Komiteen, medlemene frå Arbeidarpartiet,
leiaren Olav Akselsen, Bendiks H. Arnesen, Grethe Fossli og Aud
Gaundal, frå Høgre, Ivar Kristiansen, Michael Momyr
og Erlend Nornes, frå Framstegspartiet, Øystein
Hedstrøm og Lodve Solholm, frå Sosialistisk Venstreparti, Åsa
Elvik og Inge Ryan, frå Kristeleg Folkeparti, Olaf Gjedrem
og May-Helen Molvær Grimstad, og frå Senterpartiet, Odd
Roger Enoksen, syner til St.meld. nr. 27 (2003-2004) om
Norsk sjøpattedyrpolitikk, til brev frå komiteen
dagsett 1. april og 6. mai 2004, og til svarbrev frå Fiskeridepartementet
dagsett 19. april og 10. mai 2004.
Komiteen syner til at Stortinget
ved fleire høve har handsama norsk sjøpattedyrpolitikk. Komiteen syner
i den samanheng til Innst. S. nr. 93 (1998-1999) i samband med St.meld.
nr. 51 (1997-1998) om Perspektiv på utvikling av norsk
fiskerinæring der det vert uttrykt at "Utviklinga i bestanden
av sjøpattedyr gjev grunn til uro og komiteen meiner difor
at fangsten av kval og sel må aukast monaleg. Komiteen
vil understreke at dette må skje innanfor ei berekraftig
ramme" og "Komiteen ber Regjeringa sette i verk tiltak for å redusere
bestanden av voksen grønlandssel i betydelig større
grad enn i dag. Om nødvendig må dette skje med støttetiltak,
gjerne i samarbeid med fiskerinæringen. Selbestanden er
pr. i dag blitt alt for stor, og den er sterkt voksande. Dette er
en sterk trussel for norsk fiskerinæring".
Komiteen viser til St.meld. nr.
27 (2003-2004), der det vert presisert at Regjeringa går
inn for ei økosystembasert forvalting av marine ressursar.
Dette er ei tilnærming komiteen stør.
Dette er eit krav frå toppmøtet om berekraftig
utvikling i Johannesburg i 2002. Vidare finst det mange eksempel
på korleis forvalting av naturlege og vilkårsbundne
fornybare ressursar blir fånyttes dersom det ikkje blir
teken omsyn til artane i økosystemet og deira innbyrdes
binding og interaksjon. Komiteen meiner ei utvikling
av forvaltingsmodellar, som tek omsyn til dei ulike artane som lever
i eit økosystem, er eit viktig steg i retning av ei meir
berekraftig forvalting av våre levande ressursar.
Noreg har møtt sterk kritikk frå delar
av det internasjonale samfunnet når det gjeld forvalting
av sjøpattedyr. Etter komiteen si meining
har mykje av denne kritikken ikkje vore reint fagleg basert. Det
er komiteen si oppfatning at fokus på økosystembasert forvalting
for marine ressursar vil vere med på å redusere
styrken i denne kritikken internasjonalt, og dessutan kunne vere
eit bidrag i denne tilnærminga i andre land med tilsvarande
ressursar.
Komiteen meiner at ytterlegare
forsking på biologisk mangfald, rikdomen av artane og deira
eigenart, samt bindinga mellom dei, er ein føresetnad for
ei økosystembasert forvaltning.
Presiseringa i meldinga av at økosystembasert
forvalting inneber at ein skal følgje føre-var-prinsippet,
er særs viktig i denne samanhengen. At vi kjenner fleire av
mekanismane i økosystema enn vi gjorde tidlegare, bør
ikkje føre oss til å tru at vi kjenner alle. Det
finst gode eksempel på at å tru at ein kan kontrollere
og manipulere marine ressursar, lett kan gå gale.
Kunnskap om og erfaring i økosystembasert
forvalting, både i marine og andre økosystem,
kan verte ein særs ettertrakta kompetanse, ettersom innsikt
i kompleksiteten i naturen blir ein del av ressursforvaltinga.
Komiteen har i denne samanhengen
merka seg at Regjeringa peiker på at skattlegginga av enkelte
artar har vore så avgrensa over fleire år, at
artane no er nære sitt maksimale nivå (bereevna
til økosystemet). Vidare at føremonene ved ein
vesentleg reduksjon av sjøpattedyrførekomstane
ligg i redusert dødstal hjå andre haustbare og
kommersielt interessante ressursar. Komiteen har
i denne samanhengen merka seg kommentaren i meldinga rundt tilhøvet
mellom sjøpattedyr og fiskeria. Regjeringa viser her til
at det er menneskeleg aktivitet som er hovudårsaken til
den aktuelle situasjonen i fiskeria, og at sjøpattedyra
ikkje kan verte gjort til syndebukk for uforsvarleg forvalting med overskattlegging
av artar. Komiteen er einig i denne vurderinga, og
vil peike på at særleg når ein ønskjer å byggje
opp igjen artar, er det naudsynt å ta omsyn til den påverknaden
sjøpattedyra har.
Komiteen har merka seg at Regjeringa ønskjer
ei ny, heilskapleg og aktiv forvalting av sjøpattedyr og
er samd i at dette er særs viktig for den totale forvaltinga av
ressursane i havet. Komiteen har merka seg at i lys
av sjøpattedyra sitt konsum av fisk, vil ei rasjonell forvalting
kunne ha stor positiv verknad for økonomien i fiskeria,
og meiner difor det er viktig å gjere det som er mogleg
for å nå målsetjinga om økosystembasert forvalting
i praksis.
Sel og kval konsumerer store mengder sjømat.
Dei vanlegaste bestandane av sjøpattedyr konsumerer minimum
5,5 mill. tonn biomasse, medan dei samla norske fiskeria i 2002
i dei same økosystema var om lag 2,74 mill. tonn biomasse.
I Barentshavet konsumerer grønlandssel 3,3-3,5 mill. tonn
biomasse (ca 1 800 kg pr. dyr) og vågekval 1,8 mill. tonn
(ca 21 000 kg pr. dyr). Sjøpattedyr et mellom anna torsk,
sild, hyse, lodde og krill. Vitskaplege simuleringar av å redusere vågekvalbestanden
med eit dyr, syner at fiskekvotane kan auke med fem tonn av både
torsk og sild. Komiteen syner til at dei sel- og
kvalartane som vert hausta, er viktige predatorar i det same økosystem
som norske fiskarar haustar. Dette er eit sjølvstendig
argument for at ein forvaltar sjøpattedyra aktivt og ut
frå strategiar om berekraftig uttak frå økosystema.
Komiteen er samd i Regjeringa
sine framlegg om å innføre eit sett generelle
prinsipp som skal leggjast til grunn for forvalting av sjøpattedyr
i Noreg og å etablere eit vitskapleg fundament for overgang
til økosystembasert forvalting der bestandane av sjøpattedyr
vert vurdert i samanheng med forvaltinga av dei andre levande marine
ressursane.
Komiteen er vidare samd i Regjeringa
sitt framlegg om å vidareføre all iverksett overvaking
av bestandar, innføre overvaking av bestandar som ikkje vert
fanga opp av noverande overvakning, og utgreie nedre grenser med
tilhøyrande føre-var-grenser for livskraftige
bestandar av dei sel- og kvalartane som naturleg har fast utbreiing
i norske farvatn.
