrast, slik at selskap som i løpet av 2008 har gjennomført
naudsynte omorganiseringar skal basere verdsetjinga ved inntredenskattlegginga
på verdiane i rekneskapen.
Dette kan gjennomførast ved å endre forbodet mot å tre inn i
ordninga i same år som det gjennomførast fisjon med skattekontinuitet.
Eit selskap kan såleis fisjonere ut skipsfartsverksemda til eit
nystifta selskap som trer inn i ordninga frå og med fisjonstidspunktet.
Forbodet mot å tre inn i ordninga i same år som det gjennomførast
fisjon med skattekontinuitet har grunnlag i at selskapa i stor utstrekning
kan ha innverknad på fordelinga av inntekter og skatteposisjonar
før fisjonen, jf. Ot.prp. nr. 11 (1996–1997) side 48. Til dømes
kan overskot opptent før fisjonen skattleggjast fullt ut i det overdragande
selskapet, dersom dette ikkje oppløysast ved fisjonen. Alternativt
kan overskot fordelast i same forhold som aksjekapitalen, eller
slik at overskotet vert tilnærma riktig sett i forhold til resultata
for verksemdene til dei fisjonerte selskapa. Tilsvarande gjeld for
underskot. Vidare kan gevinst- og tapskontoen fordelast i høve til
aksjekapitalen eller tilordnast det selskap som driv den verksemda
som posisjonen har nærmast tilknyting til.
Dersom ikkje alle dei fisjonerte selskapa vil bli likna innanfor
reiarlagskatteordninga, kan dette gi incentiv til å fordele overskot
og andre skatteposisjonar på ein gunstigast mogleg måte. Til dømes
kan ein fordeling av overskot opptent før fisjonen etter same forhold
som aksjekapitalen, føre til at også inntekter frå verksemd som
ikkje kan drivast innanfor ordninga vert friteke for skattlegging.
For å hindre slike tilpassingar måtte ein vedta reglar som fastsett
korleis opptent overskot og andre skatteposisjonar skal fordelast
mellom dei fisjonerte selskapa. Dette vil i stor grad komplisere
både regelverket og likningsbehandlinga.
Eit betre alternativ er å forlenge tidsperioden for dei allereie
eksisterande overgangsreglane slik at dei også skal gjelde for selskap
som trer inn i ordninga 1. januar 2009. Selskap som ønskjer å tre
inn i ordninga kan såleis gjennomføre naudsynte omorganiseringar
i løpet av 2008, og tre inn i ordninga frå og med 1. januar 2009.
Ein slik regel vil ikkje gi skattefritak for inntekter frå skipsfart
opptent før selskapet trer inn i ordninga 1. januar 2009. På den
andre sida vil regelen vere enkel å praktisere for skatteetaten
og selskapa, og selskap som ønskjer å tre inn i ordninga vil få
verdsetjinga av eigedelar basert på verdiane i rekneskapen.
Departementet foreslår såleis å endre overgangsreglane til endringane
i reiarlagskatteordninga, slik at selskap som trer inn i ordninga
med verknad frå og med 1. januar 2009 ved inntektsoppgjeret skal
basere verdsetjinga av driftsmidlar, partar i deltakarlikna selskap
og aksjar i NOKUS-selskap på verdiane i rekneskapen. Regelen skal
ikkje gjelde for selskap som trer inn seinare enn 1. januar 2009.
Departementet viser til forslag til endring av åttande ledd i
overgangsreglane til endringane i skattelova §§ 8-14, 8-15 og 8-17,
vedteke ved lov 14. desember 2007 nr. 107.
Departementet foreslår at endringa tek til å gjelde straks med
verknad frå og med inntektsåret 2007.
Selskap kan omgå reglane om inntektsoppgjer etter skattelova
§ 8-14 tredje, fjerde og femte ledd, ved å selje partar i deltakarlikna
selskap og aksjar i NOKUS-selskap til eit nærståande selskap som
er ordinært likna, før partane eller aksjane vert teke inn i ordninga
ved at det kjøpande selskapet trer inn i ordninga. Dersom realisasjonen
er omfatta av fritaksmetoden, vil ein eventuell gevinst ved salet
vere fritatt for skattlegging. Partane og aksjane vil få ny skatteverdi
på kjøparens hand, som skal fastsetjast til kjøpsprisen.
