Rita Tveiten (A):
Sivilombodsmannen
har i brev 12. mars 1998 gjeve Noregs Mållag medhald i ei klagesak som gjeld
tolkinga av om ei rekkje læremiddel som berre ligg føre på bokmål, kjem inn
under jamstellingsreglane i lov om vidaregåande opplæring. Ombodsmannen ber
vidare departementet vurdera retningslinene for praktisering av krav om
språkleg parallellitet på nytt.
Kva initiativ vil statsråden ta i
denne saka?
Statsråd Jon Lilletun:
Fyrst vil eg
seie litt om bakgrunnen for fråsegna frå Sivilombodsmannen. Lov om
vidaregåande opplæring § 38 andre leddet lyder slik:
Lærebøker
og andre læremidler i andre fag enn norsk må foreligge til samme tid og samme
pris på bokmål og nynorsk. Departementet kan gjøre unntak fra denne regelen.
Kravet til språklege parallellutgåver
av lærebøker er greitt å praktisere. Lærebøker skal godkjennast av
Nasjonalt læremiddelsenter, og ingen lærebøker blir godkjende dersom dei
ikkje ligg føre i begge målformer.
Når det gjeld « andre læremidler », er
alle einige om at ikkje alt som blir nytta i undervisninga, er å rekne som
læremiddel. Mellom anna med bakgrunn i sak reist av Noregs Mållag for
Nedenes namsrett hausten 1994 om læremiddel og nynorskutgåver, og i
Mållagets « svartelistingar » av læremiddel, tok departementet eit initiativ til
utarbeiding av nærare retningsliner for kva for læremiddel som ligg innafor
kravet til språklege parallellutgåver.
Ei gruppe under Nasjonalt
læremiddelsenter utarbeidde eit forslag. I gruppa var m.a Norsk Språkråd
representert. Med grunnlag i forslag frå gruppa fastsette departementet
retningsliner våren 1995. Dei gjekk ut på at dersom eit læremiddel dekkjer
mål og hovudmoment i læreplanen for faget, fell det innafor kravet til
språkleg parallellutgåve.
Noregs Mållag var ikkje einig i desse
retningslinene. Mållaget klaga to fylkeskommunar inn for Sivilombodsmannen
for bruk av fem læremiddel som etter retningslinene ikkje fall inn under
kravet til parallellutgåver, og derfor ikkje låg føre i nynorskutgåver.
I brev av 12. mars i år seier
Sivilombodsmannen at desse fem læremidla må reknast som læremiddel etter lov
om vidaregåande opplæring. Ombodsmannen viser til at elevane blir oppmoda
til å kjøpe desse læremidla og at læremidla er skrivne for skulen.
Fråsegna fra Sivilombodsmannen inneber
at fleire typar hjelpelitteratur vil kome inn under kravet til språklege
parallellutgåver.
Departementet vil no fylgje opp
Sivilombodsmannens fråsegn. Retningslinene vil bli omarbeidde i samsvar med
fråsegna til Sivilombodsmannen. Saka vil bli fylgd opp i høve til
fylkeskommunane som skuleeigarar og i høve til skulebokforlaga. Det vil bli
orientert om at fylkeskommunane må leggje Sivilombodsmannens fråsegn til
grunn. Særleg må fylkeskommunane vere merksame på at det på boklistene til
skulane berre må førast opp læremiddel som ligg føre på begge målformer.
Rita Tveiten (A):
Eg takkar
statsråden for svaret. Eg er svært glad for at departementet no fylgjer opp
fråsegna frå Sivilombodsmannen og utarbeider nye retningsliner i tråd med
den lovtolkinga som ombodsmannen har gjort.
Som statsråden peika på, får fråsegna
verknad for mange andre læremiddel som i dag berre ligg føre på bokmål. Det
er derfor viktig at forlaga raskt får melding om det nye regelverket, slik
at dei bøkene og læremidla dei framleis ynskjer å framby på
skulebokmarknaden, no også kjem i nynorskutgåve. Det må vera eit mål at
dette er ordna til skulestarten i haust.
Ein siste ting vil eg gjerne
kommentere. Fylkeskommunane eig dei vidaregåande skulane. Det er derfor
sjølvsagt rett at dei vert orienterte om fråsegna og dei nye retningslinene.
Eg ber likevel statsråden vurdera å senda eit rundskriv direkte til dei
vidaregåande skulane. Det er den einskilde skulen som vel lærebøker og set
opp boklister. Val av lærebøker for skuleåret 1998-99 går føre seg i desse
dagane. Derfor er det viktig at skulane får dei nye retningslinene så snart
som praktisk mogleg.
Statsråd Jon Lilletun:
Eg er einig
med representanten Tveiten i at ein raskt bør gje informasjon. Det skal bli
gjort. Vi skal òg vurdere om det skal gå eit brev direkte til dei
vidaregåande skulane for at dei raskast mogleg skal bli orienterte. Elles
har eg tillit til at administrasjonane i dei einskilde fylkeskommunane
fylgjer opp den informasjonen som går ut frå departementet, men eg skal
likevel vurdere oppmodinga frå representanten Tveiten.