Komiteen har merka seg at ei økosystembasert forvalting
av bestandane av sjøpattedyr vil kunne gje positive ringverknader
for dei norske fiskeria.
Dei siste 20 åra har vi av ulike årsaker
hatt ei langt ifrå optimal forvalting av sjøpattedyra. Komiteen meiner
at ein må ta avgjerder som ivaretek Noreg sine økonomiske
og politiske interesser innenfor økologisk forsvarlege
rammer.
Komiteen tek utgangspunkt i dei
internasjonalt godkjende prinsippa for bevaring og berekraftig bruk. Ein
syner til Verdskommisjonen for miljø og utvikling, leia
av dåverande statsminister Gro Harlem Brundtland, og der
verdssamfunnet i samband med FN-toppmøtet om miljø og
utvikling (UNCED) i Rio de Janeiro i 1992 slutta seg til desse prinsippa
i Agenda 21. Verdssamfunnet stadfesta desse prinsippa på ny
ved FN-toppmøtet om berekraftig utvikling (WSSD) i Johannesburg
i 2002.
Komiteen syner til at desse prinsippa òg
gjeld dei levande marine ressursane, medrekna sjøpattedyra.
Det er mogleg å nytte desse ressursane på ein
berekraftig måte. Dei levande marine ressursane har hatt
og vil ha mykje å seie for samfunnsutviklinga i heile Noreg.
På same vis som andre levande marine ressursar må kome folk
langs kysten til gode, og dermed òg resten av landet, så meiner komiteen det
tilsvarande må gjelde for sjøpattedyra òg.
Desse ressursane vil tilføre kysten arbeidsplassar, økonomisk
verdiskaping, busetting og levande kystsamfunn.
Komiteen legg vekt på at
det er ei stor utfordring for verda å tryggje ein berekraftig
matproduksjon. Hausting av sjøpattedyr er ein berekraftig
matproduksjon. I tillegg gjev slik hausting gode kosthaldsprodukt og
skinn som kan brukast til klede.
Sjøpattedyr er frittlevande dyr. Samanlikna
med produksjonsdyr på land, lever sjøpattedyra
eit liv fritt frå menneskelege inngrep. Komiteen meiner
at hausting av sjøpattedyr må skje slik at dyr
ikkje skal lide i utrengsmål. Komiteen erkjenner
samstundes at utnytting av dyr for menneskelege formål
kan føre til lidingar for dyra, og at det òg kan
vere tilfelle i samband med hausting av sjøpattedyr.
Komiteen legg avgjerande vekt
på FN sin havrettskonvensjon som gjev Noreg herredøme
og suverene rettar til ressursane i store havområde, og gjev
plikt til å bevare ressursane og utnytte dei optimalt. Komiteen vil
peike på at det er legitimt å ivareta norske eigeninteresser.
Komiteen vil òg peike
på at Noreg må bruke sin suverene handlefridom
innanfor folkerettslege pliktar og normer.
Komiteen vil syne til at opprettinga
av eksklusive økonomiske soner har hatt mykje å seie
for utviklinga i Noreg.
Komiteen syner til at Den internasjonale
konvensjonen for regulering av kvalfangst (ICRW) har som hovudmålsetjing å forvalte
kvalbestandar for slik å gjere mogleg ei velordna utvikling
av kvalfangstnæringa. Komiteen syner vidare
til at konvensjonen har oppretta Den internasjonale kvalfangstkommisjonen
(IWC) for dette formålet, og at konvensjonen vart forhandla
fram for å regulere storkvalfangsten i Antarktis. Sjølv
om utgangspunktet var eit regionalt regime, gjeld konvensjonen for
alle havområde.
Komiteen merkar seg at vedtak
i IWC for å endra det fleksible regelsettet (Schedule)
vert gjorde med 3/4 fleirtal. Konvensjonen krev at slike
vedtak må bidra til å oppfylle målsetjinga
i konvensjonen, at dei må vere baserte på vitskapleg
fakta, at dei ikkje må fordele fangstkvotar mellom land
og at dei skal ta omsyn til konsumentane av kvalprodukt og kvalfangstnæringa. Konvensjonen
gjev vidare medlemene høve til å ta atterhald,
eller såkalla reservasjon, til vedtak i det fleksible regelsettet
som er i strid med dei krava som konvensjonen set til slike vedtak.
Komiteen deler Regjeringa sitt
syn at konvensjonen si rekkevidde er avgrensa til bardekvalane,
spermkval og arktisk og antarktisk bottlenose, og at små tannkval
ikkje er omfatta av konvensjonen.
Konvensjonen fungerte tilfredsstillande i samsvar med
målsetjinga i perioden frå om lag andre halvdel
av 1960-talet til om lag byrjinga av 1980-talet. I 1982 vedtok kommisjonen
ein mellombels fangststopp for perioden 1985/86-1990, omtala
som eit moratorium. Komiteen syner til at dette vedtaket
ikkje var basert på vitskapleg kunnskap. I samsvar med
konvensjonen tok difor Noreg atterhald til dette vedtaket. Noreg
tok òg atterhald til IWC sitt vedtak i 1985 om å klassifisere den
nordaustatlantiske vågekvalbestanden som ein "freda" bestand. Komiteen meiner
det er naudsynt å oppretthalde desse atterhalda.
Komiteen syner til at eit fleirtal
av medlemene i IWC set til side hovudmålsetjinga i konvensjonen. Komiteen meiner
at avtalar må følgjast i samsvar med det overordna
prinsippet om pacta sunt servanda, og er nøgd med at ei
rekkje medlemsland òg arbeider for å få IWC
til å fungere i samsvar med konvensjonen.
Komiteen er samd med Regjeringa
i at Noreg si vågekvalforvalting er i samsvar med våre
folkerettslege plikter og rettar, og at den både i ande
og bokstav er i samsvar med konvensjonen. Samstundes meiner komiteen at
med utgangspunkt i kravet om vitskapleg fakta, kan Noreg med fordel
leggje større vekt på konvensjonen sitt krav om
at det skal takast omsyn til konsumentane av kvalprodukt og kvalfangstnæringa, både
når det gjeld arbeidet i IWC og når det gjeld
den nasjonale forvaltinga.
Etter moratorie-vedtaket i 1982 har kommisjonen berre
forvalta såkalla urinnvånerfangst. Komiteen vil
peike på at Noreg sidan 1982 har arbeidd for å få kommisjonen
til å ta opp att sitt forvaltingsansvar.
Komiteen syner til at Noreg stogga
vågekvalfangsten i 1987. I perioden 1988-1992
vart det utført ein avgrensa fangst for forskingsformål,
og ny kunnskap om talrikdomen til vågekvalbestanden vart framskaffa.
På bakgrunn av denne nye kunnskapen og ferdigstillinga
av den reviderte forvaltingsprosedyren (RMP) utvikla av den vitskaplege
komiteen til IWC, avgjorde Regjeringa i 1992 å taka opp
att den ordinære vågekvalfangsten i 1993. Dette
var eit einsidig tiltak sidan det ikkje hadde lukkast å få IWC
til å fungere i samsvar med konvensjonen.
Komiteen vil vidare syne til
at IWC ikkje har iverksett RMP trass i eit samrøystes råd
frå den vitskaplege komiteen. Ei slik iverksetting av RMP
ville gjort kommisjonen i stand til å fastsetje kvoter
for dei bestandane som kan haustast.