Når det kjøpande selskapet trer inn i ordninga skal differansen
mellom skatteverdien og marknadsverdien på parten eller aksjen skattleggjast,
jf. skattelova § 8-14 tredje ledd. Differansen vil som oftast vere
liten dersom selskapet trer inn i ordninga kort tid etter salet.
Dette har årsak i at skatteverdien på parten eller aksjen vert sett
til kjøpsprisen ved det tidlegare salet. Det er berre ein eventuell
verdiauke etter salet som vil bli skattlagt ved inntektsoppgjeret,
mens all verdiauke før salet vil bli endeleg skattefri.
Det skal også gjennomførast eit inntektsoppgjer dersom det kjøpande
selskapet sel eller overfører parten eller aksjane vidare til eit
nærståande selskap innanfor ordninga, jf. skattelova § 8-14 fjerde
og femte ledd. Differansen mellom marknadsverdien og skatteverdien
vil også i slike tilfelle normalt vere liten, som ein følgje av
det tidlegare salet.
For å hindre at selskap omgår reglane om inntektsoppgjer som
nemnt, foreslår departementet at inngangsverdien til partar i deltakarlikna
selskap og aksjar i NOKUS-selskap som før innstreden eller realisasjon
er overført frå eit nærståande selskap, skal settast til skatteverdien
for det nærståande selskapet. Tilsvarande gjeld når denne overføringa
skjer frå selskap som det nærståande selskapet har direkte eller indirekte
eigarinteresser i. Dette gjeld likevel berre når ein eventuell gevinst
ved denne overføringa er omfatta av fritaksmetoden, jf. skattelova
§ 2-38.
Regelen går ut på at ein ser bort frå at parten har fått ny skatteverdi
på mottakaren sin hand ved overføringa. Selskap vil berre omgå reglane
om inntektsoppgjer dersom til dømes salet fører til ein høgare skatteverdi
for kjøparen enn for seljaren, og såleis reduserer ein eventuell
gevinst ved inntektsoppgjeret. Det er derfor ikkje naudsynt å bruke
skatteverdien for det nærståande selskapet, dersom overføringa fører til
ein lågare skatteverdi for mottakaren. Departementet foreslår derfor
at regelen berre skal gjelde dersom salet fører til ein høgare skatteverdi
for mottakaren.
Parten i det deltakarlikna selskapet eller aksjane i NOKUS-selskapet
kan vere overført mellom fleire nærståande selskap. Departementet
foreslår at inngangsverdien i slike tilfelle vert fastsett til skatteverdien
for det første nærståande selskapet som overførte parten eller aksjane.
Inngangsverdien må korrigerast for skattepliktige inntekter frå
det deltakarlikna selskapet eller NOKUS-selskapet som er skattlagt
ordinært på dei nærståande selskapa sine hender. Tilsvarande korreksjon må
gjerast for skattefrie inntekter og kostnadar som ikkje kan førast
til frådrag og for eventuelle inn- og utbetalingar i selskapet.
Departementet foreslår derfor at inngangsverdien etter skattelova
§ 8-14 tredje, fjerde og femte ledd skal korrigerast ned for endringar
i overpris eller underpris ved overføringane mellom dei nærståande selskapa.
Det skal berre gjennomførast ei korrigering dersom summen av endringane
i overpris eller underpris er positiv. Dersom summen av endringane
er negativ, har overføringane ført til ein lågare skatteverdi for
selskapet, og det er ikkje grunnlag for å hevde at selskapet har
omgått reglane om inntektsoppgjer. Overføring omfattar i denne samanhengen
både realisasjon og uttak.
Departementet foreslår at ein ikkje skal korrigere for endringar
i over- eller underpris ved overføringar som er gjennomført tidlegare
enn tre inntektsår før året for inntreden eller realisasjon.
Slik reglane om fritaksmetoden og reglane om NOKUS-skattlegging
er utforma, vil aksjar i NOKUS-selskap aldri vere omfatta av fritaksmetoden. Regelendringa
som er omtalt ovanfor vil derfor i praksis berre gjelde partar i
deltakarlikna selskap.
Departementet foreslår også ei oppretting av ordlyden i skattelova
§ 8-14 fjerde ledd for å presisere at regelen skal gjelde ved alle
typar realisasjon, og ikkje berre sal.
Departementet viser til forslag til endring av skattelova § 8-14
fjerde ledd og nytt sjette ledd.
