Samferdselsdepartementet gjer i proposisjonen framlegg
om endring av veglov 21. juni 1963 nr. 23 (veglova) § 27 i eit nytt
andre ledd om mellombelse tidsdifferensierte satsar av bompengar.
Departementet legg vidare fram forslag til ei teknisk
endring av veglova si tittel. Tittelen på veglova bryt med den normale
og standardiserte titteloppbygginga som gjeld for lovverket, og departementet
foreslår endring av tittelen etter same oppbygging som i lovverket
elles.
Samferdselsdepartementet legg òg fram forslag til
lovtekniske korrigeringar i lov 18. juni 1965 nr. 4 om vegtrafikk
(vegtrafikkloven) §§ 22 a, 36 og 36 b.
Lovføresegna opnar for at byområde med bompengeinnkrevjing
kan bli gitt moglegheit til å ta i bruk auka mellombelse bompengetakstar
i avgrensa periodar med høg luftforureining utan eit framlegg for
Stortinget. Ordninga er eit verkemiddel som raskt kan setjast i
verk for å få ned forureininga frå biltrafikken i byområda når det
er naudsynt av omsyn til folk si helse.
Utslepp til luft frå vegtrafikken er ei betydeleg kjelde
til forureining og dårleg luftkvalitet i byar og tettstader. I storbyane
er forureininga frå vegtrafikken større enn gjennomsnittet elles
i landet. Dei viktigaste stoffa som påverkar den lokale luftkvaliteten
er svevestøv (PM10, PM2,5)
og nitrogendioksid (NO2). Studiar av
luftforureininga si påverknad på folk si helse har vist at luftforureining
gir uønska helseverknader og at det er ein samanheng mellom eksponering
for luftforureining, som PM10, PM2,5 og NO2,
og dødelegheit og sjukdomar, spesielt luftvegs- og hjarte-karsjukdomar.
God luftkvalitet føreset langsiktig arbeid av
både sentrale og lokale styresmakter.
I medhald av lov 13. mars 1981 nr. 6 om vern mot
forurensninger og om avfall (forurensningsloven) er det i forskrift
om begrensning av forurensning (for-urensningsforskriften) § 7-6
sett krav til maksimale tal for overskridingar av grenseverdiar
for stoff som svevestøv og nitrogendioksid i løpet av eit år. I
nokre byar blir dette brote allereie tidleg på året. I dei større
byane kjem trafikkforureininga frå både riksvegar, fylkesvegar og
kommunale vegar.
Etter forurensningsforskriften § 7-3 første
ledd pliktar eigar av anlegg som bidreg vesentleg til fare for overskriding
av grenseverdiane å sikre naudsynte tiltak for å sikre at desse
blir overhaldne. Utslepp frå trafikk på vegar sjåast under eitt,
uavhengig av kven som eig vegane, jf. § 7-3 fjerde ledd. Etter dette
er ansvaret for høg luftforureining i dei store byane delt mellom
kommunen, fylkeskommunen og Statens vegvesen, jf. veglova § 9. Kommunen
har dessutan eit overordna ansvar til å påleggje gjennomføring av
tiltak for å sikre at krava etter forurensningsforskriften kapittel
7 blir overhaldne, jf. forurensningsforskriften § 7-4.
Vegstyresmaktene har i dag verkemiddel til mellombels
å redusere eller forby trafikk på veg etter vegtrafikklova § 7 andre
ledd. Tiltak som kan setjast i verk er mellom anna innføring av
par- og odde-talskøyring, atterhald overfor dei mest forureinande
køyretøy og andre typar mellombelse forbod.
Veglova § 27 opnar for at det kan krevjast inn bompengar
på offentleg veg. Alle dei største byane i Noreg har per i dag innkrevjing
av bompengar i form av bompengepakker.
Bompengefinansiering krev etter § 27 samtykke frå
Stortinget, og etter føresegna i lova og gjeldande praksis tek Stortinget
i si handsaming av den ein-skilde bompengeproposisjon stilling til det
nærare opplegget for og bruken av midlane frå bompengeinnkrevjinga.