Komiteen har merka seg at Noreg
sitt einsidige tiltak om å ta opp att kommersiell vågekvalfangst, resulterte
i ei anna haldning og ein ny dimensjon både utanfor og
i kommisjonen. Noreg fekk i stor grad aksept og respekt for gjenopptakinga
av fangsten. Fleire aktørar gjekk frå eit bastant
nei til berekraftig fangst til eit meir nyansert standpunkt om kor
mykje og under kva omstende dei kunne akseptere fangst i framtida.
Komiteen syner til at i kommisjonen
kom denne endringa til uttrykk i arbeidet med eit revidert forvaltingsregime
(RMS), som skulle omfatta både RMP og kontroll og mekanismar
for overvaking. Noreg tok på dåverande tidspunkt
aktivt del i RMS-tingingane. Komiteen er skuffa over
at eit fleirtal i kommisjonen ikkje har delteke i RMS-tingingane
med den målsetjing å fullføre og iverksette
RMS. RMS-tingingane har no gått føre seg i 12 år,
i tillegg til dei 10 åra med tingingar før RMS-prosessen
starta.
Komiteen syner vidare til at
situasjonen i IWC vart endå meir forverra i 2003 då det
vart oppretta ein eigen vernekomité, og at dette vil kunne
føre til ei endå større endring av IWC
si verksemd i retning av meir fokus på vern i staden for
berekraftig forvalting.
RMP har ei øvre grense for bestandstilvekst
på 1 pst. av den delen av bestanden som er eit år
eller eldre. Komiteen har merka seg at Regjeringa
meiner denne grensa er feil og at bestandstilveksten er på minimum
2 pst., og at mange ville argumentere for 4 pst. tilvekst. Den vitskaplege
komiteen i IWC kan ikkje endre RMP utan instruks frå kommisjonen.
Ein slik instruks vert avgjort med simpelt fleirtal.
Komiteen meiner at over 20 års
intensivt arbeid syner at det over tid har vore vanskeleg å få IWC
til å fungere i samsvar med konvensjonen. Den seinare tids utvikling
i IWC og dei avgrensingane som vert lagt på den vitskaplege
komiteen, syner at det i praksis vil vere vanskeleg å få IWC
i nær framtid til å utføre det forvaltingsansvar
som konvensjonen legg på kommisjonen.
Komiteen meiner difor at Noreg
må syte for at våre plikter under konvensjonen
vert oppfylte, og at tida er inne for at Noreg tek eit nytt steg
og iverkset økosystembasert forvalting av kvalbestandane. Komiteen er
uroa over korleis IWC har utvikla seg, men meiner likevel at Noreg
framleis skal arbeide konstruktivt i kommisjonen, t.d. ved å ta
del i ein revisjon av RMP.
Komiteen meiner vidare at Noreg
skal arbeide for at Den internasjonale kvalfangstkommisjonen igjen byrjar å fungere
i samsvar med Den internasjonale konvensjonen for regulering av
kvalfangst og i samsvar med FN sin havrettskonvensjon.
Komiteen meiner òg at
det vil vere positivt om Noreg styrker det regionale samarbeidet
med omsyn til forsking, bevaring og forvalting i Den nordatlantiske sjøpattedyrkommisjonen.
Den internasjonale kvalfangstkommisjonen har årlege
møter. Dette er både kostnads- og tidkrevjande, særleg
sett i lys av fråveret av ei positiv utvikling. Forretningsreglane
avgjer kor ofte og når kommisjonen skal møtast.
Desse reglane kan endrast med simpelt fleirtal. Komiteen vil
peike på at det under fleire internasjonale avtaler vert
halde partskonferansar kvart andre eller tredje år, t.d.
under Konvensjonen om biologisk mangfald og Konvensjonen om internasjonal handel
med trua dyre- og planteartar. Komiteen meiner på denne
bakgrunn at Noreg skal arbeide for at dei årlege møta
i Den internasjonale kvalfangstkommisjonen skal erstattast av konferansar
for dei kontraherande partane kvart andre eller tredje år.
Den nordatlantiske sjøpattedyrkommisjonen
(NAMMCO) vart oppretta i 1992 gjennom ein avtale mellom Færøyane,
Grønland, Island og Noreg og er i samsvar med FN sin konvensjon.
Komiteen har merka seg at ein
motivasjon for opprettinga av NAMMCO var at IWC ikkje ivaretok sine
forvaltingsmessige forpliktingar.
Komiteen syner til at Regjeringa
meiner at NAMMCO har utvikla seg til eit kompetent og effektivt organ,
og at medlemslanda har forbetra forvaltinga av fleire sjøpattedyrbestandar
gjennom dette samarbeidet.
Komiteen er nøgd med
at NAMMCO set søkelyset på økosystembasert
forvalting, og at NAMMCO sin vitskaplege komité har vesentleg
kompetanse både når det gjeld å vidareutvikle
RMP og å utvikle naudsynt metodikk for bruk av DNA-registeret
til bestandsvurderingar. Komiteen meiner det er naudsynt å nytte
seg av denne kompetansen. Komiteen ser det vidare
som ønskjeleg at Regjeringa held fram med å arbeide
for å få Canada og Russland til å tiltre
NAMMCO-avtalen.
Komiteen meiner vidare at sidan
det har vist seg vanskeleg å få IWC til å forvalte
dei kvalbestandane som kan haustast, så bør det
vurderast å styrke forvaltinga av desse bestandane i NAMMCO.
NAMMCO bør òg styrkast når det gjeld
forvalting av dei ulike selartane.
Komiteen syner til at Den internasjonale
konvensjonen for regulering av kvalfangst ikkje tillet Den internasjonale
kvalfangstkommisjonen å fordele fangstkvotar mellom land.
Historisk førte dette til kappfangst innanfor totalkvotane,
såkalla olympisk fangst. Resultatet var overkapasitet og
dårleg lønsemd.
Komiteen trur det er viktig å fordele
fangstkvotar mellom land når fleire land haustar av den
same bestanden, som ein garantist mot overbeskatning.
Komiteen trur det kan vere ønskeleg
at fastsetjing av totale fangstkvotar og fordeling av fangstkvotar mellom
Noreg og andre land finn stad i NAMMCO.
Komiteen fremjer følgjande
framlegg:
"Stortinget ber Regjeringa vurdere
om Den nordatlantiske sjøpattedyrkommisjonen kan gjevast
ei aktiv oppgåve i fastsetjinga av totale fangstkvotar
og fordelinga av fangstkvotar mellom Noreg og andre land."
Komiteen syner til at formålet
til Konvensjonen om internasjonal handel med trua dyre- og planteartar (CITES)
er å sikre at internasjonal handel med ville dyr og planter
ikkje truar artane si overleving. CITES er ikkje ein forvaltingsorganisasjon,
men ein konvensjon for regulering av handel.
Ulike handelsrestriksjonar gjeld for dei artane
som er ført opp i tre vedlegg, såkalla appendiks,
til avtalen.