Departementet foreslår at endringane i § 8-14 fjerde ledd tek
til å gjelde straks med verknad frå og med inntektsåret 2007, likevel
slik at inntektsoppgjer berre skal gjennomførast ved realisasjon
av part frå og med 5. oktober 2007. Departementet foreslår vidare
at tilføyinga av sjette ledd tek til å gjelde straks med verknad
frå og med inntektsåret 2008.
Etter skattelova § 8-14 femte ledd skal det gjennomførast eit
inntektsoppgjer når eit fartøy vert overført til eit selskap innanfor
reiarlagskatteordninga etter reglane om skattefri overføring av
eigedelar mellom selskap, jf. skattelova § 11-21. Det same gjeld når
fartøy kjem inn i ordninga ved overføring av part i deltakarlikna
selskap eller NOKUS-selskap. Inntektsoppgjeret skal gjennomførast
etter dei same reglane som gjeld når eit selskap trer inn i ordninga.
Selskap innanfor reiarlagskatteordninga kan drive skipsfartsverksemd
i form av drift og utleige av eigne og innleidde skip, jf. skattelova
§ 8-13 første ledd første punktum. Etter endringane i reiarlagskatteordninga
som vart vedteke ved lov 14. desember 2007 nr. 107, kan departementet
likevel vedta i forskrift at selskap innanfor reiarlagskatteordninga
også kan drive verksemd nært knytt til skipsfartsverksemda, jf.
skattelova § 8-13 første ledd andre punktum. Dette gjeld til dømes
strategisk og kommersiell leiing, lasting/lossing o.a.
Det kan såleis vere aktuelt å overføre også andre eigedelar enn
fartøy til eit selskap innanfor reiarlagskatteordninga etter reglane
om skattefrie konserninterne overføringar. Etter gjeldande reglar
skal det ikkje gjennomførast eit inntektsoppgjer ved overføring
av slike eigedelar.
Departementet legg til grunn at det ikkje er grunn til å gjere
skilnad på fartøy og andre eigedelar i høve til reglane om inntektsoppgjer.
På bakgrunn av dette foreslår departementet å endre skattelova § 8-14
femte ledd, slik at det skal gjennomførast eit inntektsoppgjer når
ein eigedel vert overført til eit selskap innanfor reiarlagskatteordninga
etter reglane om skattefri overføring av eigedelar mellom selskap,
jf. skattelova § 11-21.
Departementet viser til forslag til endring av skattelova § 8-14
femte ledd.
Departementet foreslår at endringa tek til å gjelda straks med
verknad frå og med inntektsåret 2008.
Når selskap trer inn i reiarlagskatteordninga frå ordinær skattlegging
i 2007 eller 2008 skal det gjennomførast eit inntektsoppgjer, der
verdsetjinga av mellom anna partar i deltakarlikna selskap og aksjar i
NOKUS-selskap skal baserast på verdiane i rekneskapen, jf. åttande
ledd i overgangsreglane til endringane i skattelova §§ 8-14, 8-15
og 8-17 ved lov 14. desember 2007 nr. 107. Etter forslaget som er omtalt
under avsnitt 4.2 ovanfor skal dette også gjelde ved inntreden i
ordninga 1. januar 2009.
Departementet har lagt til grunn at verdiane i rekneskapen kan
gi eit eigna mål på marknadsverdiane ved inntreden i ordninga, jf.
Ot.prp. nr. 1 (2007–2008) på side 33. Likevel kan ein ikkje sjå
bort frå at verdiane i rekneskapen i enkelte tilfelle kan vere mykje
lågare enn marknadsverdiane. For å hindre at selskap trer inn i
ordninga før eit planlagt sal, skal gevinst knytt til mellom anna
partar i deltakarlikna selskap og aksjar i NOKUS-selskap vere skattepliktige ved
realisasjon innan tre år etter at selskapet gjekk inn i ordninga,
jf. åttande ledd i overgangsreglane til endringane i skattelova
§§ 8-14, 8-15 og 8-17. Tilsvarande gjeld dersom selskapet trer ut
av ordninga innan tre år. Ved utrekninga av gevinsten skal den verdien
som er lagt til grunn når selskapet gjekk inn i ordninga utgjere
inngangsverdien. Departementet kan gi nærare reglar om skattlegginga.
Skatteplikta gjeld ikkje for eigedelar som er skaffa etter inntreden i
ordninga.