Dersom det er behov for endringar i bompengeopplegget, skal saka handsamast
på nytt av Stortinget.
Vegdirektoratet gjennomførte våren 2011 ei brei offentleg
høyring av eit forslag til ei unntaksføresegn i veglova § 27 som
opnar for takstauke i periodar med høg luftforureining. Verkemidlet må
såleis sjåast som eit mjukare tiltak enn dei tiltaka som heilt eller
delvis nedlegg forbod mot trafikk, jf. vegtrafikklova § 7 andre
ledd.
Etter forslaget blir føresegna i veglova § 27
andre ledd eit unntak frå føresegna om stortingshandsaming i § 27
første ledd.
For å sikre hovudregelen om Stortinget si vedtaksmyndigheit
og at ei unntaksordning ikkje i for stor grad går på kompromiss
mot den vedtekne finansieringsordninga, blir det i forslaget lagt
opp til at departementet fastset dei mellombelse tidsdifferensierte
bompengetakstane for det einskilde byområdet i forskrift. Myndigheit til
å fatte avgjerd om bruken av takstane er lagt til kommunen og fylkeskommunen.
For at opninga for dei mellombelse takstane
ikkje skal bli for vid, er det i forslaget opna for at dei tidsdifferensierte
takstane berre kan bli tekne i bruk i tilfelle der det er heilt
naudsynt av omsyn til liv og helse. Bruken av takstane er etter
dette knytt til fare for og ved overskriding av grenseverdiane fastset
i forskrift med heimel i forurensningsloven § 9.
Trafikkrestriksjonar som blir innført av omsyn til
menneske si helse, må etter departementet si vurdering seiast å
vere innanfor kva som kan aksepterast som allmenne omsyn etter artikkel
13 i EØS-avtala. Departementet er av den oppfatning at sjølv høge
takstar for å nytte vegnettet i avgrensa periodar med høg luftforureining
i byområde, ikkje kan seiast å vere ein uproporsjonal restriksjon
for å få ned forureininga frå biltrafikken.
EØS-regelverket er etter dette ikkje til hinder
for å kunne ta i bruk ikkje-diskriminerande reguleringsavgifter
som etter føresegna i framlegget.
Vegdirektoratet sende i brev av 18. februar
2011 forslag om lovendringa med høyringsfrist 1. april 2011. Høyringsinstansane
gir i all vesentleg grad tilslutnad til lovforslaget.
Nokre høyringsinstansar, Norges Taxiforbund, Akershus
fylkeskommune og Bærum kommune, går imot forslaget. Einskilde høyringsinstansar, mellom
anna Norges Automobil-Forbund, har uttala at det er behov for meir
permanente verkemiddel enn det lovforslaget opnar for og at forslaget
ikkje vil nå målsetjinga om ei god og permanent løysing. Norges
Automobil-Forbund og Forbrukarrådet har etterlyst kva effekten av
å innføre tiltaket vil vere, og at det bør gjerast ein nærare utgreiing
om tidsdifferensiering vil gi ønska reduksjon av trafikken.
Fleire høyringsinstansar, mellom anna Klima- og
forureiningsdirektoratet, peiker på at det er viktig at takstane
er så høge at ein oppnår ønska effekt for å få avvisning av trafikk.
Fjellinjen AS meiner samstundes at det er viktig at trafikken likevel
ikkje stoppar heilt opp. Einskilde høyringsinstansar, mellom anna
Hordaland fylkeskommune, Bergen kommune og Norges Automobil-Forbund,
peiker på at effekten av tiltaket vil vere høgast dersom reduksjonen
i trafikken kjem frå dei køyretøya som forureinar mest, og meiner
at det bør vurderast om både passeringstidspunkt og køyretøyet sine
miljøeigenskapar skal leggjast til grunn for trafikkregulerande avgifter.
Vidare peiker fleire høyringsinstansar, mellom anna
Forbrukarrådet og NHO Transport, på at det er vesentleg at kollektivtrafikken
blir forsterka dei dagane tiltaket vert sett inn.