Komiteen har merka seg at appendiks
I omfattar artar som er trua av utrydding og som det difor i praksis er
eit forbod mot internasjonal handel med, medan appendiks II omfattar
artar som ikkje er direkte trua, men som kan verte det om ikkje
handelen er strengt regulert. Handel med slike artar krev eksport-
og importlisensar frå dei respektive styresmaktene. Appendiks
III omfattar artar som einskildstatar har verna, og der andre statar
må samarbeide for at vernet skal vere effektivt. Dei kontraherande
partane kan ta atterhald til oppføring av artane på dei
ulike appendiksa. Slike atterhald kan takast i eit kort tidsrom etter
oppføring av ein art, og ved tilslutning til konvensjonen.
For å introdusere nye atterhald til allereie lista artar,
må ein stat melde seg ut av CITES og så inn igjen med
eit endra sett av atterhald.
Komiteen har vidare merka seg
at Noreg har teke atterhald for oppføringa av vågekval,
finnkval, seikval og spermkval i norske farvatn på appendiks
I, og at Noreg såleis kan eksportere produkt frå desse
kvalartane.
Komiteen meiner at oppføringa
av vågekval som ein utryddingstrua art på appendiks
I er gale, og merka seg at Noreg har lagt fram framlegg på tre
partsmøte om å flytte den nordaustatlantiske bestanden
av vågekval frå appendiks I til appendiks II. Komiteen syner
til at framlegget vart støtta av eit simpelt fleirtal ved
partsmøta i 1997 og 2000, men at kravet er 2/3 fleirtal
for å verte vedtatt.
Komiteen vil peike på at
det er dei tonesetjande motstandarlanda i IWC som òg frontar
motstanden i CITES. Desse landa syner til IWC sitt moratorium på kvalfangst,
og meiner difor at CITES ikkje kan flytte vågekval frå appendiks
I til appendiks II.
Komiteen meiner at partsmøtet
til CITES må ta ei sjølvstendig avgjerd i samsvar
med CITES sine eigne prosedyrar og seier seg lei for at CITES ikkje
fungerer i samsvar med den inngåtte avtalen, men har lagt
seg på same folkerettsstridige line som IWC.
Komiteen meiner det er viktig å oppretthalde
dei atterhalda Noreg har i CITES.
Noreg har drive eit aktivt arbeid for å informere omverda
om norsk ressursforvalting, og i særleg grad forvaltinga
av sjøpattedyra. Komiteen er samd med Regjeringa
i at denne informasjonsverksemda må halde fram, og at Noreg
framleis går i bresjen i forsvaret av prinsippa om vern
og berekraftig hausting av naturen sitt overskot.
Komiteen har merka seg at denne
informasjonsverksemda har ført til resultat. Ein har fått
meir og meir aksept og respekt for Noreg sin sjøpattedyrpolitikk. Trass
i sterke truslar om det motsette, har komiteen merka
seg at norsk fangst ikkje har ført til vesentlege negative
konsekvensar for korkje norsk eksport, industri eller turisme. Forsøk
på forbrukarboikottar har ikkje ført fram.
Komiteen syner til at norsk fiskerinæring,
som kan vere særleg utsett for slike boikottar, ikkje fryktar negative
reaksjonar i marknadene ved ein meir offensiv sjøpattedyrpolitikk.
Næringa meiner at eventuelle reaksjonar er det mogleg å handtere
med sakleg informasjon.
Komiteen har merka seg at den
internasjonale mediedekkinga av norsk sjøpattedyrpolitikk
vert stadig meir sakleg, og oftare positivt vinkla.
Komiteen syner til at Regjeringa
samarbeider med organisasjonar med samanfallande synspunkt om denne
informasjonsverksemda, og at desse mottek økonomisk støtte
til dette arbeidet, at Regjeringa skal vidareføre det gode,
konstruktive samarbeidet med organisasjonar med samanfallande synspunkt.
Komiteen har merka seg at det
er mest merksemd om norsk kvalfangst i samband med dei årlege
møta i Den internasjonale kvalfangstkommisjonen. Desse møta
er eit årleg høve for motstandarane å mobilisere og å få mediedekking.
Tilsvarande gjev desse møta Noreg lett tilgang til internasjonale
media og såleis eit godt høve til å informere
omverda.
Komiteen er samd med Regjeringa
i at i lys av kor viktig fiske og fangst er for norsk økonomi,
så er det viktig å vidareføre arbeidet
med informasjon om norsk ressursforvalting. Denne informasjonsverksemda
er særskild viktig når Noreg no går over
til økosystembasert forvalting av sjøpattedyrbestandane.
Komiteen vil peike på at
fangstnæringane har vore utsett for særs harde åtak
som har ramma næringane økonomisk og dermed gitt
redusert lønsemd. Boikottaksjonar og importrestriksjonar
reduserte marknaden for selskinn dramatisk, og forbod mot kvitungefangst reduserte
fangsteffektiviteten vesentleg.
Komiteen vil vidare peike på at
i strid med artikkel XX i GATT-avtalen forbyr USA import av alle
ulike slag selprodukt og at EU forbyr import av selungeskinn og
varer framstilt av selungeskinn.
Komiteen meiner at Noreg må arbeide
for å tryggje rettmessig tilgang for norske selprodukt
til utanlandske marknader. Det multilaterale handelssystemet, etablert
gjennom WTO-regelverket, er ein viktig garantist mot vilkårligheit,
proteksjonisme og den sterkaste si rett. Det er viktig å sikre
at handelsreglane vert etterlevd. Komiteen vil vidare
syne til at i fall bilaterale samtaler ikkje fører fram,
så er det mogleg å finne fram til løysingar
knytt til importrestriksjonar på selprodukt i WTO sitt
tvisteløysingsorgan.
Komiteen vil vidare syne til
at stoggen i vågekvalfangsten og den sterkt reduserte fangsten,
hadde som verknad at marknaden ikkje vart tilført kvalprodukt,
og såleis forsvann etter kvart òg etterspørselen.
Noreg sitt sjølvpålagte eksportforbod stogga tilførselen
av norske kvalprodukt til den japanske marknaden. Det generelle verkemiddelapparatet
bør slik komiteen ser det, prioritere dei
utfordringane næringa har i høve til produktutvikling,
vidareutvikling og marknadsføring. Komiteen har
merka seg at Noreg oppheva det sjølvpålagte eksportforbodet
for kval i 2001. Norsk eksport av kvalprodukt er i samsvar med dei
folkerettslege rettane og pliktane. Vi har noko eksport til Island og
Færøyane og komiteen er nøgd
med at Regjeringa har lagt ned arbeid for å få tilgang
til den store og godt betalande japanske marknaden, som vil kunne etterspørje
biprodukt som spekk, sporar, innvollar. Komiteen ønskjer
at Regjeringa intensiverer arbeidet med å få tilgang
til den japanske marknaden.
Komiteen har merka seg at noverande
vågekvalfangst på 600-700 dyr gjev om lag 1 000
tonn kjøt, som tilsvarar om lag 200 g kvalkjøt
pr. innbyggjar. Kvalkjøtprodusentane meiner eit så lite
volum gjer det vanskeleg med effektiv marknadsføring, produktutvikling
og distribusjon, og det kan vere vanskeleg å oppfylle matvarekjedene
sitt krav om jamn, kontinuerleg tilførsel av kjøt. Komiteen vil
peike på at det er eit vesentleg problem for kvalnæringa
at ein god del matvarebutikkar ikkje fører kvalkjøt,
og at næringa først må ha tilgang på meir
råstoff, m.a.o. auka fangst, før marknadene kan
utviklast vidare.
