May-Helen Molvær Grimstad (KrF):
Eg
har følgjande spørsmål til samferdselsministeren:
Postverket har foretatt ei
postpakkeomlegging som medfører at alle pakkene skal sendast til Oslo for
sortering.
Er det teke miljøomsyn til den auken
det vil medføre i transporten?
Statsråd Kjell Opseth:
I det
opplegget for handsaming av postpakker som vart gjennomført frå 9. januar i
år, skal pakker, unntatt pakker til eige lokalområde, frå stader i Sør-Noreg
sendast til Oslo for sortering.
Postverket opplyser at opplegget
totalt sett ikkje fører til auka transport. I mange høve blir
trafikkbehovet mindre. Ein del transport blir ført over frå bil til bane.
Hovudmengda av postpakkene vart også
tidlegare send om Oslo. Posten vart då transportert til dei einskilde
sorteringskontora, noko som i mange høve førte til dårleg utnytting av
transporteiningane. Behovet for biltransport på kyststrekninga mellom
Stavanger, Bergen og Trondheim er redusert med det nye opplegget, då ein god
del av posten no blir send med jernbane om Oslo. Omlegginga av
pakkehandsaminga gjev difor også miljøfordelar.
May-Helen Molvær Grimstad (KrF):
Eg
takkar statsråden for svaret, men det verkar noko underleg at det ikkje skal
føre til auka transport når alle postpakker mellom to postdistrikt sør for
Trondheim skal om Oslo. Har det vore så stor ledig kapasitet i
transportbilane og postcontainarane tidlegare at ein no kan ta alle
postpakkene med utan at det er behov for meir transport? Kva då med
høgsesongen for posten: julerushet?
Det verkar også som om det ligg
sentralisering bak i forhold til at det no er investert i og bygt ut
terminal i Oslo, for så deretter å få all post hit. Det verkar som om det
er noko unødvendig bruk av transport og tid. Kundane tapar tidsmessig, men
pakkene får « interrailbillett » i Noreg, noko som mottakarane av pakkene ikkje
har glede av.
Eg ser at statsråden nemner auka bruk
av jernbane, og det kan vere positivt. Men det er ikkje alle stader det er
jernbane.
Er det verkeleg slik at miljøomsyna er
tilstrekkeleg ivaretatt?
Statsråd Kjell Opseth:
Det er verken
god miljøpolitikk eller god økonomisk politikk å køyre ruter på kryss og
tvers mellom alle sorteringskontora med meir eller mindre halvfulle
køyretøy. Det er ein del av det opplegget ein må få bort. Difor blir dette
både ein økonomisk gevinst og ein miljøgevinst. Ja, det blir faktisk for
dei aller fleste også ein tidsgevinst i forhold til det systemet ein hadde
før 9. januar når det gjeld å framføre pakkepost.