Utdrag frå fråsegner går elles fram av pkt.
2.3 i proposisjonen.
Departementet har merka seg at dei fleste høyringsinstansane
i all hovudsak støttar lovforslaget. Dei ser det som positivt at
lokale styresmakter får moglegheit til å nytte eksisterande bompengesystem
som verkemiddel til å få ned biltrafikken i periodar når det oppstår
høg luftforureining.
Nokre høyringsinstansar har peika på behovet for
meir permanente verkemiddel for å halde forureininga frå biltrafikken
på eit akseptabelt nivå på ein permanent basis.
Departementet peikar på at det i all hovudsak
er Oslo, Bergen og Trondheim som har problem med overskriding av
grenseverdiane for NO2 og PM10 etter forurensningsforskriften § 7-6.
Den totale eksponeringa over tid er eit vesentleg større
folkehelseproblem enn kortvarig, isolert eksponering av høg luftforureining,
og det er derfor viktig at lokale styresmakter arbeider aktivt for
at lokal forureining blir halden på forskriftsfesta nivå.
Når det gjeld spørsmålet om kva effekt tiltaket kan
ha for å få ned den høge luftforureininga frå biltrafikken, peiker
departementet på at erfaringane med bompengeinnkrevjing i byområda
har vist at takstfastsetting i kombinasjon med kollektivtrafikk
har ein effekt på trafikkmengda på vegnettet.
Den føreslegne endringa i veglova § 27 legg
opp til at kommunen og fylkeskommunen fattar naudsynt avgjerd om
at tidsdifferensierte takstar kan tas i bruk før departementet fastset
dei nærare takstane. Dette inneber at det er dei lokale styresmaktene
som både tek stilling til om verkemidlet er eigna som verkemiddel
mot høg luftforureining frå biltrafikken i det enkelte byområdet
og som avgjer bruken av verkemidlet i den einskilde situasjon. Ved
takstfastsetjinga vil departementet, basert på faglege råd frå mellom anna
Statens vegvesen og Klima- og forureiningsdirektoratet, ta ei overordna
stilling til om dei auka taks-tane vil gi naudsynt effekt for byområdet.
Ut over dette ligg det etter føringane i forurensningsforskriften
kapittel 7 til dei lokale styresmaktene å avgjere kva for verkemiddel som
er dei riktige for å få ned forureininga frå biltrafikken. Lovforslaget
opnar ikkje for at departementet kan gi nærare føringar om bruken
av takstane ut over det som er fastsett etter vilkåra i forslaget
og føresegna etter forurensningsforskriften kapittel 7.
Det er elles ein føresetnad for effekten av
tiltaket at det blir teke i bruk andre verkemiddel i høve takst-auka,
som varsling av trafikantane og auke i kollektivtrafikktilbodet.
Når det gjeld avgjerdsmyndigheit og overordna saksgang,
er det i lovforslaget lagt til grunn at departementet fastset dei
tidsdifferensierte takstane for det einskilde byområdet. Dette er
i tråd med hovudregelen i § 27 første ledd. Departementet har vurdert
spørsmålet om lova bør fastsetje nærare føresegn om takstfastsetjinga
etter andre ledd, inkludert føresegn om minimums- og maksimumssatsar,
differensiering etter grad av forureining frå det enkelte køyretøy
og fritaksordningar. Departementet meiner at omsynet til at takstsystemet
blir tilpassa det enkelte byområdet sitt behov må gå føre eit behov
for lovbundne rammer for takstane etter unntaksføresegna i § 27
andre ledd. Det er her eit hovudomsyn at takstane som blir fastsett
i medhald av føresegna verkar i samsvar med føremålet med ordninga. Takstfastsetjinga
vil kome av ein fagleg vurdering av kva takstar som må til for å
oppnå ønska trafikkreduksjon i det enkelte byområdet. Departementet
legg også vekt på at takstane etter føresegna er meint å gjelde
for korte periodar med høg luftforureining.