Hovudproduktet frå sel er skinn, men
det vert òg produsert olje frå selspekk. Hovudproduktet
frå kval er kjøt. Komiteen har
merka seg at forskarane har kome fram til at kjøt og spekk
av sjøpattedyr er særs velegna som mat. Det inneheld
særs mange viktige næringsstoff, og innhaldet
ligg langt over dei kjøttprodukt ein får av landdyra.
Det er derfor viktig at dette vert utnytta.
Komiteen har vidare merka seg
at forskinga meiner at ein gjennom meir forsking og produktutvikling
kan framstille nye og helsefremjande produkt. Dette er i seg sjølv
verdfullt, men det vil òg gjere næringa lønsam
på sikt.
Det er mange ulike produkt som kan utviklast
frå sjøpattedyr. Komiteen har merka
seg at for 2004 har Innovasjon Norge og Fiskeri- og havbruksnæringens forskningsfond
(FHF) sett i gang eit selprogram med ei økonomisk ramme
på 3,2 mill. kroner. Dette programmet omfattar m.a. forsking
og utvikling for å kunne auke verdiskapinga ved å utnytte
selspekket betre, auka satsing på design, trendar og motar,
og utvikling og tilpassing av skuter til bruk i selfangst.
Komiteen har vidare merka seg
at Eksportutvalet for fisk (EFF) står for den generiske
marknadsføringa av kvalkjøt i Noreg, og at Reklameutvalet
for småkvalkjøt kjøper desse tenestene
av EFF i staden for å byggje opp ein eigen marknadsorganisasjon.
Kvalnæringa, ved både fangst- og produksjonsleddet,
finansierer Reklameutvalet for småkvalkjøtt.
Komiteen er særs nøgd
med at dei lovoppnemnde instansane Fiskeri- og havbruksnæringens
forskningsfond og Eksportutvalet for fisk er involvert i forsking, utvikling
og marknadsføring i samband med sjøpattedyr. Særleg
sjøpattedyrnæringane har trong for den kompetansen
som desse instansane sit på.
Komiteen har merka seg at kvalnæringa
i dag er ei lønsam næring, men med eit mykje større
potensial dersom ein aukar uttaket, tar forvaltingsmessige omsyn,
driv produktutvikling og marknadsføring. Særleg
har spekk eit stort potensial i den japanske marknaden.
Det er om lag 30-35 kombinerte fiske- og fangstfarty, gjennomsnittleg
65 fot i lengd, som deltek i fangsten. Om lag 20 pst. av årsinntekta
kjem frå kvalfangsten, men i 2003 med låge fiskekvotar
og prisar utgjorde kvalfangsten 33 pst. av inntekta. Komiteen vil understreke
at kostnadane ved kvalfangst er større enn ved andre fiskeri,
og såleis er kvalfangsten sin del av nettoinntekt lågare
enn nemnde del av bruttoinntekt. Komiteen registrerer
med glede at det er nokså stor fornying av kvalfangstflåten.
Komiteen har merka seg at vågekvalkvota
i år er på 670 dyr, at det i fjor vart fanga 647
dyr og at det var offentlege inspektørar om bord under
heile fangsten. Fartya må dekke kostnader til kost for
inspektørane.
Komiteen vil peike på at
om eit farty har trong for inspektør utover det tal døgn
som Fiskeridirektoratet betaler, så må det sjølve
bere desse kostnadene. Kravet til inspektør om bord under
heile fangsten kan gjere fangsten mindre effektiv og dermed mindre
lønsam, t.d. ved at fartya må seie i frå på førehand
når dei treng inspektør. Det kan hindra farty
frå å drive fangst når tilhøva
ligg til rette for det fordi det ikkje har inspektør om
bord. Komiteen er såleis samd i Regjeringa
sitt framlegg om å erstatte inspektørordninga
med elektronisk overvaking, og trur at elektronisk overvaking er betre
enn inspektørordninga då den menneskelege faktoren
vert eliminert. Dette krev samstundes at elektronikken fungerer
utan tekniske feil.
Komiteen har merka seg at totalkvotane
vert fordelt på ulike kvoteområde, og at det einskilde
farty berre kan fanga i tildelt kvoteområde. Dette kan
føre til ekstra kostnader med transport til og frå kvoteområde. Dessutan
kan naturlege tilhøve som beitegrunnlag og ver gjere at
fangsteffektiviteten og dermed lønsemda i eit kvoteområde
vert dårlegare enn i andre.
Komiteen har vidare merka seg
at dei to kvoteområda for Barentshavet i år vert
forvalta som eitt kvoteområde.
Så lenge dei vitskaplege omsyna er
ivaretatt, er komiteen positivt innstilt til at forvaltinga
av vågekvalfangsten tek omsyn til effektiviteten og lønsemda.
Komiteen registrerer at det vert
hevda at det ikkje finst vitskapleg grunnlag for å oppretthalde
kvoteområdet for Spitsbergen, men at det vert gjort ut
frå eit ønske om å vere sikker på at
fangsten vert jamt distribuert. Nokre hevdar at kvoteområdet
Spitsbergen bør innlemmast i kvoteområdet Barentshavet
og at ein i alle tilfelle vil få ei naturleg fordeling
av fangsten på grunn av beite- og vêrtilhøve.
Komiteen syner til at dei tradisjonelle
fangstområda, i tillegg til norske farvatn, til
dels omfatta russisk, islandsk, britisk, færøyisk
og grønlandsk sone, og internasjonalt farvatn.
Komiteen syner vidare til at
det eksisterande vågekvalestimatet omfattar desse områda.
Komiteen ber om at det vurderast
om norske kvalfangarar kan få tilgong til fangst i internasjonale
farvatn i Norskehavet.
Norges Råfisklag har dei siste åra,
for å lette førstehandsomsetninga, krevd at fartya
må levere kjøt i fleire omgangar, og det kan verte
stilt krav til liggetid før dei tek opp att fangsten igjen. Komiteen syner
til at salslaga har kompetanse på førstehandsomsetninga,
men registrerer at slike reguleringar kan føre til redusert fangsteffektivitet
og lønsemd. Fangstleddet, kjøparkorpset, salslaga
og Fiskeridirektoratet må samarbeide for å kome
fram til ordningar som syter for mest mogleg lønsemd i
næringa.
Komiteen meiner at kvalfangstsfarty
bør ha høve til å oppbevare råstoff
best mogleg, inklusiv frysing, og at det vert vurdert å gje
ein avgrensa, restriktiv tilgang til ombordproduksjon.
Komiteen meiner at rammevilkåra
må vere slik at kvalfangsten kan halde fram å vere
lønsam og subsidiefri, og då er det m.a. naudsynt
med auka fangst og vidareutvikling og konstruktivt samarbeid mellom
dei ulike aktørane.
Komiteen har merka seg at som
toppredatorar i den marine næringskjeda er sjøpattedyr
særs utsett for framandstoff som t.d. PCB (både
dioksin-like og andre) og kvikksølv. Nokre av desse vert
akkumulert i sjøpattedyra.
Alder er ein av fleire faktorar som har innverknad
på innhaldet av framandstoff i det einskilde dyr. Komiteen syner
til at i sjøpattedyrbestandar som ikkje vert hausta, m.a.o.
nullkvoter, vert bestandane regulert av avgrensande faktorar i økosystemet.