Treårsregelen gjeld også gevinst ved realisasjon av partar i
deltakarlikna selskap og aksjar i NOKUS-selskap som er omfatta av
fritaksmetoden, sjølv om gevinst vil vere friteke for skattlegging
utanfor reiarlagskatteordninga. Departementet legg til grunn at selskap
ikkje vil tilpasse seg reglane ved å tre inn i ordninga før eit
planlagt sal o.a. av ein slik part eller aksje. Ein foreslår derfor
ein presisering i overgangsreglane til endringane i skattelova §§ 8-14,
8-15 og 8-17, slik at treårsregelen berre skal gjelde gevinst knytt
til partar i deltakarlikna selskap og aksjar i NOKUS-selskap som
ikkje er omfatta av fritaksmetoden.
Slik reglane om fritaksmetoden og reglane om NOKUS-skattlegging
er utforma, vil aksjar i NOKUS-selskap aldri vere omfatta av fritaksmetoden. Det
føreslåtte unntaket frå treårsregelen vil derfor i praksis berre
omfatte partar i deltakarlikna selskap.
Departementet foreslår også ei presisering av ordlyden i treårsregelen,
slik at den skal gjelde ved alle typer realisasjon samt uttak, og
ikkje berre ved sal. I tillegg foreslår departementet ei presisering
av forskriftsheimelen i åttande ledd siste punktum i overgangsreglane.
Departementet viser til forslag til endringar i åttande ledd
i overgangsreglane til endringane i skattelova §§ 8-14, 8-15 og
8-17, vedteke ved lov 14. desember 2007 nr. 107.
Departementet foreslår at endringane tek til å gjelde straks
med verknad frå og med inntektsåret 2008.
Ved endringane av reiarlagskatteordninga ved lov 14. desember
2007 nr. 107 vart det vedteke overgangsreglar for selskap som vart
likna etter reiarlagskatteordninga for inntektsåret 2006, og som
vel særskilt reiarlagskattlegging også for inntektsåret 2007, jf.
omtalen av dette under pkt. 4.1 i proposisjonen For slike selskap
skal det gjennomførast eit inntektsoppgjer for opparbeidde skattekredittar
pr. 31. desember 2006. To tredjedelar av den utrekna gevinsten ved inntektsoppgjeret
skal førast på ein eigen oppgjerskonto, som det skal svarast skatt
av med like store beløp over 10 år frå og med inntektsåret 2007.
Den siste tredjedelen av gevinsten skal berre skattleggjast i den
grad eit tenkt skattebeløp knytt til denne ikkje vert brukt til
kvalifiserande miljøtiltak.
I samband med endringane vart det lagt til grunn at skatt knytt
til dei to tredjedelane av gevinsten som skulle førast på oppgjerskontoen
måtte skyldskrivast i rekneskapane med ein gong, utan omsyn til
at innbetalingane er skyvd ut i tid, jf. Ot.prp. nr. 1 (2007–2008)
på s. 31. Det vart derfor lagt til grunn at denne delen av gevinsten
berre kan delast ut som utbytte utan korreksjonsinntekt etter at
den er skattlagt. Korreksjonsinntektsreglane går ut på skattlegging
av selskapa dersom det er delt ut inntekter som er skattepliktige
på selskapa sine hender, men der tidfestingsreglane medfører at
inntekta enno ikkje er skattlagt, jf. skattelova § 10-5.
Departementet er kjent med at selskap likevel har neddiskontert
skattekredittane som er ført på oppgjerskontoen. Neddiskontering
går ut på at ein tar omsyn til verdien for selskapa av å få utsett
skatteinnbetalingane til eit framtidig tidspunkt. Dette fører såleis
til at det i rekneskapen vert ført ei lågare skattegjeld enn som
det vart lagt til grunn i Ot.prp. nr. 1 (2007–2008).
Eit grunnleggjande omsyn ved omlegginga av reiarlagskatteordninga
har vore at inntekter som er opptent før 1. januar 2007 ikkje skal
kunne delast ut før dei er skattlagt, eller friteke etter ordninga
med fond for miljøtiltak o.a. Det er då behov for å sikre at dei
to tredjedelane av skattekredittane som etter overgangsreglane skal
førast på oppgjerskonto, vert skattlagt i form av korreksjonsinntekt,
i den grad utdelinga skjer før skatten etter overgangsreglane vert
ein realitet. Derfor foreslår departementet at ein ved fastsetjing
av den utrekna eigenkapitaldelen i regimet for korreksjonsskatt
etter skattelova § 10-5 andre ledd tredje punktum, jf. fjerde punktum,
skal gjere frådrag berre for den skatteskyldnaden som er ført i
rekneskapen, og ikkje for den fulle, utrekna skatteskyldnaden basert
på skattesatsen for alminneleg inntekt (gitt at det ikkje er denne
fulle skyldnaden som er ført i rekneskapen). Ved slik forutgåande
skattlegging som korreksjonsinntekt vert den etterfølgjande, løpande skattlegginga
over 10 år etter overgangsreglane nedjustert tilsvarande.