Departementet si avgjerd etter § 27 andre ledd blir
å rekne som ei forskrift etter forvaltningslova § 2 første ledd
bokstav c. Som omtalt i høyringsnotatet må det vere ein føresetnad
for ordninga at det ligg føre lokale vedtak. Departementet foreslår
derfor at det blir lagt inn eit tillegg i § 27 andre ledd som seier
at bruken av takstane føreset vedtak av kommunen og fylkeskommunen.
Setninga inneber at det både må liggje føre lokale vedtak om at
det kan bli fastsett forskrift om mellombelse tidsdifferensierte bompengetakstar
etter lovføresegna, og at den faktiske bruken av takstane blir gjort
i samsvar med lokale vedtak. Referanse til forureiningsregelverket
blir gitt til heimelsgrunnlaget for forskrifta, forurensningsloven
§ 9.
Departementet ser det som føremålstenleg at
dei lokale styresmaktene til ein kvar tid vurderer om vilkåra for
å ha dei auka takstane i bruk er oppfylte, framfor lovbundne maksimaltider.
Samferdselsdepartementet held etter dette fast på
forslaget om at verkemidlet berre kan bli teke i bruk i byområde
som allereie har i drift bompengeinnkrevjing. I område som ikkje
oppfyller dette, må det heller bli sett i verk andre og meir langsiktige
tiltak for å halde luftkvaliteten på forskriftsfesta nivå.
Bruk av takstar etter unntaksføresegna inneber ein
del administrative og økonomiske konsekvensar som må avklarast i
forkant av at det blir opna for tiltaket.
Samferdselsdepartementet tilrår at moglege konsekvensar
som inntektsbortfall eller meirinntekter blir teke omsyn til gjennom
ein tilleggsavtale med bompengeselskapet. Lågare inntekter eller meirinntekter
vil dermed tilfalle bompengeselskapet. Dersom eit eller fleire tiltak
ikkje kan bli realisert pga. manglande inntening innanfor den vedtekne
bompengeperioden, og det framleis er lokalpolitisk ønske om utbygging,
vil det vere naudsynt å leggje fram ein ny proposisjon for Stortinget
med forslag om utviding av bompengeinnkrevjinga.
Dei nærare administrative konsekvensane av eit opplegg
for tidsdifferensiering av bompengar må avklarast i forkant av at
det blir opna for iverksetjing av tiltaket i det enkelte byområdet. Tiltaket
bør vere ein del av kommunen sin beredskapsplan etter for-urensningsforskriften,
der ansvarshøve og praktiske problemstillingar knytt til gjennomføring
og iverksetting er avklart.
Nærare om lovtekniske endringar i veglova og
i vegtrafikkloven går fram av pkt. 3 i proposisjonen.
Departementet meiner lovtekniske omsyn tilseier
at veglova si tittel blir underlagt den same titteloppbygginga som
gjeld for lovverket elles, og foreslår derfor å endre tittelen til
«lov 21. juni 1963 nr. 23 om vegar (veglova)».
Det blir m.a. vist til at vegtrafikkloven § 22 a blei
endra i to endringslover: lov 5. mai 2006 nr. 13 om endringer i
vegtrafikkloven og jernbaneloven m.m. (avholdsplikt og promillegrense mv.)
og lov 17. desember 2010 nr. 91 om endringar i lov 18. juni 1965
nr. 4 om vegtrafikk (endringar relatert til ruspåverka køyring m.m.).
Lovendringa frå 2006 blei først sett i kraft
frå 1. februar 2012. Iverksetjinga førte til at dei mellomliggjande
endringane i § 22 a frå 2010 fall bort. Det har ikkje vore departementet
si meining å gjere denne realitetsendringa. Departementet ser det
derfor som naudsynt å gjere ei lovteknisk endring av § 22 a for
å få med dei mellomliggjande endringane frå 2010. Lovendringa har
ikkje vore på offentleg høyring da departementet meiner at dette
openbart ikkje er naudsynt. Om merknader for dei einskilde endringane,
sjå Prop. 9 L (2010–2011) kapittel 11 og Ot.prp. nr. 39 (2005–2006)
kapittel 8.2.