Ei slik forvalting vil føre til høgare gjennomsnittsalder
i bestandane og såleis fleire individ med høge
konsentrasjonar av framandstoff. Komiteen vil
ikkje utelukke at òg det motsette er tilfelle, m.a.o. at
ei forvalting mot ein bestandsstorleik som gjev maksimum avkastning
(MSY-nivå) kan føre til lågare gjennomsnittsalder
i bestandane og såleis fleire individ med lågare
konsentrasjonar av framandstoff. Om dette er tilfelle, så er
det i seg sjølv eit sjølvstendig argument for
ei forvalting som har MSY-nivå for bestandane som målsetjing.
Komiteen har merka seg at andre
faktorar som fødeval, kjønn, reproduksjonsstatus
og tid på året òg har innverknad på konsentrasjonane
av framandstoff i produkta frå sjøpattedyr. Gjennom
forvaltinga av haustinga av sjøpattedyr kan ein såleis
ta grep for å redusere konsentrasjonane av framandstoff
i produkta. Komiteen meiner det er naudsynt å undersøkje
desse samanhengane og å ta forvaltingsmessige grep.
Komiteen syner til at Mattilsynet
har gjeve kosthaldsråd til gravide og ammande om ikkje å konsumere
sel- og kvalkjøt på grunn av kvikksølvinnhald. Når
det vert gjeve kosthaldsråd, er det særs viktig å framskaffe
data om den samanhengen som ein trur ligg føre. Komiteen vil
peike på at kosthaldsråd kan ha verknad på marknaden
og såleis lønsemda i dei råka næringane.
Komiteen er samd i Regjeringa
sitt framlegg om å auke fangstkvotane vesentleg for bestandane
av grønlandssel i høve til noverande nivå.
Kvotane på grønlandssel har i lita grad vore hausta
dei siste åra. Komiteen meiner utfordringa
er å legge tilhøva til rette for auka fangst. Komiteen vil
vise til at norske forskarar hevder at ein har for liten kunnskap
om grønlandssel. Komiteen meiner derfor
at Regjeringa bør vurdere å sette i gang eit forskingsprogram
for innhenting av meir kunnskap om grønlandssel.
Fleirtalet i komiteen,
alle unnateke medlemen frå Senterpartiet, har forståing
for at næringa ynskjer å driva fangsten mest mogelg
effektivt. Det er imidlertid ikkje særleg etterspurnad
etter pelsen av kvitungar, samstundes som fangst av kvitungar er
problematisk i høve til opinionen. Fleirtalet vil
derfor ikkje støtte ei oppheving av forbodet mot fangst
av kvitungar.
Medlemene i komiteen frå Framstegspartiet har
merka seg at selfangstnæringa ønskjer å hauste
kvitungar for slik å få ein effektiv fangst. Nokon slik
fangst er tillate utafor det tidsavgrensa forbodet. I høve
til avlivingsmetodar, er fangst av diande ungar svært effektivt.
Kvitungar vert i dag hausta av russarane i Kvitsjøen, og
skinna vert omsett m.a. i den russiske marknaden. Desse medlemene trur
difor det er mogleg å utvikle ein marknad for kvitungeskinn.
Desse medlemene har merka seg
at det tidlegare var særs stor motstand mot fangst av kvitungar. Desse medlemene trur
at for brorparten av motstandarane av selfangst er det irrelevant
om det vert fanga diande ungar, ikkje-diande ungar, ungar, vaksne
eller gamle dyr. Vidare meiner desse medlemene at
det kan vere tenleg med frie fangstkvotar på grønlandssel
i ein periode.
Desse medlemene meiner at det
er omsynet til norsk ressursforvalting som skal vere avgjerande.
Desse medlemene trur at med ei
offensiv informasjonverksemd er det mogleg å informere
den såkalla opinionen om at kvitungefangst er særs
effektivt, humant og ressursmessig tilrådeleg. Denne såkalla opinionen
er ofte ikkje meir enn nokre få grupperingar som har eit
høgt støyvolum, og som meiningsmålingar syner
ofte ikkje framfører representative synspunkt. Desse
medlemene vil i tillegg peike på at dersom norsk
sjøpattedyrpolitikk skal ta utgangspunkt i kva ein trur
er akseptabelt eller ikkje for denne opinionen, så er det
vanskeleg å vite kvar grensene skal settast.
Som ei prøveordning for å undersøke
fangsteffektivitet og for å utvikle og teste marknader,
meiner desse medlemene at det bør vere høve
til å hauste kvitungar.
Desse medlemene syner vidare
til at det tidlegare vart fanga grønlandssel om ettersommaren
og hausten. Skinna i denne perioden kan vere av god kvalitet. Grønlandsselen
har på denne tida beita heile sommaren, og har difor eit
tjukt spekklag som gjer at den kan flyte etter avliving. Eit tjukt
spekklag er av interesse når det gjeld utvinning av olje
frå spekket. I tillegg er det rimeleg å tru at
konsentrasjonane av framandstoff er relativt lågare ved
tjukt enn tynt spekklag. Desse medlemene meiner difor
det bør vere tilgang til heilårleg fangst av grønlandssel.
Desse medlemene fremjar følgjande
framlegg:
"Stortinget ber Regjeringa som ei
prøveordning fram til 2009 å tillate heilårleg
hausting av grønlandssel i alle aldrar og farvatn for å undersøke
fangsteffektivitet og for å utvikle og teste marknader."
Komiteen har merka
seg at selnæringa er oppretthalden gjennom stimuli i form
av offentlege subsidiar på omlag 10-13 mill. kroner årleg,
og at Regjeringa meiner at selnæringa i lang tid framover
vil vere avhengig av økonomiske støtteordningar.
Fleirtalet i komiteen,
alle unnateke medlemene frå Sosialistisk Venstreparti og
Senterpartiet, tykkjer at Regjeringa sitt framlegg om å erstatte subsidiane
til fangstskutene med "kvotebonus", m.a.o. betaling i form av fiskekvotar,
er interessant. Logikken er at selnæringa får
noko av den gevinsten som kjem i form av økte fiskekvotar,
medan resten av fiskerinæringa får resten. Fleirtalet meiner
det er viktig at kvotebonus vert utforma slik at den kan medverke
til stabile og gode økonomiske rammevilkår som
gjer det økonomisk interessant å hauste sel.
Fleirtalet meiner Regjeringa
må ta omsyn til synspunkta frå fiskerinæringa
når det gjeld utforminga av kvotebonus, idet denne ordninga
har verknad på fiskeria.
Fleirtalet vil peike på at
ein må få den eksisterande flåten til å fatte
interesse for selfangst slik at ein kan unngå å byggje
opp ein ny selfangstflåte som vil krevje kvoter av andre
fiskeslag for å kunne overleve. Fiskefartøy som
vil ta del i selfangst, bør få tilskot til å byggje
om slik at selfangst er mogleg.
Fleirtalet har merka seg at meldinga
seier at det skal ytast økonomisk støtte til produktutvikling, vidareforedling
og marknadsføring. Fleirtalet meiner at
i lys av at fiskerinæringa hjelper til gjennom kvotebonus,
er det naturleg at òg styresmaktene i større grad
forpliktar seg økonomisk. Eit spleiselag er ønskjeleg. Fleirtalet trur
det i ei lang tid framover vil vere naudsynt med tilskot både
til investeringar, fangst, forsking, produktutvikling og marknadsføring.
