Laila Kaland (A): Eg vil stille følgjande spørsmål
til kyrkje-, utdannings- og forskingsministeren:
«På landsplan er det i dag
problem med rekruttering av lærarar både i grunnskulen
og den vidaregåande skulen. Den vidaregåande skulen
i Møre og Romsdal er verst ramma når det gjeld
rekruttering av lærarar. Spesielt er det vanskar med å få lærare
i yrkesfaga. Dette er ei farleg utvikling.
På kva måte vil statsråden
medverke til at læraryrket kan bli meir attraktivt?»
Statsråd Jon Lilletun: Den 12. mars 1998 fatta Stortinget fylgjande
vedtak:
«Stortinget
ber Regjeringa om å legge fram ein eigen handlingsplan
for rekruttering til læraryrket. Handlingsplanen må innehalde
vurderingar av alle sider ved lærarens arbeidsforhold og
tiltak for å sikre både ny rekruttering og stabilitet
i læraryrket.»
Ved fleire høve har eg munnleg sagt
i Stortinget at eg vil leggje fram ein slik plan i ei eiga melding
til Stortinget. Skriftleg har eg varsla om at meldinga er planlagd lagt
fram i vår. I departementet legg vi i desse dagar siste hand
på utkastet til meldinga. Eg tek sikte på at ho
kan leggjast fram av Regjeringa før sommarferien.
I meldinga vil eg
vise korleis lærardekninga
er i dag
vise utviklingsframskrivingar
analysere og gje mine vurderingar av lærarsituasjonen
leggje fram ein handlingsplan for å sikre framtidig lærardekning
Eg finn det ikkje rett i dag å gå nærmare
inn på kva for tiltak vi vil leggje fram. Det eg kan seie,
er at meldinga vil innehalde fleire tiltak både for å sikre
tilgangen til læraryrket og for å påverke
fleksibiliteten og arbeidsforholda i skulen på ein positiv
måte.
Eg håper representanten Kaland er
nøgd med dette til så lenge, og så kan
vi kome attende til diskusjonen når meldinga vert framlagd.
Laila Kaland (A): Eg vil takke statsråden for svaret, og
eg skal love å lese rekrutteringsmeldinga hans nøye. Eg
følte at det var ein liten lærar som kom fram
i det svaret som eg fekk, men det tek eg til etterretning – eg
har ikkje følgt godt nok med i timen.
Men eg har fått ein del problemstillingar
frå eige fylke som går på at Møre
og Romsdal har ein del problem med rekrutteringa av lærarar,
og spesielt går det på lærarar med realfag
på ungdomsskuletrinnet. Dei ser også at talet på søkjarar
t.d. ved Volda Lærarhøgskule har gått
ned med ca. 50 pst. dei to siste åra. Det går
også på at ca. 40 pst. av lærarane er
over 50 år, så no slit dei litt med langtidssjukemeldingar,
og enkelte blir også uføretrygda.
Dette er ei alvorleg problemstilling. Derfor
meiner eg at eit betre arbeidsmiljø for både lærarar
og elevar i skulen, eit betre utdanningstilbod og kanskje også ei
letting av arbeidsbyrdene for lærarar som har kome over
50 år, er noko ein må ta med seg. Dei tiltaka
skal eg med glede vere med og diskutere når rekrutteringsmeldinga
ligg føre.
Statsråd Jon Lilletun: I den grad representanten Kaland opplevde
at skulemeisteren sa at ho ikkje hadde fylgt med i timen,
var det ikkje det som var meininga med svaret mitt – det
var å gje opplysningar. Eg synest det er prisverdig at
ein representant frå eit distrikt tek opp dei problema
som trykkjer på i distriktet.
Når det gjeld yrkesfaglærarar,
er det heilt rett det som representanten Kaland seier. Ein ting
vi håper skal avhjelpe det, er at vi no, som eitt tiltak,
har kome i gang med ei ny faglærarutdanning. Så dei
forholda og tilhøva som representanten Kaland no peikte
på, er heilt klart relevante for situasjonen og vil verte
omhandla i meldinga.
Eg meiner at kvar ting som fører til
merksemd om det som det trengst å gjerast noko med, er
ein god ting.