Departementet viser til forslag til endring av femte ledd i overgangsreglane
til endringane i skattelova §§ 8-14, 8-15 og 8-17, vedteke ved lov
14. desember 2007 nr. 107.
Departementet foreslår at endringa tek til å gjelda straks med
verknad frå og med inntektsåret 2007.
Departementet legg til grunn at dei føreslåtte endringane vil
ha små administrative og økonomiske verknader.
Komiteen sluttar seg til Regjeringa
sine forslag til endringar i skattelova § 8-14 og forslag til endringar
i del X femte og åttande ledd i lov om endringar i lov 14. desember
2007 nr. 107 om endringar i lov 26. mars 1999 nr. 14 om skatt av
formue og inntekt (skattelova).
Komiteens medlemmer fra Fremskrittspartiet,
Høyre, Kristelig Folkeparti og Venstre viser til at presiseringen
av ordlyden i skattelovens § 8-14 fjerde ledd til å gjelde ikke
bare salg, men alle typer realisasjoner, betyr at andre typer transaksjoner
til nærstående selskap også vil omfattes av bestemmelsen om skatteplikt. Disse medlemmer vil
understreke at lovpresiseringen gjøres gjeldende allerede fra 5. oktober
2007. Dette innebærer at andre transaksjoner enn salg som skattyter
har foretatt etter denne dato, og som han måtte forutsette ikke
var omfattet av bestemmelsen, nå får helt andre negative skattemessige
konsekvenser enn forutsatt på transaksjonstidspunktet. Disse
medlemmer mener det er uheldig at manglende overgangsregler
har medført at gjennomførte transaksjoner har fått helt andre virkninger
enn de man måtte forutsette da transaksjonen ble utført.
Disse medlemmer vil derfor foreslå en endring
i ikrafttredelsen, og fremmer på denne bakgrunn følgende forslag:
"I lov 26. mars 1999 nr. 14 om skatt av formue og inntekt (skatteloven)
skal ikrafttredelsesbestemmelsene i III første ledd lyde:
Endringane under I tek til å gjelde straks med verknad frå og
med inntektsåret 2008."
Disse medlemmer viser i denne forbindelse også
til at både finansminister og næringsminister gjentatte ganger både
overfor bransjen selv og overfor Stortinget har garantert at det
ville bli satt inn tiltak slik at rederiene kunne bokføre miljødelen
som egenkapital i selskapenes balanse innenfor den nye rederiskatteordningen. Disse
medlemmer konstaterer at disse løftene ikke har blitt holdt
og at den kuriøse løsning på Regjeringens problem i forhold til dette
løftebruddet har vært å gi to NHH-professorer i oppdrag å lage en
utredning om dette temaet. Disse medlemmer registrerer
ikke overraskende at utredningen konkluderer med at det i noen tilfeller
kan tenkes at miljødelen kan føres som egenkapital, og disse
medlemmer har oppfattet av den offentlige debatt at finansministeren
som en følge av dette mener at Revisorforeningen har tatt feil når
de har hevdet det motsatte.
Disse medlemmer har imidlertid konstatert at Den
norske Revisorforening (DnR) har vurdert utredningen og fremholder
at den ikke vil endre sin oppfatning og praksis så langt, og at
det er dette som er avgjørende i og med at det er selskapets revisor som
er ansvarlig i henhold til internasjonalt regelverk at regnskapene
er korrekte. Disse medlemmer vil understreke at dersom
Regjeringen mener at NHH-utredningen tilsier at miljødelen i noen
tilfeller kan føres som egenkapital, så bør Regjeringen tilpasse
retningslinjer og regler i tilknytning til den tilbakevirkende rederiskatten
for tidligere år, slik at miljødelen kan føres som egenkapital.
Dette bør fortrinnsvis gjøres i samråd med Revisorforeningen, slik
at man kommer frem til en faglig god løsning.