Medlemene i komiteen frå Sosialistisk Venstreparti
og Senterpartiet meiner at den drøfta ordninga
med kvotebonus ikkje er eit eigna verkemiddel for å få opp
deltakinga og lønsemda i selfangsten. Det er blitt peika
på faren for at selfangst blir eit "nødvendig
onde" for å få kvoterettar i andre fiskeri.
Desse medlemene meiner styresmaktene
bør ta eit medansvar i forhold til produktutvikling, vidareforedling
og marknadsføring i fiskeria som sådan, og i denne
samanhengen i forhold til selfangsten. Det vil i overskueleg framtid
vere behov for offentleg tilskott til selfangst, og desse
medlemene meiner andre næringspolitiske verkemiddel
som Regjeringa skisserer i meldinga, ikkje må komme som
erstatning for tilskott til selfangst over Fiskeriavtalen.
Komiteen syner til St.meld. nr.
27 si omtale av førekomstane av kystsel og dei problema
som kystsel fører til.
Komiteen syner vidare til handsaminga
av Dokument nr. 8:65 (2001-2002) den 16. mai 2002, der Stortinget
gjorde følgjande vedtak:
"Stortinget ber Regjeringa så snart som
mulig om å utrede og fremme forslag til løysningar
av problema med kystsel. I vurderinga må følgjande
inngå: -
Økte fangstkvoter på kystsel,
- Innføring av økonomisk
tilskot for fangst av kystsel og
- Muligheiter for bearbeiding og sal av
selprodukt."
Komiteen vil peike på at
kystsel er vertsdyr for torskekveis. Kveis legg egg i selen sin
magesekk, desse egga søkk til botn og vert etne av krepsdyr.
Fisk vert infisert når dei et slike krepsdyr eller mindre
fisk som er infisert. Hjå fisken finn ein kapslar av kveis
på filet. Ein finn kveis i torsk og anna botnfisk.
Komiteen har merka seg at for
den tradisjonelle fiskeindustrien er det tidvis store utfordringar
knytt til kystsel og kveis. Kveis må fjernast ved produksjon, noko
som er arbeidskrevjande og reduserer utnyttinga av kvar fisk. Dette
reduserer lønsemda til fiskeindustrien.
Komiteen er òg uroa
over at kveis kan gje ei negativ oppleving for fritidsfiskarar og
turistfiskarar, og at dette på sikt kan føre til
ei uheldig utvikling for fisketurisme. Dette kjem i tillegg til
problema for fiskerinæringa.
Komiteen vil peike på at
kystsel òg konsumerer fisk. Det ligg føre noko
kunnskap for avgrensa område. Kystsel kan òg føre
til skader på fiskereiskapar. Vidare kan kystsel som set
seg fast i fiskereiskap kunne verte påført lidingar
og drukne.
Komiteen meiner at førekomstane
av kystsel må reduserast for å avgrense dei problema
som den lagar til.
Fleirtalet i komiteen,
alle unnateke medlemen frå Senterpartiet, er samd i Regjeringa
sitt framlegg om å gje utlendingar tilgang til å ta
del i jakt på kystsel, under føresetnad av at
dei formelle kunnskapskrava er møtt. Fleirtalet trur
at jakt på kystsel kan vere ei spanande utfordring for
utanlandske jegerar, og at ei slik jakt vil kunne bidra til å nå målsetjinga
om reduserte lokale førekomstar av kystsel. Fleirtalet vil presisere
at ein må syte for at turistjakt på sel berre foregår
der aktørane har tilstrekkeleg kunnskap om avlivingsmetodar.
Komiteen syner til
at estimatet for vågekval i norske farvatn er rekna til
107 205, og at dette punktestimatet har eit 95 pst. konfidensintervall
på 83 000-138 400. Nye estimat vert lagt fram om lag kvart
sjette år. Vågekval er den einaste kvalarten som
Noreg no haustar.
Komiteen merkar seg at denne
talrikdomen er akseptert av den vitskaplege komiteen til Den Internasjonale
Kvalfangstkommisjonen, og såleis at estimatet er rekna
i samsvar med gjeldande prosedyrar.
Komiteen har merka seg at vågekvalkvota
i år er på 670 dyr, og at det i fjor vart fanga
647 dyr.
Komiteen syner til at Regjeringa
seier at det er eit potensial for auka vågekvalkvoter ved å leggje likevektshaustinga
i 1960-1980-åra til grunn, og at vågekvalkvota
er relativt varsam i høve til kva som truleg er biologisk
forsvarleg.
Komiteen syner vidare til at
det i ein 20-årsperiode frå 1963 til 1982 vart
fanga om lag 1 800 dyr i gjennomsnitt.
Komiteen merkar seg at detaljerte
vitskaplege undersøkingar gjev gode grunnar til å tru
at denne fangsten var berekraftig, og at det ikkje er nokon grunn til å tru
at vågekvalen sitt beitegrunnlag er dårlegare
i dag enn i desse 20 åra.
Komiteen merkar seg vidare at
Regjeringa seier at eit årleg uttak på 1 800 dyr
fram til eit nytt bestandsestimat vert lagt fram (truleg i 2008),
ikkje vil setje bestanden i fare. Eit slikt uttak vil maksimalt
fjerne 9 000 dyr av bestanden.
Komiteen er samd med Regjeringa
i denne vurderinga.
Komiteen merkar seg at sjølv
om ein tek utgangspunkt i den nedre delen av konfidensintervallet,
så vil truleg ikkje eit slikt uttak setje bestanden i fare.
Fleirtalet i komiteen,
alle unnateke medlemen frå Sosialistisk Venstreparti, har
vidare merka seg at eit årleg uttak på 1 800 dyr
utgjer mindre enn 2 pst. av punktestimatet på 107 205 individ
i bestanden, og at eit slikt uttak såleis er lågare
enn bestanden si minimumstilvekst på 2 pst.
Fleirtalet syner til at prosedyrane
med regelmessige bestandsestimat inneber mekanismar for tilbakemelding
om stoda i bestanden. Slik tilbakemelding med ny kunnskap gjev høve
for å justere det framtidige uttaket i høve til
dei forvaltingsmessige målsetjingane.
Fleirtalet merkjer seg såleis
at det ikkje er naudsynt å vite på noverande tid
om bestanden vil tole eit tilsvarande uttak i mange år
utover det neste bestandsestimatet.
Fleirtalet trur at eit høgare årleg
uttak i ein prøveperiode vil kunne vere nyttig i høve
til å teste og å utvikle den reviderte
forvaltingsprosedyren utarbeidd av den vitskaplege komiteen til
Den internasjonale kvalfangstkommisjonen. Ei slik testing og vidareutvikling
av denne prosedyren kan òg gå føre seg
i den vitskaplege komiteen til Den nordatlantiske sjøpattedyrkommisjonen.
Fleirtalet meiner difor at i
lys av eksisterande vitskapleg kunnskap, og av omsyn til målsetjinga
om økosystembasert forvalting og marknad, at det årlege uttaket
må aukast vesentleg fram til det ligg føre eit nytt
bestandsestimat.
Fleirtalet ønskjer at
ei slik forvalting skal setjast i verk snarast råd og at
rammevilkåra vert slik at det er mogleg å få til
eit slikt uttak.
Fleirtalet fremjar følgjande
framlegg:
"Stortinget ber Regjeringa snarast
råd auke det årlege uttaket av vågekval
vesentleg i høve til dagens nivå, og i tråd
med tilrådingar frå norske forskarar."
Medlemene i komiteen frå Sosialistisk Venstreparti meiner
det er mogleg å finne fram til ein forsvarleg forvaltningsstrategi
som gir vesentleg høgare kvotar enn det den noverande forvaltningsstrategien
utarbeidd av vitskapskomiteen til den Internasjonale Kvalfangstkommisjonen
(RMP) gir, sjølv når denne vert justert så mykje
som mogleg innanfor det området den er uttesta for.
Desse medlemene ynskjer ikkje å setje
kvotar for vågekvalfangst utan i samsvar med ein langsiktig forvaltningsstrategi
som er grundig uttesta og vitskapleg grunngjeve. Med dagens overvaking
er det stor uvisse knytt til dei seksårige bestandsanslaga.
Difor er det naudsynt med ein gjennomtesta strategi for forvalting
av vågekval. Denne forvaltingsstrategien må tåle uvissa
i bestandsanslaga og også uvisse knytt til vågekvalen
sin biologi og miljøet i våre farvatn.
Desse medlemene ber på denne
bakgrunnen Regjeringa syte for at ein forbetra forvaltningsstrategi for
vågekval vert utvikla. Denne strategien bør vera
ein del av strategien for økosystembasert fleirbestandsforvalting
av fisk og sjøpattedyr. Desse medlemene meiner
det er mogleg å monaleg raskt utvida det uttesta justeringsrommet
for Kvalfangstkommisjonens RMP, og ber Regjeringa setje i gang eit
forskingsprosjekt for å finne ut kor mykje dette justeringsrommet
kan utvidast utan å setje vågekvalen i fare på lang
sikt om han vert forvalta etter denne justerte prosedyren.
Desse medlemene fremjar på denne
bakgrunnen følgjande forslag:
"Stortinget ber Regjeringa snarast
råd syte for at det blir utarbeidd ein strategi for vågekvalforvalting
som byggjer på arbeidet i den Internasjonale Kvalfangstkommisjonen
med RMP, slik at det årlege uttaket av vågekval
kan auke monaleg i høve til dagens nivå, så sant
dette kan gjerast på bærekraftig vis i tråd
med tilrådingar frå norske forskarar."
Komiteen ønskjer
at mangfaldet av kvalartar i norske farvatn skal oppretthaldast
med levedyktige bestandar. Dette mangfaldet m.a. omfattar blåkval, finnkval,
knølkval, grønlandskval, spermkval, seikval, spekkhoggar,
grindkval, springar, nise, delfin, tumlar, kvitkval, narkval og
nordleg nebbkval. Komiteen er merksam på at
talrikdomen av desse artane varierer mykje. Medan det truleg ikkje
er meir enn nokre få titals grønlandskval att,
så er førekomstane av t.d. grindkval, springar
og nise særs talrike.
Komiteen deler Regjeringa si
uro over stoda til grønlandskvalen. Komiteen er
samd med Regjeringa i at det er særleg grunn til å få meir
kunnskap om grønlandskval og å utarbeide eigna
vernetiltak. Det kan vere ønskjeleg å gjere tilsvarande òg
for andre artar, t.d. blåkval. Medan blåkval vert
observert regelmessig er det berre nokre titals grønlandskval.
For andre arter, som t.d. seikval, narkval og kvitkval er det tilsynelatande
ikkje nokon kunnskap om talrikdom. Ingen av desse kvalartene vert
hausta.
Komiteen registrerer at det er
varierande kunnskap om kva dei ulike kvalbestandane konsumerer,
kor mykje dei konsumerer av ulike ressursar og kor mykje biomasse
som totalt vert konsumert. Ein årsak er manglande
kunnskap om talrikdomen, men denne kunnskapen vantar i stor grad òg
for einskildindivid.
Komiteen syner til at spekkhoggar
i stor grad følgjer silda sine vandringar og at sild truleg
er det viktigaste byttedyret, at grindkval vert sagt å ete
blekksprut, at ein trur at springar beitar på sild, lodde, tobis
og blekksprut, og at nisa er ein fiskeeter med sild som eit viktig
byttedyr.
Komiteen merkar seg at Regjeringa
meiner at det er ei utfordring å identifisere dei essensielle
interaksjonane mellom sjøpattedyr og kommersielle fiskeslag
og kvantifisere desse slik at dei kan verta innarbeidd i fleirbestandsmodellar
og leggjast til grunn for ei økosystembasert forvaltingsprosedyre.
Ein har relativt mykje kunnskap om den kvalarten som
vert hausta, nemleg vågekval. Komiteen har
det klåre inntrykk at hausting av ein bestand inneber ein dynamikk
som gjev oss kunnskap om denne bestanden. Og tilsvarande at fråver
av hausting fører til lite, eller ingen kunnskap. Komiteen er
samd i Regjeringa sitt syn at det er naudsynt med meir kunnskap
om andre kvalartar enn vågekval. Komiteen meiner
at det bør setjast i verk tiltak for å få slik
kunnskap. Komiteen er merksam på at det
i lys av noverande kunnskap ikkje er mogleg å seie eintydig
kva det langsiktige uttaket av desse artane kan og bør
vere.
Komiteen fremjar følgjande
framlegg:
"Stortinget ber Regjeringa vurdere å opne
for forskingsfangst på andre kvalartar, for slik å leggja
tilhøva til rette for ein større forskingsinnsats
og såleis akkumulering av ønskeleg og naudsynt
kunnskap."
Komiteen syner til at dei vitskaplege,
folkerettslege og realpolitiske tilhøva tilseier at dei økologiske og økonomiske
vurderingane må vere avgjerande for norsk sjøpattedyrpolitikk.
Komiteen vil vidare syne til
at vurderingane av tidsaspektet tilseier at Noreg snarast må iverksetje økosystembasert
forvalting av sjøpattedyrbestandane.
Komiteen meiner at uttaket av
sel og kval har vore for lågt i altfor lang tid, og at
dette har vore skadeleg for norsk verdiskaping, arbeidsplassar og
busetting.
Komiteen meiner det er naudsynt
for Stortinget å nøye følgje utviklinga
av norsk sjøpattedyrpolitikk, og ønskjer at Regjeringa
held Stortinget kontinuerlig oppdatert om utviklinga.
Komiteen meiner at St.meld. nr.
27 (2003-2004) gjev Stortinget eit godt høve til å ta
grep for å få på plass ein framtidsretta, økonomisk
og økologisk sjøpattedyrpolitikk.
Komiteen ønskjer at
Regjeringa skal leggje fram ei ny stortingsmelding om norsk sjøpattedyrpolitikk hausten
2008, eller når det ligg føre eit nytt bestandsestimat
for vågekval i norske farvatn.
Komiteen fremjar følgjande
framlegg:
"Stortinget ber Regjeringa leggje
fram ei ny stortingsmelding om norsk sjøpattedyrpolitikk
seinast hausten 2008, eller når det ligg føre
eit nytt bestandsestimat for vågekval i norske farvatn."